Психикэм ылъэныкъокIэ цIыфхэм япсауныгъэ изытет ыкIи психосоциальнэ Iэзэным фэгъэхьыгъэ Iэнэ хъурае Мыекъуапэ щыкIуагъ.

Iофтхьабзэр зиакъылкIэ щыкIагъэ зиIэ цIыфхэм реабилитацие ягъэкIугъэнымкIэ программэхэм яя 9-рэ фестивалэу «Другие?» зыфиIорэм изыфэгъэхьазырын къыдыхэлъытагъ.
Iэнэ хъураем хэлэжьагъэх Адыгэ Республикэм псауныгъэр къэухъумэгъэнымкIэ, IофшIэнымкIэ ыкIи социальнэ хэхъоныгъэмкIэ иминистерствэхэм, иакъылкIэ щыкIагъэ зиIэ цIыф­хэм реабилитацие арагъэкIуным ылъэныкъокIэ лэжьэрэ мысатыу социальнэ организациехэм ялIы­кIохэр.
Псауныгъэр къэухъумэгъэнымкIэ министрэм игуадзэу Максим Коробко Iофтхьабзэр къызэIуихызэ, Iофыгъоу зыфызэрэугъоигъэхэм зэрэдунаеу зэрэщытегущыIэхэрэр, мыщ фэдэ сымаджэхэм япчъагъэ Урысыеми, Адыгеими зэращыхахъорэр къыхигъэщыгъ.
— Мы лъэныкъомкIэ анахь шъхьаIэр купэу зигугъу тшIырэм хэхьэрэ сымаджэхэм узэIэзэн плъэкIыщт узэу яIэр хэмыужъы­ныхьэзэ язекIокIэ-шIыкIэхэр зыпкъ итыным Iоф дэтшIэныр ары. ЩыкIагъэу яIэм елъытыгъэу игъом зэхэубытэгъэ IэпыIэгъур ядгъэгъотыным ткIуачIэ етхьылIэн фае. Мы сымаджэхэм ащыщхэр, ищыкIэгъэ реабилитациер за­кIукIэ, обществэм къыхэбгъэуцожьышъущтых ыкIи ахэр ащ хэдзыгъэхэу къащымыхъуным, тынаIэ зэратетым мэхьанэ иI, — хигъэунэфы­кIыгъ Максим Коробко.

Республикэм псауныгъэр къэухъумэгъэнымкIэ икъэралыгъо учреждениехэм психиатрическэ IэпыIэгъур ыкIи психосоциальнэ реабилитациер зэращызэхэщагъэм къытегущыIагъ Адыгэ республикэ психоневрологическэ диспансерым иврач шъхьаIэ игуадзэу, кIэлэцIыкIу психиатрэу министерствэм иштат хэмыт испециалистэу Бэгъушъэ Светланэ. Ащ къызэриIуагъэмкIэ, республикэм ипсихиатрическэ къулыкъу шизофрение ыкIи нэмыкI зэщыкъоныгъэ хьылъэхэр зиIэхэм зэряIа­зэхэрэм нэмыкIэу, психологическэ IэпыIэгъуи арегъэгъоты. ЗэхъокIыныгъэшIоу щыхъугъэ­хэм ащыщ къулыкъум иподразделениехэм зызэрарагъэушъом­бгъугъэр. Психиатрэхэм якабинетхэу районхэм ащыIэхэр диспансерым къыхагъэхьажьыгъэх. Джащ фэдэу, ыпэкIэ щы­мыIагъэу, медикэ-психологическэ IэпыIэгъум икабинетхэр район гупчэ сымэджэщхэм къа­щызэIуахыгъэх.
— Пчъагъэхэм ягугъу къэтшIымэ, психическэ зэщыкъоныгъэ зэфэшъхьафхэр зиIэ сымэ­джэ нэбгырэ мин 13 фэдиз Адыгеим щэпсэу. Республикэ цIыкIумкIэ а пчъагъэр бэ. Психиатрическэ къулыкъум зызэриушъомбгъугъэм диштэу реабилитационнэ программэхэмкIэ Iоф зышIэщт врачи 6 икIэрыкIэу еджэжьхи, гъэсэныгъэ тедзэ зэрагъэгъотыгъ, — хигъэунэфыкIыгъ Бэгъушъэ Светланэ.
Джащ фэдэу социальнэ ухъу­мэнымкIэ учреждениеу респуб­ликэм итхэм психосоциальнэ реабилитацие зэрэщарагъэкIу­рэм къытегущыIагъ АР-м Iоф­шIэнымкIэ ыкIи социальнэ хэ­хъоныгъэмкIэ и Министерствэ илIыкIо.
Iэшъынэ Сусан.
Сурэтхэр: Iэшъынэ Аслъан.