Мыгъэрэ гъэтхэ дзэ дэщыгъоу къэблагъэрэм изэхэщэн, федеральнэ гупчэм къыгъэуцурэ пшъэрылъхэр гъэцэкIэгъэнхэмкIэ шIэгъэн фае­хэм ыкIи 2023-рэ илъэсым бжыхьэ дзэ дэщы­гъор зэрэрекIокIыгъэм зыщатегущыIэгъэхэ зэ­хэсыгъо АР-м и Правительствэ зычIэт унэм щыкIуагъ.

Iофтхьабзэм хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, АР-м и ЛIышъхьэрэ министрэ­хэм я Кабинетрэ я Администрацие ипащэу Владимир Свеженец, министрэхэр, муниципальнэ образованиехэм япащэхэр, рес­публикэ ыкIи район дзэ ко­миссариатхэм якъулыкъушIэ­хэр.
Владимир Свеженец зэхэсыгъор къызэIуихызэ, 2024-рэ илъэсым мэлылъфэгъум и 1-м рагъэжьэщт гъэтхэ дзэ дэщыгъо кампанием ипшъэрылъ шъхьа­Iэхэр гъэцэкIэгъэнхэм мэхьанэшхо зэриIэр къыхигъэщыгъ, ащ фэгъэзэгъэ пстэуми акIуачIэ рахьылIэнэу къыIуагъ. Зэрагъэ­нэфагъэмкIэ, гъэтхэ дзэ дэщыгъом къыхиубытэу УФ-м и УIэшыгъэ КIуачIэхэм къулыкъур ащызыхьыщт ныбжьыкIэ нэбгырэ 550-рэ фэдиз Адыгеим икIыщт.
— Ыпэрэ илъэсхэм афэдэу къэблэгъэрэ дзэ дэщыгъор зэрифэшъуа­шэу редгъэкIокIын фае. Мыщ къэралыгъомкIэ мэхьанэшхо зэриIэр, гражданскэ пшъэдэ­кIыжьэу ащкIэ ныбжьыкIэхэм яIэр къагурыIон фае, — къыIуагъ Владимир Свеженец.
2023-рэ илъэсым ибжыхьэ дзэ дэщыгъо зэрэкIуагъэм фэгъэхьыгъэу АР-м идзэ комиссариат ипащэу Александр Аве­риныр къэгущыIагъ. Ащ къызэриIуагъэмкIэ, блэкIыгъэ бжыхьэ дзэ дэщыгъом аныбжьыкIэ къу­лыкъу ахьынэу зытефэрэ нэбгырэ 2400-м ехъу чIыпIэ комиссариатхэм къякIолIэгъагъ. ИкIыгъэ илъэсым ибжыхьэ нэбгырэ 400 фэдиз Урысыем и УIэшыгъэ КIуачIэхэм къулыкъу ащахьынэу ащагъ. АщкIэ Адыгеим пшъэрылъыр ыгъэцэкIагъ.
— Дзэ дэщыгъор комиссариатым иIофшIэн анахь шъхьаIэхэм ащыщ. Арышъ, цIыфхэмрэ военкоматымрэ азыфагу зэгурымыIоныгъэ къимыхьэу, хэбзэукъоныгъэхэр хэмыхъухьэхэу а кампаниер зэхэщэгъэным мэхьанэ иI. Районхэм ащыIэ комиссиехэм мы бжыхьэ дзэ дэщыгъом дэгъоу Iоф ашIагъ. Пшъэрылъэу афагъэуцугъэр нахьыбэу зыщагъэцэкIагъэхэр Красногвардейскэ, Теуцожь ыкIи Мыекъопэ районхэр ары, — хигъэунэфыкIыгъ дзэ комиссар шъхьаIэм.
Александр Авериным къызэриIуагъэмкIэ, дзэ-учетнэ сэнэ­хьатхэмкIэ Урысыем и ДОСААФ игъэсэныгъэ организациехэм нэбгырэ 50-м ехъу къагъэхьазырыгъ. АщкIэ Къыблэ дзэ округым къафигъэуцугъэ пшъэрылъыр проценти 100-м нэсэу гъэцэкIагъэ хъугъэ.
