УФ-м экономикэ хэхъоныгъэмкIэ иминист­рэу Максим Решетниковыр Адыгеим щы­Iагъ, зыгъэпсэфыпIэу «Лэгъонакъэ» зыщашIырэр ыпэрапшIэу къызэпи­плъыхьагъ. АР-м и ЛIышъхьэу КъумпIыл Мурат игъусэу республи­кэмкIэ мэхьанэшхо зиIэ мы про­ектыр зэ­рагъэцакIэрэм тегущыIагъэх. АщкIэ амалэу щыIэхэм Максим Решетни­ковым ягугъу къышIыгъ.

«Республикэм зекIоным псын­кIэу хэхъоныгъэ щешIы. Фе­деральнэ гупчэм ща­штэрэ
унашъохэр зэрагъэца­кIэхэрэм ар къегъэлъагъо. Зы лъэны­къомкIэ, республикэм ипащэхэм чанэу проектышхохэр ­пхыращых. Ащ фэд Лэ­гъо-На­къэ щагъэпсырэ зыгъэпсэфыпIэр. Гъогухэм яшIын, инфраструктурэм, энергетикэм мылъку ахилъхьэзэ, Адыгеим мы проектыр теубытагъэ хэ­лъэу пхырещы. Президентым пшъэ­рылъ къызэрэфишIыгъэм тетэу федеральнэ правительствэм IэпыIэгъоу къыритырэр инвесторым къызыфегъэфедэ. НэмыкI лъэныкъомкIи, бизнес цIыкIумрэ гурытымрэ мыщ зыщаушъомбгъу, модульнэ хьа­кIэщхэр зэрагъэпсырэм къы­хэкIэу зекIоу Адыгеим къи­хьэхэрэр нахьыбэ мэхъу. Мы чIыпIэр дэгъоу зыщагъэпсэфыным тегъэпсыхьагъ — кIымафэрэ жэ­хэм арысхэу къа­чъы­хьан, гъэмафэрэ зекIо кIон­хэ, квад­роциклэхэр къызфагъэфедэн, раф­тингым пы­лъынхэ алъэкIыщт. ЗекIоныр Адыгеим хэхъоныгъэ езыгъэшIыщт лъэныкъохэм зэу ащыщ», — къы­Iуагъ Максим Решетниковым.
ЗыгъэпсэфыпIэу «Лэгъона­къэм» ипроект агъэцакIэ зы­хъукIэ чIыопсым фэсакъынхэ, лъэгъупхъэ чIыпIэхэр зытетыгъэм тетэу къызэтегъэнэжьыгъэнхэ зэрэфаер АР-м и ЛIышъхьэ къыхигъэщыгъ.
Тыкъэзыуцухьэрэ дунаим нахь макIэу зэрар рахызэ, ­инфраструктурэр агъэпсыщт. Псэуалъэхэр лъэшэу къамы­гъэ­гъунэрэ чIыопс чIыпIэхэм аща­шIыщтых.

ЗыгъэпсэфыпIэм игупчэ шъхьа­Iэу хъущтыр Верхняя деревня зыфаIоу хьакIэщхэр зыщагъэпсыщтхэр ары. Джащ фэдэу мы чIыпIэм тучанхэр, кафехэр, шхапIэхэр, фэIо-фа­шIэхэр зыщагъэцэкIэщт псэуа­лъэр, паркингхэр щашIыщтых.
Шъугу къэтэгъэкIыжьы зыгъэ­псэфыпIэм илъэс реным Iоф зэришIэщтыр. КIымафэрэ лъэ­рычъэкIэ мыщ къыщачъыхьащт, гъэмафэрэ рекреационнэ, экологическэ зекIоным зырагъэу­шъомбгъущт. ЗекIохэр бэу ащ къеолIэнхэу мэгугъэх.
«Лэгъонакъэ» номер мини 2,5-рэ зыхэтыщт хьакIэщхэр щашIыщтых, лъэрычъэкIэ къызщачъыхьан алъэкIыщт гъогу километрэ 35-рэ фэдиз, кIа­псэ­кIэ кIэшIэгъэ гъогуи 10 агъэ­псыщтых.
ПстэумкIи сомэ миллиард 60 фэдиз хъурэ инвестициехэр къыхалъхьащтых. Лъэпкъ проектым диштэу псэуалъэм иинфраструктурэ игъэпсын сомэ миллиарди 10,3-рэ пэIухьащт.
