Хьакъуй Анзаур роль 50 фэдиз сценэм къыщи­шIыгъ. Урысые сериал­хэм рольхэр къащишIэу хъугъэ. Исэнэхьат фэшъыпкъэу рылажьэхэ­рэм ащыщ. Трагедием нахьи комедиер къэп­шIыныр бэкIэ нахь къи­нэу елъытэ.

Анзаур искусствэхэмкIэ колледжым итеатральнэ отделение къызеухым, Лъэпкъ театрэм иактерэу Iоф ышIэнэу ыублагъ. Илъэс 28-рэ хъугъэу ащ Iут, Краснодар, Налщык, Казань, Къырым, Тыркуем къащагъэ­лъэгъогъэ спектаклэхэм ахэ­лэ­жьагъ. Зыхьэ Заур сценэм ро­­лыбэ къыдишIынэу хъугъэ, ащ ыпсыхьагъ, кIырыплъыгъ, актер сэнэхьатым инэшэнэ шъхьаIэхэр къыригъэштагъэх.
— «Тятэжъмэ яорэдхэр» зы­фиIорэр Тыркуем къыщыдгъэлъэгъонэу щытэу, Оркъы­жъэкъо Ахьмэдэу игъонэмысэу зидунай зыхъожьыгъэм ычIыпIэ спектаклым сыхагъэхьагъ. Сэ Красно­дар сыкъикIыжьыгъэ къодыеу щытыгъ. Ахьмэд ыуж ащ ухэхьанышъ зыкъыщыбгъэлъэгъоныр къиныгъ. Сытещы­нахьыщтыгъ нахь мышIэми, Зыхьэм сценэм сыкъызэрэдытехьагъэм тетэу спкъы зырищыгъ, узэрэзекIощтыри, узэрэуцущтыри — Заур шэпхъэ щы­сэтехыпIэу сфэхъугъ. НэмыкIэу ащ уготын плъэкIыщтэп.
НыбжьыкIэ актерхэр хэтэу «Псэлъыхъохэр» агъэуцун зэ­хъум, Хьэпап ироль къыфагъэ­шъошагъ. Зыхьэ Заур ычIыпIэ ар джы Хьакъуй Анзаур къешIы. Ар пшъэдэкIыжь инэу елъытэ. ШIу алъэгъурэ спектаклым
игерой шъхьаIэу Зыхьэ Заур къы­шIызэ зэсагъэхэм ычIыпIэ уиуцо­ныр IэшIэхэп. Ау щытми къыдэхъугъ, илъэс пчъагъэм къызIэкIигъэхьэгъэ сэнаущыгъэм иушэтыпIэу хъугъэ, гъэхъа­гъэ ышIыгъ.
— Илъэс 15 тыныбжьэу, чы цIынэ тышIыгъэу таIэкIэфагъ, тыныбжьыкIэ дэдэу теджэ зэ­хъум ахэр ташъхьагъ итыгъэх, — гуфэбагъэр къыхэщэу Анзаур нахьыжъ артистэу театрэм чIэтхэм ягугъу къешIы. — БэкIэ щысэтехыпIэ къытфэхъугъэх ти­артист нахьыжъхэр. Анахь къызэрыкIо эпизодыми уемыжэгъахэу къин уигъэлъэгъоу мэхъу, зэхэпфыгъэми ублэкIын умы­лъэкIэу. Мафэм зы шапхъэкIэ уекIуалIэ, пчыхьэм нэмыкI шIы­кIэ къыхэогъэщы… — Джащ фэдэу ролыр къадэхъуфэ артистхэр дэлажьэх. Сценэм тет­хэ хъумэ ар къызэрыкIо дэдэу къашIырэм фэдэу къыпщэхъуми.
— Урысые детектив телесериалэу «Бим» ичэзыу зэ­фэшъхьафхэм ятехын ухэлэ­жьэнэуи хъугъэ. Кином роль къыщыпшIынымрэ сценэм утетынымрэ сыда зэрэзэте­кIыхэрэр?
