Адыгеим и ЛIышъхьэу КъумпIыл Мурат Адыгэ къэралыгъо университетым иректор зыщыхадзыгъэ конференцием хэлэжьагъ.
АР-м гъэсэныгъэмрэ шIэныгъэмрэкIэ иминистрэу Евгений Лебедевыр, АКъУ-м ипрофессорхэр, икIэлэегъаджэхэр Iоф­тхьабзэм хэлэжьагъэх. Амакъэ шъэфэу заты нэуж хэдзыным икIэуххэмкIэ макъэ къагъэIугъ.
Мамый Даут ректор IэнатIэм къыIу­нэжьыгъ. Ар АКъУ-м гъэсэныгъэм еп­хыгъэ политикэмкIэ идепартамент ипащэу Надежда Ильиновам мэкъэ заулэкIэ ыпэ ишъыгъ.
Республикэм и ЛIышъхьэ зэрэхигъэ­унэфыкIыгъэмкIэ, хэдзыным икIэуххэм къагъэлъэгъуагъ Мамый Даут иIофшIэн хэшIыкIышхо зэрэфыриIэр, пэщэ дэгъоу зэрэщытыр.
«АКъУ-м псынкIэу хэхъоныгъэ ешIы. Джырэ шапхъэхэм адиштэрэ шIыкIэ-амалхэр, технологиякIэхэр къызфегъэфедэх, научнэ-ушэтын IофшIэным зырегъэушъом­бгъу, Урысыем иапшъэрэ еджэпIэ пэрытхэм адигъэцэкIэрэ программэхэм ахэхъо. Адыгэ къэралыгъо университетым федеральнэ проектэу «Приоритет 2030» зыфиIорэр гъэхъагъэ хэлъэу пхырещы», — къыIуагъ КъумпIыл Мурат.
Республикэ естественнэ-хьисап еджа­пIэм (РЕМШ), кIэлэеджакIохэм я Дунэе Кавказ хьисап олимпиадэ язэхэщэнкIэ, АКъУ-м истатус зыкъегъэIэтыгъэнымкIэ Мамый Даутэ Iофышхо зэрэзэшIуихыгъэр шъхьафэу хагъэунэфыкIыгъ.

КъумпIыл Мурат анаIэ тыраригъэ­дзагъ Адыгэ къэралыгъо университетыр нахь чанэу республикэм истратегическэ хэ­хъоныгъэ зэрэхэлэжьэн фаем. Кадрэ Iофыгъом къытегущыIэзэ, Адыгеим и ЛIышъхьэ къыхигъэщыгъ республикэм иеджапIэхэр кIэлэегъэджэ 200-м ехъумэ зэрафэныкъохэр. Анахьэу ар зыфэгъэ­хьыгъэр урысыбзэмкIэ, IэкIыб къэралыгъуабзэхэмкIэ, химиемкIэ, физикэмкIэ ыкIи хьисапымкIэ кIэлэегъа­джэхэр ары. Джащ фэдэу психологхэми, социальнэ егъэджакIохэми ащэкIэх.
АКъУ-р республикэм иэкономикэ нахь чанэу зэрэхэлэжьэн фаер конференцием къыщаIуагъ. Урысыем и Президентэу Владимир Путиным къафишIыгъэ пшъэрылъхэм адиштэу апшъэрэ еджапIэмрэ шъолъырхэмрэ апашъхьэ зэшIохыгъэн фэе Iофыгъошхохэр зэритхэр къыхагъэщыгъ. ЗэрэхагъэунэфыкIыгъэмкIэ, Адыгэ къэралыгъо университетымрэ Мыекъопэ технологическэ университетымрэ экономикэмкIэ, промышленностымкIэ, социальнэ лъэныкъомкIэ ящыкIэгъэщт IофышIэхэм якъэгъэхьазырынрэ ныбжьыкIэ политикэм ипхырыщынрэ нахь чанэу ахэлэжьэнхэ фае.
Конференцием икIэух Адыгеим и ЛIышъхьэ джыри зэ Мамый Даутэ фэгушIуагъ ректорэу зэрэхадзыжьыгъэм фэшI ыкIи пащэхэми, АКъУ-м иIофы­шIэхэми гъэхъэгъакIэхэр ашIынэу афэлъэIуагъ.
АКъУ-м иректор республикэм и ЛIышъхьэ къызэрэфэгушIуагъэр игуапэ зэрэхъугъэр къыIуагъ. Апшъэрэ еджапIэм ипащэ КъумпIыл Мурат «тхьауегъэпсэу» риIуагъ апшъэрэ еджапIэм ренэу ынаIэ къызэрэтыригъэтырэм фэшI.
«ТIэ зэкIэдзагъэу тызэдэлажьэмэ, нахь гъэхъэгъэшхохэр тшIын, Адыгэ къэралыгъо университетыр хэхъоныгъэм игъогу рыкIон зэрилъэкIыщтым сицыхьэ телъ. Ренэу IэпыIэгъу укъытфэхъу зэрэпшIоигъор зэхэтэшIэ, лъэныкъоу тынаIэ зытетэбгъэдзагъэхэм тэри гу алъытэтэ. Республикэм ищыкIагъэхэм нахь лъэшэу тынаIэ атетыдзэным тыфэхьазыр», — къыIуагъ Мамый Даутэ.
Шъугу къэтэгъэкIыжьы ректорэу Мамый Даутэ Москва дэт къэралыгъо университетыр къызэриухыгъэр. I990-рэ илъэсым МКъУ-м иаспирантурэ ыуж ащ кандидат диссертациер къыгъэшъыпкъэ­жьыгъ. АКъУ-м икIэлэегъаджэу щытыгъ, РЕМШ-р зэхищагъ ыкIи пэщэныгъэ дызэрихьагъ, АКъУ-м хьисапымкIэ ыкIи компьютерхэмкIэ ифакультет идеканыгъ. 20I9-рэ илъэсым имэлылъфэгъу къыщегъэжьагъэу АКъУ-м иректорэу Iоф ешIэ. Научнэ IофшIэгъэ 20-м ехъу ытхыгъ, шIэныгъэ конгрессхэмрэ конференциехэмрэ ренэу ахэлажьэ. Урысыем гъэсэныгъэмкIэ и Министерствэ итамыгъэу «За развитие научно-исследовательской работы студентов» зыфиIорэр, Ушинскэм имедаль, медалэу «Адыгеим и Щытхъу­зехь», щытхъуцIэу «АР-м гъэсэныгъэмкIэ изаслуженнэ IофышI» зыфиIохэрэр къыфагъэшъошагъэх.