Адыгеим щыпсэухэрэм хэушъхьафыкIыгъэ дзэ операцием щыIэхэм ыпкIэ хэмылъэу посылкэхэр афагъэхьынхэ алъэкIыщт. Ар почтэм исыд фэдэрэ къутами щызэшIуахышъущт.

ИкIыгъэ илъэсым ижъоныгъо­кIэ мазэ къыщыублагъэу итыгъэ­гъазэ нэс джащ фэдэу респуб­ликэм щыпсэухэрэм хэушъхьафыкIыгъэ дзэ операцием зи­пшъэрылъхэр щызыгъэцакIэхэ­рэм апае ыпкIэ зыхэмылъ посылкэ 200 фэдиз афарагъэщагъ. 2024-м пыкIыгъэ уахътэм ахэм япчъагъэ 100-м нагъэсыгъ.
ЫпкIэ зыхэмылъ посылкэхэр зыщаIахыхэрэр почтэм иотделениехэр арых ныIэп. Ахэм яIофышIэхэм бгъэхьынэу узыфаер зэкIоцIыхыгъэу япхьылIэнэу щыт. Посылкэ пчъагъэу нэбгырэ пэпчъ ыгъэхьышъущтымкIэ гъунапкъэ щыIэп, ау ащ пэпчъ килограмми 10-м нахь мэкIэн фае къыщэчырэр. Мыщ фэдэ посылкэхэр компанием зэкIэми апэ регъэшъых ыкIи уахътэу зэрэнэсын фаеми лъэплъэжьы.
Письмэхэмрэ посылкэхэмрэ жъугъэхьыхэ зыхъукIэ, индексэу 103400 тешъутхэн фае, «город Москва — 400» джащ фэдэу тетхэгъэнэу щыт, зыIэкIэхьан фаем ылъэкъуацIэ, ыцIэ, ятацIэ, дзэ частым иномер тешъутхэнхэ фае. Частым иномер ежь дзэкIолIым е дзэ комиссариатэу къызщеджагъэхэм къышъуаIощт.
Къэралыгъом щаугъоигъэ посылкэхэр Москва дэт Почтэм илогистическэ гупчэ еуалIэх. Ащ зыкъэухъумэжьынымкIэ Министерствэм илIыкIохэм аIэ­кIегъэхьажьы, аужырэхэм зытефэхэрэм анагъэсыжьы.