— ГъэрекIо ЦIэмэз (Новороссийскэ) тыкIозэ техынхэм тахэлэжьэнэу хъугъэ. «Бим» ия 2-рэ ыкIи ия 3-рэ едзыгъохэм сахэт. Урысые сериалхэм, фильм­хэм тазэрахэлажьэрэм шIуагъэ къеты. Артистым, амал щыIэмэ, лъэныкъо зэфэшъхьаф­хэмкIэ зиушэтын, зыкъыгъэлъэ­гъон фае. Ау театрэр зыми фэб­гъэдэшъущтэп. Сценэм укъы­техьэшъ, ролыр къэошIыфэ ухэт, урэпсэу. Кином дублэ пчъа­гъэ пшIын плъэкIыщт. Ар нэмыкI «опыт» зыфаIорэм фэд.
Комедиер бэу къин къэпшIыныр. Трагедием унэпс къебгъэ­хы къодыемэ цIыфым ышIошъ бгъэхъущт. Драмэми зы гущы­IэухыгъэкIэ «шIу усэлъэгъу» зыпIокIэ зэкIэ къэпIогъах. Ау комедием кIуачIэу пIихырэр нахьыб. КIэлэцIыкIумэ апае пшысэри нахь шIэхэу бгъэуцущт ыкIи къэпшIыщт.
— Роль 50 фэдиз зэкIэмкIи сценэм къыщыпшIыгъ. Сы­да анахь мэхьанэ зиIагъэ­хэр оркIэ?
— О. Заградникым ипьесэу «Соло для часов с боем» зыфиIорэр тиартист нахьыжъхэм ГИТИС-р къызаухыгъэр илъэс 40 зэрэхъугъэм фэшI фагъэшъо­шэ­гъагъ. Ахэр: КIыкI Юр, Устэ­къо Мухътар, Пэрэныкъо Чатиб, Хэкужъ Сар. Джахэм сахэтэу Iоф адэсшIэныр синасып къы­хьыгъ. Мамый Ерэджыбэ ипье­сэу агъэуцугъэхэм, зэкI пIоми хъунэу, сахэлэжьагъ. Къыхэзгъэщымэ сшIоигъу ТхьакIумэщэ Налбый курсымкIэ мастерэу тиIагъ, тыригъэджагъ, бэ тигъэ­шIагъэр. Союзым ианахь режиссер дэгъуи 10-мэ ясатыр хахьэщтыгъ. ХьакIэ­гъогъу Къэсэй, Нэгъой Инвер, Хьакъуй Аслъан агъэуцугъэ къэгъэлъэгъонхэм сахэтыгъ. Лъэпкъ, урыс, IэкIыб драма­тургием яклассикхэм атехыгъэ пьесэхэм, Б.Брехт «Кавказский меловой круг», Мурэтэ Чэпай и «Шъузабэхэр» сахэлэжьагъ. Аужырэр драматургыр къызы­хъугъэр илъэс 85-рэ мыгъэ зэ­рэхъурэм фэдгъэшъуашэзэ дгъэуцужьыгъ, мэлылъфэгъум театрэм къыщыдгъэлъэгъощт. Ащ нэмыкIэу актерхэм яунэ Гупчэу А. Яблочкиным ыцIэ зыхьэу Москва дэтым Дэрбэ Тимур ипьесэ техыгъэ спектаклэу «Шыу ма­фэр» къыщыдгъэ­лъэгъощт. Ахэр сыд фэдизэу кIуачIэха, мэхьэнэ куу яIэу пьесэхэр тхыгъэх, цIыфыгъэм укъыфащэ, дунаим щыхъурэм узэрепхыгъэр къыбгурагъаIо.
Хьакъуй Анзаур образ зэфэшъхьафхэр сценэм къыщигъэлъэгъуагъэх, гущыIэм пае, Бо­лэ­тыкъор («Шапсыгъэ пшъашъ», КIэрэщэ Тембот), оркъыр («Тя­тэжъмэ яорэд», Къуекъо Налбый), Батыр («Медея», Натхъо Къадыр), Шэбатныкъор («Ащэмэз исырын», Хьакъуй Аслъан), Караман («Дорогу! Караман жену ведет!», А. Гецадзе), ­чъыгыр («Зиусхьаныр орэпсэу», Хъу­нэго Саид). Лъэгъупхъэу ар сценэм къызытехьэкIэ, лъэпкъ шъуашэри, дзэкIолI шъуашэри зэфэдэу къекIух. КъыIорэм, зызэришIырэм цыхьэ фэошIы, героеу къыгъэлъагъорэм ищыIэныгъэ ухещэ, сценэм щыбысым. ЩытхъуцIэу къыфагъэшъоша­гъэр къылэжьыгъ!
Тэу Замир.