Чэзыу-чэзыоу зыгъэпсэфыпIэр агъэпсыщт. Апэрэ чэзыум инфраструктурэр, етIанэ номер 644-рэ зыхэтыщт хьакIэщхэр, кIапсэкIэ кIэшIэгъэ гъогуи 5, лыжэкIэ ыкIи сноубордкIэ къызыщачъыхьащт гъогу километрэ 20 агъэпсыщт. 2025-рэ илъэсым инвесторым псэуалъэхэм яшIын ригъэжьэнэу рехъухьэ. Джыдэ­дэм пэшIорыгъэшъ IофшIэнхэр, къэралыгъо экспертизэр зэхащэх. Республикэм ихэбзэ къулыкъухэр транспорт, инженер инфраструктурэм изегъэушъомбгъун ыуж итых. Газрэ электроэнергиерэ къэзытыщт псэуа­лъэхэм яшIын зэрэкIорэми зэ­хэсыгъом щытегущыIагъэх. Джащ фэдэу Лэгъо-Накъэ екIо­лIэрэ гъогум изы Iахь игъэ­кIэ­жьын гъэрекIо аухыгъ. Къэралыгъо IэпыIэгъу къыратыным пае инвесторыр къэралыгъо программэхэм ахэлэжьэнымкIэ амалэу щыIэхэр зэрагъэшIагъэх.

Инвесторым зыгъэпсэфыпIэм ипроект иэскизхэр ыгъэхьазырыгъэх. Апэрэ чэзыум джырэ шапхъэхэм адиштэрэ хьакIэщхэр мыщ щагъэпсыщтых. ЫужкIэ комплексым нахь зырагъэу­шъомбгъущт. Псэуалъэхэм зы архитектурэ теплъэ яIэн, ты­къэ­зыуцухьэрэ дунаим фэса­къы­гъэн, лъэпкъ нэшанэхэр гъэфедэгъэнхэ зэрэфаер АР-м и ЛIышъхьэ хигъэунэфыкIыгъ.
«Проектыр пхыращэу зырагъажьэкIэ, республикэм фэди­тIукIэ нахьыбэу зекIохэр къи­­хьанхэу, IофшIэпIэ чIыпIэкIэ мини 2-м ехъу зэхащэнэу тэгу­гъэ. Инфраструктурэм нахь зызырагъэушъомбгъукIэ, зекIонми, нэмыкI лъэныкъохэми хэ­хъо­ныгъэ ин ашIын алъэкIыщт, Адыгеим иэкономикэ зэхъокIыныгъэшхо фэхъущт. Ащ ыпкъ къикIэу ВРП-ми зыкъиIэтыщт», — къыIуагъ Адыгеим и ЛIы­шъхьэ.
УФ-м экономикэ хэхъоны­гъэмкIэ иминистрэу Максим Решетниковым нэмыкI проектышхоми нэIуасэ зыфишIыгъ. Станицэу Дахъо къыпэблэгъэ ДжэгокIо гъэхъунэу рекреационнэ парк зыщагъэпсыщтым ар щыIагъ. ЗекIохэм, кушъхьэфа­чъэхэм атесхэм атегъэпсыхьэгъэ гъогухэр, шхапIэхэр мыщ щашIынхэу рахъухьэ. Адыгеим и ЛIышъхьэ инфраструктурэр зэрагъэпсырэм къытегущыIагъ. Джыдэдэм автомобиль гъогоу «Дахъо — ДжэгокIо гъэхъун» зыфиIорэр, газымрэ электроэнергиемрэ къэзытыщт псэуа­лъэхэр ашIых. Ащ ыпэкIэ архео­логическэ ушэтынхэр зэхащэх. ЗекIохэр бэу мы чIыпIэм къызэрэкIощтхэр непэ къэтIон тлъэ­кIыщт.

«Мыщ фэдэ паркыр зекIоныр зикIасэхэм якIопIэ шъыпкъэ хъущт. Адыгэ къуаем ифестивали, цIыфхэр жъугъэу зыхэлэжьэщт нэмыкI Iофтхьабзэхэри мыщ щызэхэтщэнхэ тимурад», — къыIуагъ АР-м и ЛIышъхьэ.
