МедалитIу къахьыгъ
Урым-рим бэнэнымкIэ Къыблэ федеральнэ шъолъырым изэнэкъокъу къалэу Ростов-на-Дону щыкIуагъ. Зыныбжь илъэс 24-м шIомыкIыгъэхэр ащ хэлэжьагъэх.
Хабзэ зэрэхъугъэу, Адыгэ Республикэм испортсменхэм гъэхъэгъэшIухэр ашIыгъэх, бэнэным ылъэныкъокIэ сыдигъуи къазэрахэщыхэрэр, анахь дэгъухэм зэращыщхэр джыри зэ къагъэшъыпкъэжьыгъ.
Тишъолъыр къэзыгъэлъэгъуагъэхэр Тэхъутэмыкъое районым ибэнакIохэр ары. Килограмм 55-м нэс къэзыщэчыхэрэм якуп хэтыгъэ ЦIэIогъошIу Дамир тыжьын медаль къыдихыгъ, килограмм 72-рэ къэзыщэчыхэрэм якуп зыщызыушэтыгъэ Шъоумыз Юрэ ящэнэрэ чIыпIэр къыфагъэшъошагъ.
Тиспортсменхэм ыкIи ахэм ятренерхэм тафэгушIо, тапэкIи мыщ фэдэ гъэхъэгъэшIухэр ашIынхэу, джыри нахь лъэгэпIэ инхэм анэсынхэу, республикэм ыцIэ рарагъэIонэу афэтэIо.