Мы ситхыгъэ усэ пIон плъэкIыщтэп, сыда пIомэ усэ тхыным ишапхъэхэр зэкIэ икъу фэдизэу къыдэлъытагъэхэп, ау мыщ дэжьым сэркIэ анахь мэхьанэ зиIэр усэр арэп. Сэ къасIомэ сшIоигъоу, гум къиIукIырэ гупшысэхэр тхьапэм зэрезгъэкIущтхэр ары сызыпылъыгъэр.

Сятэш лъапIэу Аслъан!
Непэ укъызщыхъугъэ маф!
Упсаоу мы дунай дахэм
утетыгъэмэ,
Илъэс 50 ухъущтыгъ.
ГущыIэхэр щыIэп, Аслъан, —
ГущыIэхэр къэгъотыгъуай,
Тылъэхъу гущыIэм…
Ау гущыIэхэр тIэкIэзых.
Зыгорэм чыжьэу укIуагъ,
УкъэкIожьыщтмэ тIуи,
тыожагъ.
Ау уздэкIуагъэм къэбарэу щыIэр
ПкIыхькIэ къытфэоIуатэ.
Зэ тыгу огъэшъабэ, укъеIазэ,
Зэ тыгу огъэбырсыры, гумэкI тыхэодзэ.
Адэ сыд пшIэн?
Дунаир джары зэрэгъэпсыгъэр.
Зыр къэхъу, бэгъашIэ мэхъу,
Адрэр къэхъу, игъашIэ макIэ,
Ау гъашIэм икIыхьагъэм фэдизэп
ЦIыфыгъэр зэрашырэр —
ЦIыфыгъэ дахэрэ гукIэгъушхорэ
пхэлъыгъ.
Ахэр уиIофшIэн дахэу щыбгъэфедагъэх,
Сымаджэхэм агу
къызэрэдэпщэещтым упылъыгъ.
ЦIыфхэм
уишIуагъэу ябгъэкIыгъэмкIэ,
Непи «тхьауегъэпсэу» къыуаIо,
Ар лъэшэу тигуап.
ЦIыфхэм дахэкIэ агу укъинагъ,
Ар о къэулэжьыгъэ щытхъу.
ЧIыпIэ чыжьэу уздэкIуагъэм,
Зи дэогъу къыщыпфэхъущтэп,
УишIэныгъэрэ уиIэпэIэсэныгъэрэ
Хьалэлэу цIыфхэм адэбгощыгъэшъ.
Сятэш лъапIэу Аслъан,
Тэпсэуфэ тыгу уилъыщт!
КIэсэбэжъ Хьазрэт,
Адыгэ къэралыгъо университетым социальнэ технологиехэмкIэ ыкIи зекIонымкIэ ифакультет ия 3-рэ курс щеджэ.