КъумпIыл Мурат Максим Решетниковым зэрэфэразэр риIуагъ зекIоным изегъэушъомбгъункIи, инфраструктурэм игъэпсынкIи IэпыIэгъу къызэрафэхъурэм фэшI. А пстэуми инвесторхэм амалыкIэхэр къараты зекIоным республикэм икъушъхьэлъэ чIыпIэхэм хэхъо­ныгъэ щягъэшIыгъэнымкIэ, чIы­пIэ­рысхэм ящыIэкIэ-псэукIэ зы­къегъэIэтыгъэнымкIэ.
Хэгъэгум и Президенти, Урысыем и Правительстви, УФ-м экономикэ хэхъоныгъэмкIэ и Министерстви, пшъхьэкIэ ори, Максим Геннадий ыкъом, «тхьа­шъуегъэпсэу» шъосэIо ренэу Адыгеим IэпыIэгъу шъукъызэ­рэфэхъурэм фэшI. Тиреспубликэ федеральнэ гупчэр кIэщакIо зыфэхъурэ проект пстэуми ахэлажьэ. ЫпэкIэ зэрэщытыгъэм фэдэу ипIалъэм Iоф­тхьэбзэ пстэури дгъэцэкIэнхэу шъутэгъэгугъэ», — къыIуагъ КъумпIыл Мурат.
Проектхэм къадыригъэштагъ
УФ-м экономикэ хэхъоны­гъэмкIэ иминистрэу Максим Решетниковым АР-м и ЛIышъхьэу КъумпIыл Мурат игъусэу зекIонымкIэ бизнесым илIыкIохэм, лъэпкъ проектэу «ЗекIонымрэ хьэкIэ пэгъокIынымрэ» пхырыщыгъэнымкIэ Iофыгъоу къэуцухэрэм афэгъэзэгъэ общественнэ объединениехэм япащэхэм, республикэм зекIоным зыщегъэушъомбгъугъэнымкIэ проектышхохэм афэгъэзагъэхэм зэIукIэгъу адыряIагъ.
Республикэм икъушъхьэлъэ чIыпIэхэм ахэм язэдэгущыIэгъу щыкIуагъ.
АР-м и ЛIышъхьэ ынаIэ къы­зэратыригъэтырэм ыкIи Iэпы­Iэгъу къызэрафэхъурэм апае Максим Решетниковым зэрэ­фэразэр къыхигъэщыгъ. Рес­публикэм ибизнес цIыкIурэ гурытымрэ нахьыбэу инвестициехэр зекIонымкIэ проектхэм ахалъхьэ хъугъэ, хьакIэщхэм язытет нахьышIу шIыгъэным, зызгъэпсэфхэрэм рэхьатэу, щынэгъончъэу яуахътэ агъэкIоным нахь пылъхэ хъугъэ.
«НепэкIэ зекIоным илъэныкъо зэфэшъхьафхэм Iоф адэтэшIэ, къоджэ зекIонкIэ заджэхэрэми нахь зеушъомбгъу. ГущыIэм пае, мы аужырэ илъэситIум тыкъэзыуцухьэрэ дунаир ыкIи тишъо­лъыр ичIыпIэ дахэхэр зэзыгъэлъэгъу зышIоигъоу Адыгеим къихьэрэр проценти 10-кIэ нахьыбэ хъугъэ. ЗагъэпсэфынымкIэ лъэныкъо зэфэшъхьафхэри къыдэтэлъытэх, санаторнэ-зыгъэпсэфыпIэ фэIо-фашIэхэм нахь зядгъэушъомбгъущт. Илъэс къэс нэбгырэ мил­лионныкъом нахь мыма-
кIэу загъэпсэфынэу тишъолъыр къэ­кIох. ИлъэсыкIэ мэфэкIхэм язакъоу нэбгырэ мини 100 фэдиз къэкIогъагъ. ЗекIонымкIэ амалэу тиIэхэм джыри нахь зызэрядгъэушъомбгъущтым тынаIэ тапэкIи тедгъэтыщт», — къыIуагъ Адыгеим и ЛIышъхьэ.
