Программэу «Iэрыфэгъу къэлэ щыIакIэр» зыфиIорэм къыдыхэлъытагъэу фэтэрыбэу зэхэт унэхэм ящагухэм ягъэцэкIэжьын Адыгеим щэкIо.

Мы программэр гъэцэкIагъэ зыщыхъу­рэ илъэси 7-м къыкIоцI щагу 200-м ехъу республикэм икъэлэ шъхьаIэ щызэтырагъэпсыхьагъ. Мы илъэсым джыри унэхэм къапэIулъ чIыпIэ 21-рэ агъэкIэ­жьыщт. IофшIэнхэр етIупщыгъэу макIох.
Мыекъуапэ имэрэу Геннадий Митрофановым къызэрэхигъэщыгъэмкIэ, непэкIэ яшъыпкъэу зыдэлажьэхэрэм щагу 13 ащыщ, 9-р агъэцэкIэжьыгъах пIоми хъущт.
— Ыпэрэ илъэсхэм афэдэу ипIалъэм къыпэу щагухэм язэтегъэпсыхьан тыухы­нэу тыфай. Ахъщэр къызэрэтIэкIахьэрэм елъытыгъэу унэхэм къапэIулъ чIыпIэхэр зэтетэгъэпсыхьэх. Программэм хэлэжьэнхэм пае унэхэм ачIэсхэм лъэIу тхылъхэр къызэратыхэрэ шIыкIэм тегъэпсыхьагъэу, чэзыу гъэнэфагъэм тетэу гъэцэкIэжьын IофшIэнхэр макIох. Ау, зыгорэкIэ ахъщэу къатIупщырэр нахьыбэ зыхъукIэ, IофшIэнхэр нахьыжьэу зэшIуахынхэ алъэкIыщт, — къыIуагъ Геннадий Митрофановым.
Адыгеим икъэлэ шъхьаIэ ипащэ къызэрэхигъэщыгъэмкIэ, программэу «Iэры­фэгъу къэлэ щыIакIэр» зыфиIорэм ухэфэн плъэкIыщт унэ-псэупIэ хъызмэтым и ГъэIорышIапIэ е къалэу Мыекъуапэ иадминистрацие цIыфхэм ялъэIу тхылъхэр IэкIагъахьэхэзэ. Хабзэ зэрэхъугъэм тетэу, специалистхэм къараIощт зэкIэлъыкIуакIэу щыIэм елъытыгъэу IофшIэнхэр пэшIорыгъэшIэу гъэцэкIагъэ зыщыхъущтхэ пIа­лъэр.

— Iо хэлъэп, чэзыур нахь лъагъэкIотэни алъэкIыщт. Ар зэпхыгъэр мылъкоу къыхагъэкIырэр зыфэдизыр ары. ИпIа­лъэм къыпэу фэтэрыбэу зэхэт унэм къыпэIулъ чIыпIэр зэтырагъэпсыхьэуи къыхэкIы. Арэущтэу хъун зилъэкIыщтыр щагоу IофшIэнхэр зыщыкIорэр нэмыкI щагум къыпэIулъ шъыпкъэу зыхъукIэ ары, — къыIуагъ Геннадий Митрофановым.
Къалэм ипащэ къызэрэкIигъэтхъыгъэм­кIэ, Урысыем и Президентэу Владимир Путиным Федеральнэ ЗэIукIэм фигъэхьыгъэ Джэпсалъэм къызэрэщиIорэмкIэ, программэм мылъкоу пэIуагъахьэрэр нахьыбэ ашIыщт, ежь программэр 2030-рэ илъэсым нэсынэу бэмышIэу агъэнэфагъ.
— Ащ къикIырэр Мыекъуапэ джыри ащ фэдэ ичIыпIэу зэтырагъэпсыхьащтхэр нахьыбэ зэрэхъущтхэр ары. Ау мыщ дэжьым зыщыдгъэгъупшэ хъущтэп фэтэрыбэу зэхэт унэхэм ащыпсэурэ цIыфхэми загъэчанын зэрэфаер. Лъэпкъ проектым къыделъытэ щагухэм язэтегъэ­псы­хьан иIофыгъохэм язэшIохын цIыфхэри нахь чанэу къыхэгъэлэжьэгъэнхэр, — къызэфихьысыжьыгъ Геннадий Мит­рофановым.
Александра Балабась.