ГъогухэмкIэ ГъэIорышIапIэу «Адыгеяавтодорым» къызэритыгъэмкIэ, лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу Адыгеим мы илъэсым щагъэцэкIэжьыщтхэм апае зэзэгъыныгъэхэр мэлылъфэгъу мазэр имыкIызэ IофшIэнхэр зэшIозыхыщтхэм адашIыщтых.

Гъогу Iахь 17-у, ар километрэ 43-рэ, агъэкIэжьыщтхэм япроектхэр игъом аукционым рагъэуцуагъэх. Сомэ миллиардым ехъу зэпстэумкIи ахэм атефэщт. Подрядчик хъуным фытегъэпсыхьэгъэ хъызмэтшIапIэхэм лъэIу тхылъхэр къатынхэу рагъэжьагъ. Мэлылъфэгъу мазэр имыкIызэ агъэнэфэгъэ гъогу объект пэпчъ зыгъэцэкIэжьыщтыр къэлъэгъощт.
Мыгъэ Джэджэ ыкIи Мыекъопэ районхэмкIэ гъогу Iахь плIырыплI, Шэуджэн районымкIэ зы, Кощхьэблэ, Красногвардейскэ, Тэхъутэмыкъое ыкIи Теуцожь районхэмкIэ Iахь тIурытIу агъэцэкIэжьыщт.
Шъугу къэдгъэкIыжьын, мыхэр зэкIэри къэкIощт 2025-рэ илъэс планым хагъэхьэгъагъэхэр ары. Лъэпкъ проектым къыщыдэлъытагъэхэр пIалъэхэм апэ итэу республикэм щагъэцэкIэщтых.
«Адыгеяавтодорым» автомобиль гъогухэм ягъэцэкIэжьынкIэ иотдел ипащэу Дмитрий Бороненкэм къызэрэхигъэщыгъэмкIэ, «щебеночно-мастичный» зыфаIорэ асфальт зэхэгъэчъыхьагъэу агъэфедэрэм идэгъугъэ уахътэм къыгъэлъэгъуагъ. Лъэпкъ проектым къыдыхэлъытагъэу нахьыпэкIэ агъэкIэжьыгъэхэм ары атыралъхьагъэр.
Джащ фэдэу подрядчикым лъэпкъ проектым къыдыхэлъытагъэу ыгъэцэкIэжьырэ гъогу Iахь пэпчъ «гарантийнэ пшъэдэкIыжь» иIэн фае. Илъэси 4-м къыщыублагъэу 6-м нэс а пIалъэр. А уахътэм къыкIоцI гъогур зешIым ымыгъэтэрэзыгъэ горэ къэ­нафэмэ, ежь имылъкукIэ ар ышIыжьыщт.
Аукционым ыуж ахъщэу къанэрэр гъогухэр щынэгъончъэнхэм ищыкIэгъэ псэолъэ зэфэшъхьафхэм ягъэуцун пэIуагъэхьащт.
Лъэпкъ проектэу «Щынэгъончъэ ыкIи шэпхъэшIу­хэм адиштэрэ гъогухэр» зыфиIорэм ишIуагъэкIэ Адыгеим игъогоу шъолъыр мэхьанэ зиIэхэм япроцент 63-р федеральнэ шапхъэхэм адиштэу гъэцэкIэжьыгъэ хъугъэ.