Министрэу Максим Решет­никовым къэралыгъо IэпыIэгъумкIэ Iофтхьабзэу зэрахьэхэрэм афэгъэхьыгъэу къыIотагъ. ­Адыгеир чанэу хэлажьэ лъэпкъ проектэу «ЗекIонымрэ хьэкIэ пэгъокIынымрэ» зыфиIорэм. АР-м и ЛIышъхьэу КъумпIыл Мурат къызэрэхигъэщыгъэмкIэ, федеральнэ гупчэм IэпыIэгъумкIэ амалэу ыгъэфедэхэрэр зэкIэ зищыкIэгъэ лъэныкъохэм апэIугъэхьагъэ хъуным республикэм анаIэ щытырагъэты. ГущыIэм пае, 2023-рэ илъэсым Адыгеим къикIыгъэ проекти 8-мэ Урысыем экономикэ хэхъоныгъэмкIэ и Министерствэ къадыригъэ­штагъ. Ахэм сомэ миллиони 156,5-рэ фэдиз апэIухьащт. 2024-рэ илъэсым ыкIэм ехъулIэу номери 122-рэ къызфа­гъэфедэн амал щыIэ хъущт.
«ЗекIоным хэхъоныгъэ егъэшIыгъэным Адыгеим лъэшэу анаIэ щытырагъэты. НепэкIэ проект гъэшIэгъон дэдэхэм шъуадэлажьэ. Ахэр зэкIэ гъэцэ­кIагъэ хъунхэм мэхьанэшхо иI. ЗекIоу къихьэхэрэм япчъагъэ нахьыбэ хъунымкIэ ащ ишIуагъэ къызэрэкIощтым имызакъоу, къэралыгъо IэпыIэгъумкIэ Iоф­тхьабзэхэм ягъэфедэн епхыгъэ амалыкIэхэри республикэм къы­фызэIуихыщтых», — къы­Iуагъ Максим Решетниковым.
ЗекIоным ылъэныкъокIэ бизнес-проектхэм язэшIохынкIэ IофшIэкIэшIоу аIэкIэлъ хъугъэм фэгъэхьыгъэу предпринимательхэм къаIотагъ. IэкIоцI зекIоным чанэу зызэриушъомбгъурэм къыхэкIэу цIыфхэми языгъэ­псэфыгъо уахътэ нахь тэрэзэу зэхэщагъэ зэрэхъущтым анаIэ зэрэтырагъэтырэр, зекIонымкIэ Iофтхьабзэхэр зэкIэ нахьышIоу, акъылыгъэ хэлъэу зэрэпхы­ра­щыщтхэм зэрэдэлажьэхэрэр къы­хигъэщыгъ АР-м и ЛIышъхьэ.
КIэлэеджакIохэми зекIонымкIэ амалхэр ягъэгъотыгъэнхэм фэгъэхьыгъэ программэри мэлажьэ. Мары илъэситIу фэдиз хъугъэу республикэм ирайон зэфэшъхьафхэм къарыкIырэ кIэ­лэ­цIыкIухэм къушъхьэхэм язы­гъэпсэфыгъо мафэ щагъакIо.
Джащ фэдэу гугъэпIэ инхэр зэрапхырэ проектри аублагъ: зекIо мэшIокоу «Жемчужина Кавказа» зыфиIорэм игъогу Адыгеири къыхиубытагъ. Мыщ бэмэ ашIогъэшIэгъонэу анаIэ къытырадзагъ. ИлъэситIоу икIыгъэм къыкIоцI республикэм зе­кIо 6500-м ехъу къэкIогъагъ. Мы илъэсми ащ фэдэ Iофтхьабзэр лъагъэкIотэщт.
«Мыщ фэдэ проектхэм шIуа­гъэу къатырэр нэрылъэгъу — зызыгъэпсэфы зышIоигъохэм ямурад къадэхъуным пае тэри тфэлъэкIыщтыр тшIэщт. МыщкIэ социальнэ-культурнэ лъэныкъоми мэхьанэшхо иI. ТичIыопс идэхагъэ, тикультурэ, Адыгеим дэ­гъоу зыщыбгъэпсэфын зэрэплъэкIыщтыр нафэ къафэхъуным пае тэри къыттефэрэр зэ­кIэ тшIэн фае», — къыIуагъ КъумпIыл Мурат.
