ЦIыфхэр хадэх
Федеральнэ проектэу «Iэрыфэгъу къэлэ щыIакIэ гъэпсыгъэныр» зыфиIорэм къыдыхэлъытагъэу зэтырагъэпсыхьащт чIыпIэхэм якъыхэхынкIэ зэхащэгъэ мэкъэтыныр лъагъэкIуатэ.
Урысыем ишъолъырхэм зэкIэми мы мэкъэтыныр онлайн шIыкIэм тетэу ащэкIо. АдыгеимкIэ къалэу Мыекъуапэ, поселкэхэу Инэм, Яблоновскэр ары чIыпIэу гъэкIэжьыгъэн зищыкIагъэхэр къызщыхахыгъэхэр. АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, мы псэупIэхэм адэсхэу нэбгырэ мин 15-м ехъу мэкъэтыным хэлэжьэгъах. Илъэс къэс республикэм исэу мыщ тетэу зишIоигъоныгъэ къизыIотыкIыхэрэм япчъагъэ зэрэхахъорэм къыкIагъэтхъы.
Адыгеим икъэлэ шъхьаIэ исаугъэт зэхэтэу «Памяти павших» зыфиIорэр, Лениным ыцIэ зыхьырэ гупчэр ыкIи Свято-Успенскэ чылысым къыпэIулъ чIыпIэр ары къырагъэуцуагъэхэр.
Поселкэу Яблоновскэм иурамэу Кочубей ыцIэ зыхьырэм тет спортивнэ площадкэр, урамэу Космическэм общественнэ чIыпIэу иIэр, мы урам дэдэм кIэлэцIыкIухэр спортым зыщыпылъыщтхэ площадкэу тетыр ары зыхэдэнхэу къыхахыгъэхэр.
Къэлэ гъэпсыкIэ зиIэ Инэм псэупIэ коимкIэ поселкэу Дружнэм иурамэу Крестьянскэм тет гупчэр, къуаджэу БжыхьэкъоякIэм культурэм и Унэу дэтым къыпэIулъ чIыпIэр ары цIыфхэм амакъэхэр зыфатыхэрэр.
ЦIыфхэр мэкъэтыным хэлэжьэнхэмкIэ гуфакIохэр IэпыIэгъу афэхъух. АР-м ныбжьыкIэ IофхэмкIэ и Комитет ащ пае илъэс 14 — 35-рэ зыныбжь нэбгырэ 334-рэ пстэумкIи ыгъэхьазырыгъ. Ахэр урамхэм атетхэу смартфонхэр агъэфедэзэ цIыфхэм адеIэх. Апэрэ мэфищым, гъэтхапэм и 15-м, и 16-м ыкIи и 17-м, УФ-м и Президент ихэдзынхэм апае участкэу къызэIуахыгъэхэм ахэм Iоф ащашIагъ. Нэужым агъэкIэжьыщт чIыпIэу зэнэкъокъум хэлажьэхэрэм атетыгъэх. НыбжьыкIэ IофхэмкIэ Комитетым къызэрэщытаIуагъэмкIэ, джы цIыфхэр нахьыбэу зыщызекIорэ чIыпIэхэм зы мафэ тешIэмэ, ятIонэ-
рэм Iоф ащашIэ. ГущыIэм пае, МыекъуапэкIэ Лениным ыцIэ зыхьырэ гупчэмрэ къэлэ паркымрэ зыдэщыIэхэрэр. Непэ мафэм сыхьатыр 3-м щыублагъэу 6-м нэс Iоф ашIэщт, неущ загъэпсэфыщт.
Мэлылъфэгъум и 30-м нэс мэкъэтыныр кIощт. Къэнагъэр бэп. Арэу щытми, а пчъагъэм джыри зэхъокIыныгъэхэр зэрэфэхъущтхэр нафэ. ГуфакIохэм яIофшIэни зэпагъэугъэп. Ахэм джы агъэкIэжьыщт чIыпIэу къыхахыгъэхэм Iоф ащашIэ.
Джащ фэдэу къэралыгъо фэIо-фашIэхэм япортал бгъэфедэзэ умакъэ птын плъэкIынэу щыт. Ащ ищыкIэгъэ ссылкэри гуфакIохэм къыуатыщт.
Мэкъэтынхэм илъэс 14-м зыныбжь шIокIыгъэу шIоигъоныгъэ зиIэхэр зэкIэ ахэлэжьэн алъэкIыщт. Нахьыбэу цIыфхэм амакъэхэр зыфатыхэрэр 2025-рэ илъэсым агъэкIэжьыщтых.
УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм ипхырыщын пае аштэгъэ федеральнэ проектэу щыт «Iэрыфэгъу къэлэ щыIакIэ гъэпсыгъэныр» зыфиIорэр. Ащ ишIуагъэкIэ 2017-рэ илъэсым къыщыублагъэу 2023-м нэс Адыгеим чIыпIэ 322-рэ щызэтырагъэпсыхьажьыгъ. Ахэм ащыщэу 216-р фэтэрыбэу зэхэт унэхэм ящагух, 106-р общественнэ чIыпIэх.
ХЪУТ Нэфсэт.