Федеральнэ унашъоу «УФ-м илъэпкъ гвардие идзэхэм афэ­гъэ­хьыгъ» зыфиIорэм къызэригъэнафэрэмкIэ, лъэпкъ гвардиер къэралыгъо дзэ организациеу щыт, къэралыгъо ыкIи об­щественнэ щынэгъончъэныр, цIыфхэм яфитыныгъэхэр ыкIи яшъхьафитыныгъэ къэухъумэгъэнхэм ар фэIорышIэ.

Ащ хахьэх подразделениехэу ОМОН-р, СОБР-р, авиоотрядыр, вневедомственнэ ухъумэныр, нэмыкIхэри. Ахэм япшъэ­рылъ шъхьаIэхэм ащыщых общественнэ рэхьатныгъэр, къэралыгъо псэолъэ шъхьаIэхэр къэухъумэгъэнхэр, экстремизмэм ыкIи терроризмэм апэшIуекIогъэныр, нэмыкIхэри.
УФ-м лъэпкъ гвардиемкIэ и Федеральнэ къулыкъу и ГъэIорышIапIэу АР-м щыIэм мы мафэхэм пэщэныгъэ дызэрехьэ полицием игенерал-майорэу Олег Якушевым.
Мы мафэм ехъулIэу ГъэIорышIапIэр къулыкъушIэхэмкIи, техникэмкIи икъоу зэтегъэпсыхьагъ. Тиреспубликэ имызакъоу нэмыкI шъолъырхэми ащ хэтхэм щытхъу хэлъэу къулыкъур ащахьы.
ГъэIорышIапIэм хэбзэухъумэкIо къулыкъухэм зэпхыныгъэ адыриIэу адэлажьэ. Джащ фэдэу АР-м хэгъэгу кIоцI IофхэмкIэ и Министерствэ игъусэу общественнэ-политическэ ыкIи нэмыкI мэхьанэшхо зиIэ Iофтхьабзэхэу тишъо­лъыр щызэхащэхэрэм къулыкъушIэхэр ахэлажьэх.