ЗекIо проектыкIэхэм япхырыщын республикэм ифедэ зэрэхэлъыр Адыгеим и ЛIышъхьэ къыIуагъ. КъумпIыл Мурат къызэрэхигъэщыгъэмкIэ, шэпхъэ инхэм тарыгъуазэзэ, Урысыем и Президент къыгъэуцугъэ пшъэ­рылъхэм язэшIохын тиIахь хэтшIыхьан тлъэкIыщт.
Максим Решетниковым предпринимательхэм заIокIэм яуп­чIэхэм джэуапхэр аритыжьхэзэ къызэрэхигъэщыгъэмкIэ, гухэлъ­хэр гъэцэкIагъэ хъунхэм пае зишIуагъэ къэкIощтхэм ащыщ лъэпкъ проектэу «ЗекIонымрэ хьэкIэ пэгъокIынымрэ» зыфи­Iорэр. Министрэм респуб­ликэм игъо къыфилъэгъугъ нахь чанэу ащ хэлэжьэнхэу. Культурэ кIэным икъэухъумэн иIофыгъохэми ахэр атегущыIагъэх.
«ЗекIоным зиушъомбгъунымкIэ пшъэрылъышхохэр зэшIохыгъэн фае. Президентым бэмышIэу къыгъэнэфэгъагъэх а лъэныкъомкIэ шIэгъэн фаехэр. Владимир Путиным къызэрэ­хигъэщыгъэмкIэ, тихэгъэгушхо цIыфхэм къыщакIухьаным непэкIэ мэхьанэшхо иI. Ащ пае къэралыгъом амалхэр къетых, къэралыгъо IэпыIэгъумкIи Iоф­тхьэбзэ гъэнэфагъэхэр зэшIуе­хых», — къыхигъэщыгъ Максим Решетниковым.
Ащ дакIоу министрэм анаIэ тыраригъэдзагъ чIыпIэ товархэр къыдэзыгъэкIыхэрэм IэпыIэгъу ятыгъэн зэрэфаем. Республикэм анаIэ нахь къытырадзэнымкIи мэхьанэшхо иI шъолъырым ыцIэ чыжьэу зыгъэIурэ пкъыгъохэу къыдагъэкIыхэрэр нахьыбэ шIыгъэным. Джащ фэдэу министрэм пшъэрылъ къафишIыгъ хэгъэгум и Президент игъоу ылъэгъугъэ лъэпкъ проектыкIэхэм чанэу ахэлэжьэнхэу.
«Илъэс псаум зызщагъэпсэфын алъэкIыщт чIыпIэ цIэрыIоу хэгъэгумкIэ Адыгеир хъуным пае лъэпсэкъэкIуапIэхэр зэкIэ щыIэх. Адыгеим шIуагъэу иIэхэр амал зэриIэкIэ нахь дэгъоу дгъэфедэнхэр ары пшъэрылъэу тиIэр. Арышъ, инвестиционнэ проектхэм адедгъэштэщт, зекIонымкIэ бизнесым хэхъоныгъэ ышIыным пае амалхэр едгъэгъотыщтых. ПрограммакIэхэмрэ лъэпкъ проектхэмрэ яшIогъэ­шхо къэкIощт республикэм зе­кIоным нахь зыщиушъомбгъунымкIэ», — къыхигъэщыгъ КъумпIыл Мурат.

Адыгеим экономикэмкIэ илъэкIхэр
Тишъолъыр мы лъэныкъомкIэ гъэхъагъэу ышIыгъэхэр, пшъэ-­рылъэу иIэхэр ыкIи лъэгапIэу зынэсышъущтхэр щызэхафыгъэх Максим Решетниковымрэ Къум­пIыл Муратрэ яIофшIэгъу зэIу­кIэгъу.
Максим Решетниковым къы­Iуагъ экономическэ къэгъэлъэгъоныбэкIэ Адыгеим хэхъоныгъэхэр зэриIэхэр. Ахэм ащыщых промышленнэ къыдэгъэкIыжьыныр ыкIи мэкъу-мэщыр, инвестицие хэхъоныгъэхэр ыкIи зе­кIоныр, ау непэкIэ пшъэрылъ шъхьаIэр — проект анахь инхэр пхырыщыгъэнхэм лъыпыдзэ­жьыгъэныр, инфраструктурэу ящыкIагъэр игъэкъугъэным пае къэралыгъо IэпыIэгъур федэ къытэу гъэфедэгъэныр. Ащ фэ­IорышIэщтых УФ-м и Президент шъолъырымкIи зишIуагъэ къэ­кIощт унашъоу ышIыгъэхэр — унэе программэм илъыгъэкIо­тэн, Азовэ-ХышIуцIэ кластерым исоциальнэ-экономическэ хэхъоныгъэкIэ проектым ипхырыщын.
