УФ-м и Президентэу ­Владимир Путиным пшъэ­рылъэу къышIыгъэм те­тэу, пенсиеу е нэмыкI ахъщэ тынэу къэралыгъом щагъэнэфагъэхэм илъэс къэс къахэхъо.

Мары къэкIорэ мазэм социальнэкIэ алъытэрэ пенсиехэр индексацие ашIыгъэхэу къатыщтых.
Социальнэ пенсиер ыныбжьыкIэ нэсыгъэу, ау илъэс IофшIагъэу ищыкIагъэм фэдизыр изы­мыгъэ­къугъэхэм, сэкъатныгъэ зи­Iэхэм, унагъор зыIыгъыр дунаим ехыжьыгъэмэ, ащ къыкIэныгъэхэм къа­раты. Мызыгъэгум страхова­ниемкIэ пен­сиехэм афэдэу социальнэхэри про­центи 7,5-кIэ къаIэтыщтых.
СтрахованиемкIэ пенсиехэр илъэ­сэу икIыгъэм инфляциер зы­нэсыгъагъэм къыпкъырыкIхэзэ индексацие ашIых. Социальнэхэр пенсионерыр зэрыпсэун ылъэкIыщт ахъщэ анахь макIэу агъэнэфагъэм зэхъокIыныгъэу фэхъугъэхэр къыдалъытэзэ къаIэтых. Арэу щытми, мыгъэ процентэу атырагъэхъуагъэр зэфэдиз.
Джащ фэдэу базовэ социальнэ пенсиеу цIыфым фагъэуцугъэми индексациемкIэ мэхьанэ иI. Ащ къыпкъырыкIхэзэ ахъщэ тыныр къыфыкIалъытыкIыжьы. ГущыIэм пае, дзэм къулыкъу щихьызэ сэкъатныгъэ хэзыхыгъэхэм къэралыгъом социальнэ пенсиеу щагъэ­нэфагъэм фэдизрэ ныкъорэ, фэдищ, хэкIодагъэхэм ясабыйхэм фэдитIум нэсэу къараты. Ащ тетэу ахэр е нэмыкI социальнэ ахъщэ тынхэр зэрэзэфэмыдэхэм къыхэкIыкIэ, къахахъорэри зэфэшъхьаф.
Пенсиехэм къахагъэхъонэу ма­къэ къызагъэIукIэ, зэкIэри къы­хиубытэнхэу ежэх, ау… Илъэсэу тыз­хэтым ищылэ мазэ и 1-м зипенсие къаIэтыгъэхэм мэлылъфэгъум индексациер къанэсыщтэп. Сыда пIомэ ыныбжь зэрэнэсыгъэм, сэкъатныгъэ зэриIэм е унагъор зы­Iыгъыгъэр дунаим зэрехыжьыгъэм афэшI ахэм пенсиеу афагъэ­нэфагъэр «страховой» зыфаIорэ пенсиер ары.
Пенсиеу къыуатырэр зыфэдэр ошIэмэ, къыхэхъощтыр къэлъытэгъуае хъущтэп.