Гъатхэм иятIонэрэ мазэу мэлылъфэгъур къихьагъ. ЛатиныбзэкIэ «априлисым» къи­кIырэр «къызэIухыгъэныр» ары. Мы мазэр псым иIункIыбзэу алъытэ. Джащ фэдэу ижъыкIэ къыщегъэжьагъэу гъатхэр мэлылъфэгъум ибысымэу, ащ нэмыкIэу гъэ­бэжъум ыкIи уашъом, шIулъэгъум итхьэу Афродитэ мыр ямазэу аIо.

КIымафэм ифэмэ-бжьымэхэр мэлылъфэгъу мазэм зэкIэкIох, Средиземноморьем къикIырэ фабэр къыхьэу регъажьэ. Гъэтхэпэ мазэм егъэпшагъэмэ, мэлылъфэгъум фабэр градуси 9 — 10-кIэ нахьыб. Арэу щытми, арктическэ жьы чъыIэм ыпкъ къикIэу къэучъыIэу къы­хэкIыщт.
ГидрометеорологиемкIэ ыкIи тыкъэзыуцухьэрэ дунаим иуплъэкIункIэ Гупчэм ипащэу Александр Митровым тызэрэщигъэгъозагъэмкIэ, мэлылъфэгъум температурэр зыпкъ итыщт. Мы аужырэ илъэс 60-р пштэмэ, мэлылъфэгъур нахь чъыIэу къызщыхэкIы­гъэр 2004-рэ илъэсыр ары, чъыIэу градуси 7 — 6 агъэу­нэфыгъагъ. Анахь фабэу къызщыхэкIыгъэр 1998-рэ илъэсыр ары, ащыгъум градус 37-рэ агъэунэфы­гъагъ.
Мэлылъфэгъур зыпкъ итэу фэбэщт ыкIи шынэгъакIэ иIэщт. ГурытымкIэ температурэр ыкIи ощхэу къещхыщтыр шапхъэхэм ашIокIыщтэп.
Апэрэ мэфипшIыр. Чэщым градуси 3 — 8 щы­Iэщт, чъыIэр градуси 3-м нэсэу, къыгъэщтэу къы­хэкIыщт. Мафэм фабэр градуси 10 — 15, джащ фэдэу градус 25-м кIахьэуи хъущт.
ЯтIонэрэ мэфипшIыр. Чэщым градуси 5 — 10 щыIэщт, 0-м зыщынэсыщти къыхэкIыщт. Мафэм фабэр градус 13 — 18 ыкIи градус 23-м кIэхьащт.
Ящэнэрэ мэфипшIыр. Мэлылъфэгъум икIэухым ом изытет нахь фэбэщт. Чэщым фабэр градуси 5 — 10, мафэм градус 16 — 21-м анэсыщт.
КъыхэкIыщтых мафэхэр фабэр градус 27-м кIахьэу.
Мэкъумэщ культурэхэм якъэгъэкIынкIэ мэлылъфэгъум гумэкIыгъо къыздихьыщтэп.
Псыхъохэм адэт псыр шапхъэу щыIэхэм ашIокIыщтэп. Ау лъэшэу къызещхырэм, ащ адэт псыр къыдэкIоен ылъэкIыщт.
КIАРЭ Фатим.