«Адыгеим мыр сиапэрэ къэ­кIогъу, сыгу рихьыгъ. Респуб­ликэм, зы псы гъуаткIом фэдэу, федеральнэ ихъухьэгъэ пстэури, федеральнэ къэралыгъо IэпыIэгъухэр зэкIэ иолъагъох. СатыушIхэм тазыIокIэм, ахэм тащытегущыIагъ ыкIи мэхьэнэ ин зиIэ Iофыгъохэу ащ къыщаIэ­тыгъэхэм тахэплъэщт, унэшъо гъэнэфагъэхэр тшIыщтых», — къыIуагъ Максим Решетни­ковым.
Адыгеим и ЛIышъхьэ УФ-м экономикэ хэхъоныгъэмкIэ ими­нистрэ рэзэныгъэ гущыIэхэр фигъэзагъэх IэпыIэгъум пае ыкIи къыхигъэщыгъ къэралы­гъом и Президентэу Владимир Путиным къыгъэуцугъэ пшъэ­рылъ пстэури шъолъырым шIуа­гъэ къытэу щагъэцэкIэным зэ­рэщыпылъхэр Адыгеим хэхъоныгъэ ышIыным пае. Урысыем и Правительствэ, экономикэ хэхъоныгъэмкIэ и Министерствэ яIэпыIэгъу ишIуагъэкIэ Адыгеим Iофыгъуабэ зэрэщызэшIуахырэм ащ къыкIигъэт­хъыгъ.
Шъугу къэдгъэкIыжьын, шъо­лъыр экономикэм ихэхъоныгъэ икIыгъэ илъэсымкIэ проценти 105-рэ хъунэу къалъытэ, промышленнэ къыдэгъэкIыжьыныр — проценти 106,1-рэ. ИнвестициехэмкIэ пчъагъэр, икIыгъэ илъэсым ипэшIорыгъэшъ зэфэ­хьысыжьхэмкIэ, сомэ миллиард 61,6-рэ, процентымкIэ 122,4-рэ. ИкIыгъэ илъэсым лъэпкъ проектхэмрэ къэралыгъо программэхэмрэ къадыхэлъытагъэхэм сомэ миллиард 26,4-рэ апэIуагъэхьагъ. Объект 88-рэ ашIыгъ ыкIи агъэцэкIэжьыгъ инженер псэуалъэхэри зэрахэтхэу. Мы илъэсым объект 62-мэ Iоф­шIэнхэр ащэкIох. Предприни­мательствэм ихэхъоныгъэкIэ амал тедзэхэр къытыгъэх ­лъэпкъ про­ектэу «Предпринимательствэ цIыкIумрэ гурытымрэ ыкIи сатыушIхэм ягу­къэкIхэм адегъэштэгъэныр» зы­фиIорэм. 2019-рэ илъэсым къыщыублагъэу лъэпкъ проектымкIэ агъэфедагъэр сомэ миллиард 1,5-рэ.
«Мы лъэпкъ проектым ипхырыщын шъолъырым ихэхъоныгъэкIэ Iофэу зэшIотхыхэрэм ахэгъэщагъэу щыт. Къэралы­гъом и Правительствэ ишIуагъэкIэ экономикэмрэ социальнэ лъэныкъомрэ ахэгъэхъогъэнымкIэ тиамалхэм заушъомбгъу», — къыIуагъ КъумпIыл Мурат.
ЗекIоным ылъэныкъокIэ гу­хэлъхэр джащ фэдэу зэдэгущыIэгъум къыщаIэтыгъэх. Министрэм къызэриIуагъэмкIэ, зекIоныр — Адыгеим хэхъоныгъэ ышIынымкIэ иамал дэгъу, ау ащ нэмыкI лъэкIхэри щыIэх. Республикэм чIыпIэ къыдэгъэ­кIыжьыным, гъомылэпхъэшIыным, шъолъыр брендхэм зыщаушъомбгъу.
