Урысыемрэ Белоруссиемрэ ялъэпкъхэм языкIыныгъэ и Маф
Непэ фэдэ мафэм 1996-рэ илъэсым ар хагъэунэфыкIынэу къэралыгъуитIум япрезидентхэм зэдаштагъ.
Илъэс тешIагъэу хэгъэгуитIум я Союз фэгъэхьыгъэ зэзэгъыныгъэм зэдыкIэтхагъэх. Лъэпкъхэм ящыIакIэ нахьышIу шIыгъэныр, язэкъошныгъэ гъэпытэгъэныр, социальнэ ыкIи нэмыкI лъэныкъохэмкIэ хэхъоныгъэшIухэр зэдашIынхэр ащ ипшъэрылъ шъхьаI. Ащ ыужи къэралыгъуитIум язэфыщытыкIэхэр шэпхъэшIухэм зэрадиштэрэр мызэу, мытIоу къагъэшъыпкъэжьыгъ. 1999-рэ илъэсым тыгъэгъазэм и 8-м Союзнэ къэралыгъо зэрэзэдагъэпсырэм лъэныкъуитIур зэдыкIэтхагъ ыкIи шIуагъэ хэлъэу илъэс пчъагъэхэм лэжьагъэ.
А уахътэм къыкIоцI зэзэгъыныгъэ 250-м нахьыбэ зэдашIыгъ. Лъэныкъо зэфэшъхьафхэмкIэ язэдэлэжьэныгъэ IэкIыб къэралыгъохэм ягъунапкъэхэми Iоф ащешIэ.
Урысыемрэ Белоруссиемрэ я Союзнэ къэралыгъо Iофыгъуабэ къызэлъеубыты: цIыфхэм яфитыныгъэхэр, гъэсэныгъэр, медицинэр, щэн-щэфыныр, лъэпкъ зэдэлэжьэныгъэр ыкIи нэмыкIхэр.
Илъэс къэс зэкIыгъухэу Iофтхьэбзэ зэфэшъхьафхэр зэхащэх, проектхэр зэдагъэцакIэх. Урысыем ыкIи Республикэу Беларусим япрезидентхэр бэрэ зэIокIэх, зэдэгущыIэх, язэдэлэжьэныгъэ зэпагъэурэп. Непэ Урысыем къыпэуцужьыхэрэм апэшIуекIогъэнымкIэ Беларусир икъотэгъу, я Союзнэ къэралыгъо зэщызыгъэкъонэу пылъхэм ащ фэдэ амал аратырэп.
КъэралыгъуитIум язэныбджэгъуныгъэ зыгъэпытэхэрэм ащыщ Урысыем ишъолъырхэр Белоруссием чанэу зэрэдэлажьэхэрэр. Экономическэ, культурнэ зэпхыныгъэхэм хэхъоныгъэ ашIы.
ГущыIэм пае, Адыгеим илIыкIо купэу АР-м иминистрэхэм я Кабинет и Тхьаматэ игуадзэу ЛIыхэсэ Махьмуд зипащэр Республикэу Беларусим бэмышIэу щыIагъ. КъыдэгъэкIыжьыным, мэкъу-мэщым, гъэсэныгъэм алъэныкъокIэ зэдэлэжьэнхэм, сатыу зэфыщытыкIэхэм, экспортымрэ импортымрэ алъэныкъокIэ амалэу яIэхэм ахэгъэхъогъэным атегущыIагъэх. Белоруссием къыращэу Адыгеим щыIуагъэкIырэр нахьыбэ хъугъэ. ЛъэныкъуитIум сатыоу зэдашIырэм фэдизрэ ныкъорэ хэхъуагъэу 2024-рэ илъэсыр рагъэжьагъ. МашинэшIыным щагъэфедэрэ продукцием икъегъэолIэнкIи Белоруссием пэрытныгъэр зэриIыгъыр зэIукIэгъум къыщыхагъэщыгъ. ЗэIукIэгъухэм язэфэхьысыжьэу, АР-м иминистрэхэм я Кабинетрэ Республикэу Беларусь и Правительствэрэ сатыу-экономическэ, шIэныгъэ-техническэ ыкIи социальнэ-культурнэ зэдэлэжьэныгъэу зэдыряIэщтым фэгъэхьыгъэ зэзэгъыныгъэм зэдыкIэтхагъэх, 2024 — 2026-рэ илъэсхэм ар пхырыщыгъэ зэрэхъущт шIыкIэр агъэнэфагъ. Адыгеим имызакъоу Урысыем инэмыкI шъолъырхэми Белоруссием мыщ фэдэ зэпхыныгъэ дыряI. КъэралыгъуитIумэ языкIыныгъэ а пстэуми агъэпытэ, Союзнэ къэралыгъор агъэлъэшы, тапэкIи ар чIэнагъэ зэрэмыхъущтымкIэ шIошIыр агъэпытэ.
Урысыемрэ Белоруссиемрэ ялъэпкъхэм языкIыныгъэ и Мафэ фэгъэхьыгъэ Iофтхьабзэхэр, зэIукIэгъухэр, зэдэгущыIэгъухэр непэ къэралыгъом ишъолъыр зэфэшъхьафхэм ащыкIощтых.
Анцокъо Ирин.
Сурэтыр: Кремлин.ру