КIэсэбэжъ Аслъан Нурбый ыкъор псаоу щыIагъэмэ мэлылъфэгъум и 1-м ыныбжь илъэс 50 хъущтгъагъэ.

Адыгэ республикэ онкологическэ сымэджэщым иврачыгъэ кIэлэ ныбжьыкIэм илъэс 46-рэ ныIэп ыныбжьыгъэр зэрэду­наеу зэлъызыкIугъэгъэ уз мэхъаджэу коронавирусым ыпсэ зызде­хьым. ТапэкIэ гухэлъыбэ зыдиIыгъэу щытыгъ, ау ахэм алъы­Iэсынэу игъо ифагъэп.
Аслъан Мыекъопэ гурыт еджа­пIэу N 9-р 1991-рэ илъэсым къыухи, зы илъэсрэ Мыекъопэ медицинэ училищым щеджагъэу, 1992-м Пшызэ медицинэ институтым чIэхьагъ ыкIи 1998-рэ илъэсым ар къыухыгъ.
1998-рэ илъэсым ар къызеухым Мыекъуапэ къыгъэзэжьи, хирург сэнэхьатэу къыхихы-
гъэм­кIэ къэлэ сымэджэщым интернатурэр зы илъэсырэ щихьыгъ. КъыкIэлъыкIорэ илъэ­ситIур кли­ническэ ординатурэр къалэу Краснодар исымэджэщ щикIугъ. Нэужым Мыекъуапэ къыгъэзэжьи, къэлэ сымэджэщым хирургиемкIэ иотделение иIофшIэн щылъыпидзэжьыгъ.
2002 — 2004-рэ илъэсхэм Мыекъуапэ медицико-социальнэ экспертизэмкIэ и Бюроу N 2-м врач-хирургэу Iоф щишIагъ. Нэ­ужым къэлэ сымэджэщым хирургичемкIэ иотделение де­журантэу щылэжьагъ. Ренэу практикэр IэкIэлъын фаеу ылъы­тэщтыгъ. Илъэс зэфэшъхьафхэм Мыекъопэ медицинскэ училищым «Сестринское дело» зыфиIорэ сэнэхьатым студентхэр щыфигъэсагъэх.
2006-рэ илъэсым къыщегъэ­жьагъэу Адыгэ республикэ клиническэ онкологическэ сы­мэджэщэу М.Хъ. Iэшъхьэмафэм ыцIэ зыхьырэм врач-онкологэу Iоф щишIэзэ 2020-рэ илъэсым мэлылъфэгъум и 14-м игъонэмысэу идунай ыхъожьыгъ. ­Илъэс 22–м ехъу IофшIагъэу иIэм щыщ илъэс 14-р мы диспансерым щихьыгъ.

Аслъан исэнэхьат шIу зылъэ­гъурэ, исымаджэхэм ынаIэ ате­зыгъэтырэ, исэнэхьат шъыпкъэныгъэ фызиIэ цIыфэу, спе­циалистэу щытыгъ. 2020-рэ илъэсым икъихьагъу зэпахырэ узэу COVID-19-р къызежьэм цIыф бэдэд диспансерым къа­кIощтыгъэр. Зы мэфэ IофшIэгъум сымаджэу къеуалIэрэм ипчъагъэ шэпхъэ гъэнэфагъэ хэмылъэу, иуахътэ шъхьамысэу, цIыфыбэмэ ар IэпыIэгъу афэ­хъущтыгъ. «Гъогу кIыхьэ къэзыкIугъэ сымаджэхэу, къыпщыгугъыхи къэкIуагъэхэм, сыдэущтэу о нэбгырэ пчъагъэу пштэн фаер къыдэплъытэзэ уяIэзэн плъэкIыщта?» — ыIощтыгъ ащ. Врачым къыгурыIощтыгъ Iоф­шIэнышхо ыпшъэ зэрилъыр, ау «сыпшъыгъ» зыIорэ цIыфхэм ар ащыщыгъэп.
Аслъан унэгъо дахэ къыщинагъ, Тхьэм псауныгъэ пытэ къарет. ИкIалэу Тимур Мые­къопэ медицинэ колледжым щеджэ. Ятэ иIоф лъигъэкIотэн ыгу хэлъ. «Тятэ игъонэмыс хъу­гъэми, тыщэIэфэ ар псаоу къыд­готыщт ыкIи ыIощтыгъэхэри дгъэцэкIэщтых. ЦIыфыгъэ дахэм ишапхъэу тызфигъасэщтыгъэхэри зэрэтфэлъэкIэу зетхьащтых» еIо ащ. Ипшъа­шъэу Марианнэ Адыгэ республикэ гимназием дэгъу дэдэу ще­джэ. Ащи врач сэнэхьатыр къыхи­хынэу тыриубытагъ. Ишъхьэ­гъусэу Русетэ врач-терапевтэу Iоф ешIэ, Мыекъопэ техноло­гическэ университетым имедицинэ институт щырегъаджэх.
