Атлетикэ онтэгъумкIэ Урысыем изэнэкъокъу къалэу Оренбург щыкIуагъ. Илъэс 13 — 15 ыкIи 13 — 17 зыныбжьхэр ащ хэлэжьагъэх. Адыгэ Республикэм испортсменхэм медалищ къахьыгъ ыкIи нахьыжъхэр зыхэт купымкIэ тикомандэ текIоныгъэр къыдихыгъ.

Шъолъырым ихэшыпыкIыгъэ командэ хэхьагъэх олимпийскэ резервым испорт еджапIэхэу М.Н. Чыржьыным ыцIэ зыхьырэмрэ Тэхъутэмыкъое районым щыIэмрэ.

Илъэс 13 — 15 зыныбжьхэм якуп зыщызыушэтыгъэ Андрей Кармановым (Тэхъутэмыкъое район) ящэнэрэ чIыпIэр къыди­хыгъ, ащ екIолIэгъуитIукIэ килограмми 154-рэ къыIэтыгъ, Урысыем спортымкIэ имастер хъунымкIэ кандидатым ишапхъэхэр ыгъэцэкIагъэх. Мы купым шъо­лъыр 45-мэ ялIыкIохэр щызэнэ­къокъугъэх, Адыгеим щыщхэр я 11-рэ хъугъэх. Нахьыжъхэм якуп хэтыгъэ тиспортсменхэм медалитIу къахьыгъ. Къуаджэу Улапэ щыщ Бгъуашэ Асхьад ятIонэрэ хъугъэ, Тэхъутэмыкъое районыр къэзыгъэлъэгъогъэ Валерия Гарькуша ящэнэрэ чIыпIэр къыфагъэ­шъошагъ. Илъэс 13 —17 зыныбжь­хэм якуп зыщызыушэтыгъэ ти­спортсменхэм гъэхъэгъэшIухэр зэрашIыгъэхэм ишIуагъэкIэ Адыгеим икомандэ текIоныгъэр къы­дихын ылъэкIыгъ.