Апэрэу щыкIощт
ПрограммированиемкIэ Урысыем икIэлэеджэкIо купхэм язэнэкъокъоу «Высшая школа» зыфиIорэр апэрэу АКъУ-м щыкIощт.
Олимпиадэр едзыгъуитIу мэхъу. Адыгеим щырекIокIыщтыр, ятIонэрэр, нахь шъхьаIэр ары. ЗэхэщакIохэм зэрэрахъухьагъэмкIэ, республикэм ар зыщыкIощтыр мэлылъфэгъум и 21-р ары.
Зэнэкъокъур я 6 — 10 классхэм ащеджэхэу программированиемкIэ шIэныгъэ зиIэхэм ыкIи зэкIэлъыкIокIэ тэрэз зыхэлъ гупшысакIэр зыIэкIэлъ ныбжьыкIэхэм апай. Урысыем просвещениемкIэ и Министерствэ ыштэгъэ зэнэкъокъухэм ар ащыщ. Ащ хэлажьэ зышIоигъохэм мэлылъфэгъум и 7-м нэс нэбгыри 2 — 3 зыхэт купхэр агъэпсынхэшъ, зэнэкъокъум инэкIубгъо зыщатхын фае. Ащ ыуж апэрэ едзыгъом игъэцэкIэнхэр къызэIуахынхэ алъэкIыщт. Едзыгъо шъхьаIэм хэлэжьэнхэм пае гъэцэкIэни 3-м щыщэу 2-р тэрэзэу къашIын фае.
— ГъэцэкIэнхэр къиныщтхэп. КIэлэцIыкIухэм яшIэныгъэхэр зыфэдэхэр гъэунэфыгъэнхэр, зэнэкъокъум хэлэжьэшъущтхэмэ зэгъэшIэгъэныр ащ ипшъэрылъ. Ащ пхырыкIыгъэхэм ацIэхэр мэлылъфэгъум и 10-м къэнэфэщтых, — къеты зэнэкъокъум изэхэщэкIо комитет.
ЯтIонэрэ едзыгъор мэлылъфэгъум и 21-м очнэ шIыкIэм тетэу Урысыем ыкIи Республикэу Беларусь ичIыпIэ 40-мэ ащыкIощт. ТекIоныгъэ, хагъэунэфыкIырэ чIыпIэхэр къыдэзыхыхэрэм ацIэхэр жъоныгъуакIэм къаIощтых ыкIи зэнэкъокъум ихъытыу нэкIубгъо ащ фэгъэхьыгъэ къэбар итыщт.