Уахътэр къэмыуцоу макIо, щыIэныгъэр ыпэкIэ лъэкIуатэ. Къытхэмытыжьым сыд фэпшIэ­жьын? ФэпшIэжьын плъэкIыщтыр лъэгъо дахэу къыгъэнагъэм щытхъу хэлъэу урыкIоныр ары. Ар Аслъан иунагъо дэгъоу къыгурэIо ыкIи амал зэриIэкIэ зэрагъэцэкIэщтым пылъых.
Аслъан къалэу Мыекъуапэ къыщыхъугъ нахь мышIэми, илIакъокIэ зыщыщхэ Пщыжъ­хьаблэ бэрэ щыIэщтыгъ. Сэри а къуаджэм сыщыщэу, Iахьыл IофкIэ тызэхахьэзэ, ар дэгъоу сшIэнэу хъугъэ ыкIи сигукъэ­кIыжьхэм шъхьафэу къахэнагъ. КIалэр зышIэщтыгъэу, деджа­гъэхэу, Iоф дэзышIагъэхэу, сы­маджэу зэIэзагъэу гущыIэгъу тызфэхъугъэ пстэуми ар зи­сэнэхьат фэшъыпкъэу, гукIэ­гъуныгъэшхорэ Iэдэбрэ зыхэлъ цIыфэу зэрэщытыгъэр къыха­гъэщыгъ.
Iэдэбз узхэм зыщяIэзэхэрэ диспансерым Iэзэн IофымкIэ врач шъхьаIэм а лъэхъаным игуадзэщтыгъэу Датхъужъ Фатимэ Аслъан гущыIэ дэхабэ къыфиIуагъ.
— КIэсэбэжъ Аслъан 2006-рэ илъэсым тиIэзапIэ иполиклиническэ отделение къыIухьагъ. Iоф ешIэфэ а кIалэм ылъэныкъокIэ зы дао къытахьылIагъэп. Ащ сымаджэхэм екIолIэкIэ гъэнэфагъэ сыдигъуи къафигъотыщтыгъ. Iэзэным дакIоу, гущыIэ дахэр ары сымаджэм ищыкIагъэр. Ар зэрэщымыIэжьыр зэ­хэзыхыгъэр къытфэтхьаусыхэнхэу, агу лъэшэу зэрэхэкIырэр къытаIонэу къытфэкIуагъэх. Ас­лъан гъэсагъэу, адыгагъэр, цIыфыгъэр хэлъэу щытыгъ. ЕгъашIи ымакъэ Iэтыгъэу гущы­Iагъэп. Сыд фэдэрэ IофшIэн фэбгъэзагъэми, «хьау» гущыIэ къыIуагъэп. ИIэпэIэсэныгъэкIэ ныбжьыкIэу къакIохэрэм адэ­гощагъ. IофшIэным дакIоу мэфэкI мафэхэми тызэхахьэу хъу­щтыгъ. Ащ фэдэми Аслъан зэкIэми адыригъаштэщтыгъ. Ты дэгъу дэдэу зэрэщытыгъэми
щэч хэлъэп. ИсабыитIумэ ащыгушIукIэу зэпымыоу ягугъу къы­шIыщтыгъ, ясурэтхэр къытигъэ­лъэгъущтыгъ, якъэбархэр къытфиIуатэщтыгъ. Сыд фэдэрэ лъэ­ныкъокIи ар шIукIэ тыгу къи­нагъ, чIэнэгъэшхо тфэхъугъ.
Къушъхьэ Светлан,
Адыгэ республикэ клиниче­скэ сымэ­джэ­щым нэхэм зыщяIазэхэрэ отделением иврач:
— Лъытэныгъэ ин зыфэтшIыщтыгъэ КIэсэбэжъ Аслъан къы­зэрэтхэмытыжьыр лъэшэу тыгу къео, къин къытщэхъу. ТызэдеджагъэхэмкIэ тызэIукIэ къэс ренэу игугъу дахэкIэ, шIукIэ тэшIы. ЦIыф хьалэлэу, бэрэчэтэу, ренэу ынэгу щхыпэр кIэлъэу, гущыIэгъу къызыпфэхъукIэ гур къыдищаеу, къыпщыгушIукIэу, гущыIэ дахэм шъхьамысэу, гукIэгъушхо хэлъэу щы­тыгъ. Аслъан гъэшIэ кIыхьэ мыхъугъэми, цIыфхэм игугъу дахэкIэ ашIэу, иIэпэIэсэныгъэ уасэ фашIэу щытыгъэшъ, ар зымыуасэ щыIэп.
Iэшъынэ Сусан.
Сурэтхэр: унагъом ихъарзынэщ.