АР-м исоциальнэ-экономикэ хэхъоныгъэкIэ унэе программэм мэхьанэшхо иI. Ащ ишIуагъэкIэ бэшIагъэу къэтэджыгъэгъэ инфраструктурнэ гумэкIыгъохэр дэгъэзыжьыгъэ хъугъэх, шъо­лъыр экономикэм IэпыIэгъу егъэгъотыгъэнымкIэ щыIэ амал­хэм ахигъэхъуагъ.
Адыгеим и ЛIышъхьэ къыкIигъэтхъыгъ Президентым программэм иIофшIэн джыри илъэ­си 6-кIэ зэрэлъигъэкIотагъэм имэхьанэ, сыда зыпIокIэ шъо­лъырым инвестициехэр къе­щэлIэгъэнхэмкIэ, ащ щыпсэу­хэрэм ящыIакIэ зыкъиIэтынымкIэ, республикэм тхьамыкIэу щыпсэухэрэр нахь макIэ шIыгъэнхэмкIэ ащ ишIогъэшхо къэ­кIо. Джащ фэдэу республикэм ихэкIыпIэхэр инвестпроект шъхьаIэхэм ащызэхеубытэх. Ахэм ащыщ промпаркэу «Инэм» зыфиIорэр. Ар затIупщыкIэ, IофшIэпIэ чIыпIэ мини 10-м ехъу къытыщт. Ащ къихьащтхэм джырэ уахътэм адэлажьэх. ГъэфэбапIэхэм апае псэуалъэхэр, медицинэ Iэмэ-псымэхэр, шхыныгъо ныкъошIхэр къыдэзы­гъэ­кIыхэрэр къыдэуцонхэу хьа­зырых. ЗэкIэми апэ къихьагъэр «ОЗОН-р» ары. Адыгеим ащ джы Iоф щешIэ.
«Программэм къытырэ амал­хэр республикэм акъыл хэлъэу ыгъэфедагъэх. Зы лъэныкъомкIэ, мылъкум ызыплIанэ социальнэ проектхэм апэIухьагъ, ахэр шIуагъэ къатэу пхыра­щыгъэх. Гъогухэм ахалъхьагъэр бэ. Акъылыгъэ хэлъэу пстэури зэрахьылIэжьыгъ. Дэгъоу зе­кIуагъэх, хэхъоныгъэ щыI, командэ дэгъу, шIуагъэ къытэу Iоф зэдашIэ, зэIофшIэгъухэм къагурэIо IэпыIэгъум икъэкIопIэ пстэури, дэгъоу ар агъэфедэ», — къыIуагъ Максим Решет­никовым.
КъэкIогъум изэфэхьысыжь­хэмкIэ пшъэрылъ гъэнэфагъэхэр зэрашIыщтхэр министрэм къыхигъэщыгъ. ГущыIэм пае, лъэсрыкIо гъогууанэхэм, зы­гъэпсэфыпIэ-зыгъэхъужьыпIэхэу псауныгъэм икъэухъумэнрэ зе­кIонымрэ япхыгъэхэм яхэ­хъо­ныгъэ, лъэпкъ проектым къы­химыубытэу предприни­матель­ствэ цIыкIумрэ гурытымрэ Iэ­пыIэгъу зэрагъотыщтым, зы­гъэпсэфыпIэу «Лэгъонакъэ» иинфраструктурэ зэтегъэпсы­хьэ­­гъэнымкIэ тапэкIэ шъолъы­рым IэпыIэгъоу ыгъотыщтым ахэр афэгъэхьыгъэх.
«Президентым, къэралыгъом и Правительствэ, ори, Максим Геннадий ыкъом, тышъуфэраз мы проектым республикэр зэрэхэжъугъэхьагъэм ыкIи тигу­къэкIхэм зэкIэми къазэрэде­жъугъаштэрэм апае. Тицыхьэ телъ зыгъэпсэфыпIэ зэхэтым игъэпсын шъолъыр экономикэм ихэхъоныгъэкIэ ыкIи Адыгеим иинфраструктурэ игъэкIэжьынкIэ ишIогъэшхо къызэрэкIощтым», — къыIуагъ КъумпIыл Мурат.
АР-м и ЛIышъхьэ ипресс-къулыкъу
Сурэтхэр: А. Гусев.