Мы илъэсым игъэтхэ дзэ дэщыгъо къыхиубытэхэу медицинэ уплъэкIунхэр зыкIугъэхэм ащыщэу зипсауныгъэ изытеткIэ къулыкъур зыхьын зылъэкIыщтыр процент 66-рэ фэдиз мэхъу, а пчъагъэм илъэс зэкIэ­лъыкIохэм зэхъокIыныгъэ фэхъу­рэп.
Александр Авериныр къызыщыуцугъэхэм ащыщ дзэ-патриотическэ пIуныгъэр республикэм зэрэщылъагъэкIуатэрэр. Мы лъэныкъом Адыгеим и ЛIышъхьэу КъумпIыл Мурат лъэшэу ынаIэ зэрэтыригъэтырэр зэхэсыгъом щыхагъэунэфыкIыгъ. НыбжьыкIэ армейцэ 7793-рэ мы уахътэм республикэм щатхыгъ. Ахэр зыхэхьэрэ шъолъыр отделениеу — 1, муниципальнэу — 9 ыкIи отряди 145-рэ тиIэх. 2023-рэ илъэсым «Юнармием» исатырхэм республикэмкIэ нэбгырэ 1945-рэ ахэхьагъ, 2024-рэ илъэсым — ныбжьыкIэ 398-рэ.
Дзэ комиссар шъхьаIэм зэ­хэсыгъом хэлажьэхэрэм анаIэ зытыраригъэдзагъэхэм ащыщ бжыхьэ дзэ дэщыгъом илъэ­хъан макъэ зэрамыгъэIушъугъэу зылъыхъухэрэр нэбгыри 157-рэ зэрэхъухэрэр ыкIи ахэр зыдэтхэгъэхэ районхэр.
— Гъэтхэ дзэ дэщыгъоу къэблагъэрэм епхыгъэу дзэм къулыкъу щызыхьынэу ыныбжьыкIэ зытефэрэр нэбгырэ 2900-рэ фэдиз мэхъу, ащ щыщэу 2600-мэ макъэ арагъэIугъ, нэбгырэ 300-мэ ушъхьагъу зэфэшъхьафхэм апкъ къи­кIыкIэ джыри анэсы­гъэхэп.
Нэужым къэгущыIагъэх АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель, псауныгъэр къэухъумэгъэнымкIэ министрэу Мэрэтыкъо Рустем, общественнэ рэхьатныгъэр къэухъумэгъэнымкIэ полицием ипащэ игуадзэу Андрей Федосеевыр, Урысыем и ДОСААФ и Адыгэ шъолъыр къутамэ итхьаматэу Барцо Тимур.
Зэхэсыгъом зэфэхьысыжьхэр фашIызэ, гъэтхэ дзэ дэщыгъоу къэблагъэрэм ипшъэрылъ шъхьа­Iэхэм язэшIохынкIэ анахьэу анаIэ зытырагъэтын фаехэр министрэхэм я Кабинет и Тхьаматэу КIэрэщэ Анзаур къыгъэ­нэфагъэх. Мэлылъфэгъум и 1-р къэмысызэ къулыкъур зыхьынэу зытефэхэрэм янахьыбэм макъэ арагъэIунэу ащ афигъэпытагъ.
— АР-м хэгъэгу кIоцI IофхэмкIэ и Министерствэ илIыкIохэм муниципальнэ образованиехэм япащэхэр ягъусэхэу къулыкъум зыщызыдзыехэрэм нахь пхъашэу алъыхъунхэ, дэщын кампаниер ифэшъуашэм тетэу зэхэщэгъэным ыкIи зыпкъитыныгъэ хэлъэу рекIокIыным муниципальнэ образованиехэм япащэхэм яIахьышIу халъхьан фае, — къыхигъэщыгъ КIэрэщэ Анзаур.
Iэшъынэ Сусан.
Сурэтыр: А. Лаутеншлегер