АР-м и Къэралыгъо Совет — Хасэм и Тхьаматэу Владимир Нарожнэр Урысыем ихэбзэгъэуцухэм я Совет икомиссиеу мэ­къумэщ по­литикэм, чIыопсым игъэфедэн ыкIи экологием яIофхэм афэгъэзагъэм изэхэсыгъоу мэлылъфэгъу мазэу къакIо­рэм къалэу Санкт-Петербург щыкIощтым хэлэжьэщт.

Ащ изыфэгъэхьазырын къыдыхэлъытагъэу мэкъумэщ хъызмэтым ичIыгухэм машIом закъыщимыштэным фыте­гъэпсыхьагъэу шIэгъэн фаехэм, уц шIоеу амброзием игъэкIодын зыщатегущыIэ­гъэхэ зэхэсыгъо зэхищэгъагъ. Iофтхьабзэм мы Iофхэм афэ­гъэзэгъэ министерствэхэм, ведомствэхэм, чIыопсым икъэухъумэн ыкIи санитар шапхъэхэр мыукъогъэнхэм алъыплъэрэ къулыкъухэм ялIыкIохэр хэлэжьагъэх.
ЧIыгухэм якъэухъумэн, лэжьыгъэшIу къызэрахьы­жьыхэрэм ахэгъэхъогъэныр ары анахьэу зэхэсыгъом къыщыхагъэщыгъэхэр. Хэ­бзэгъэуцугъэу мы уахътэм щыIэхэм ягъэкIэжьынкIэ пред­ложениехэр къахьыгъэх. Мыщ дэжьым зигугъу къыщашIыгъэр цIыфхэм япсауныгъи, мэкъумэщ хъызмэтым ичIыгухэми зиягъэ лъэшэу язгъэкIырэ амброзием игъэ­кIодын. Непэ ар зигъо дэдэ Iофыгъохэм ащыщ.
Зэхэсыгъом хэлажьэхэрэм амброзием зыкъыIэтэу, кIэ­хэр ихъонхэм нэмысызэ, къы­хэкIынэу зыщыригъажьэ­рэм упэшIуекIомэ нахь гъэ­кIодыгъошIу зэрэхъущтымкIэ зэдырагъэштагъ. ТеурыкIуагъэ хэлъэу удызекIомэ зыпа­ри пкIэ зэримыIэщтыр къэгущыIагъэхэм къаIуагъ. Уц шIоим игъэкIодын Iэпэдэлэл зышIыхэрэм тазырэу атыралъхьэрэм хэгъэхъогъэн зэ­рэфаем игугъу ашIыгъ.
Мэкъумэщ хъызмэтым ичIыгухэр машIом щыухъумэгъэнхэм ылъэныкъокIэ Владимир Нарожнэм иеплъыкIэхэр къыриIотыкIыгъэх. Мыщ фэгъэзэгъэ къулыкъухэм­рэ муниципальнэ образованиехэм япащэхэмрэ зэкъотхэу Iоф зэдашIэмэ, машIом зыкъызэриштэрэри, ащ зэрарэу къыхьырэри нахь ма-
кIэ зэрэхъущтым ащ къыкIигъэтхъыгъ.
Зэхэсыгъом хэлэжьагъэ­хэм яеплъыкIэхэр къыдалъы­тэзэ, УФ-м ихэбзэгъэу­цу­хэм я Совет изэхэсыгъо къыхалъхьащтхэр республикэ Парламентым ыгъэхьа­зырыщтых.