ХэбзэухъумакIоу къулыкъур пхьыныр къины ыкIи щы­на­гъо. Ар сэнэхьаткIэ къыхэзыхырэр цIыф бланэу алъытэ. Хэгъэгу кIоцI къулыкъухэм зищыIэныгъэ языпхы­рэ пэпчъ ихэгъэгу къыухъумэным ренэу фэхьа­зырын фай. АщкIэ ахэр ренэу щысэтехыпIэу щытых.

ЛIыгъэ зыхэлъэу Хэгъэ­гур къэзыухъумэхэрэм ащыщ Д. Заур. Ар мы мафэхэм УФ-м илъэпкъ гвардие и Федеральнэ къулыкъу и ГъэIорышIапIэу АР-м щыIэм иподразде­лениеу ОМОН-м икомандир игуадз, подполковник.
Заур къызэрэтфиIота­гъэмкIэ, ицIыкIугъом къыщегъэжьагъэу спортыр икIа­сэу къэтэджыгъ. Хьакурынэхьэблэ гурыт еджапIэр къызеухым, Адыгэ къэралыгъо университетым физическэ культурэмкIэ ыкIи спортымкIэ и Институт чIэхьагъ. Ащ щеджэзэ кикбоксингымкIэ бэнагъэ, гъэхъагъэхэри мымакIэу иIэх. Нэужым дзэм ащи, къалэу Ставрополь къулыкъур щихьыгъ. Джащыгъум къыгурыIуагъ къулыкъу пхьыным шIоу ыкIи дэгъоу хэлъыр, уиунагъорэ уихэгъэгурэ къэуухъумэнхэ зэ­рэплъэкIыщтыр. ЫгукIэ ар ыштагъэу щытыгъэти, къы­зэкIожьым ищыIэныгъэ хэбзэухъумэкIо къулыкъу­хэм арипхынэу рихъухьагъ. 1993-рэ илъэсым къыщегъэжьагъэу ОМОН-м хэт. Апэ зэолIэу къулыкъур ригъэжьагъ, нэужым инструкторэу, мы мафэхэм ОМОН-м ихэушъхьафы­кIыгъэ отряд ипащэ игуа­дзэу Iоф ешIэ.
— Дзэ къулыкъум сызэрэщыIагъэр къысшъхьэпагъ. Арышъ, ащ хэшIыкI фысимыIагъэу щытэп. Хэти мамыр щыIакIэ иIэ шIоигъу, ар гъэпытэгъэным сы­фэбанэ. Отрядэу сызыхэтым пшъэрылъыбэ егъэцакIэ. Ахэр — общест­веннэ рэхьатныгъэр къэу­хъумэгъэныр, цIыфхэм ящы­нэгъончъагъэ лъыплъэ­гъэныр, терроризмэр ыкIи экстремизмэр къэмыгъэ­хъугъэным иIофыгъохэр, нэмыкIхэри. Апэ 2016-рэ илъэсым нэс АР-м хэ-­
гъэгу кIоцI IофхэмкIэ и Министерствэ тыхэтыгъ, нэужым УФ-м и Президент иунашъокIэ Урысые гвардиер загъэпсым ОМОН-м ихэушъхьафыкIыгъэ подразделение ащ хагъэхьагъ.
ХэушъхьафыкIыгъэ дзэ операцием иапэрэ мафэ къыщегъэжьагъэу Д. Заур Росгвардием иотряд хэтэу къулыкъу ехьы. Ащ зэри­лъытэрэмкIэ, хэгъэгур къэу­хъумэгъэныр япшъэ­рылъ шъхьаIэхэм ащыщ.
Дзэ пшъэрылъхэр бгъэцэкIэнхэр псынкIагъоп, ар щынагъо. Ау а лъэбэкъур зышIыгъэ кIалэхэм лъытэныгъэрэ щытхъурэ къа­лэжьыгъ.
— Сыд фэдэрэ лъэхъани УIэшыгъэ КIуачIэхэм къулыкъур ащыхьыгъэныр агъэлъапIэ. Ар хъулъфыгъэ пэпчъ ипшъэрылъэу сэ­лъытэ. Iофхэм язытет зэ­рэмыпсынкIэр, пшъэдэ­кIыжь ин зэрэсиIэр къызгурыIозэ а лъэбэкъур сшIы­нэу тесыубытагъ. Дзэ-­патриотическэ пIуныгъэу къысхалъхьагъэр ащ ылъа­псэу сэлъытэ, — еIо Заур.
Мыщ ыпэкIи иIофшIэн хахьэу Заур Чэчэным, Дагъыстан ащыкIогъэ зэпэуцужьхэм пчъагъэрэ ахэлэжьагъ. Дзэм пшъэ­рылъэу къыфигъэуцугъэр лIыблэнагъэ хэлъэу зэ­ригъэцэкIагъэм, ихэгъэгу фэ­шъыпкъэу къызэриухъу­магъэм афэшI тын лъапIэ­хэр къыфагъэшъошагъэх.
— Анахь шъхьаIэр уикъэ­ралыгъо шIу плъэ­гъуныр, ащ ифедэхэр къэу­ухъумэнхэм уфэблэныр ары, — еIо Заур. — Агу кIодыгъэу тидзэкIолIхэм яслъэгъулIагъэп. ЗэкIэми теубытэгъэ пытэ ахэлъэу япшъэрылъхэр агъэцакIэх. КъулыкъушIэхэм къагурэIо текIоныгъэр къыдэтэхыфэ тызэрэлъыкIотэн фаер. ХэкIыпIэ закъор — ТекIоныгъ! Ар къызэрэсыщтым тицыхьэ телъ, тиIофшIэн къиными, Хэгъэгум, цIыф­хэм ящыкIагъэу щыт.
Гъэхъагъэу иIэхэм ялъы­тыгъэу ежь ышъхьэ фэгъэ­хьыгъэу бэ къыIотэныр, зыщытхъужьыныр Заур икIасэп. Анахьэу къыхигъэ­щырэр къулыкъур ахьызэ хэкIодэгъэ иIофшIэгъухэм лIыгъэу зэрахьагъэр ары.
— Тихэгъэгу лIыхъужъ къэралыгъоу щыт. Зэо пчъагъэ ащ къызэринэ­кIыгъ. Лъэпкъ гвардием и ГъэIорышIапIэ щысэ зы­тепхын къулыкъушIэхэр мымакIэу хэтых, ахэм япшъэрылъхэр дэх имыIэу агъэцакIэ, патриотизмэу ахэлъыр хэткIи щысэте­хыпI. Мыщ дэжьым зы­щыдгъэгъупшэ хъущтэп яхэгъэгу къаухъумэзэ зы­псэ зытыгъэ къулыкъу­шIэхэр. Ахэр егъэшIэрэ шIэжьэу тыгу илъыщтых, — къыIуагъ ащ.
Отрядым хэтэу хэу­шъхьафыкIыгъэ дзэ опе­рацием хэлэжьэнэу зыкIокIэ мэзищ-плIы пIалъэкIэ ар къэты, къегъэзэжьышъ, етIани джащ фэдизрэ зегъэпсэфы. Мы мафэхэми ащ кIонэу зегъэхьазыры. Заур къызэриIорэмкIэ, къулыкъур пхьыным пае спортым уфэщагъэу, псау­ныгъэ пытэ уиIэу, Iашэм хэшIыкI фыуиIэу, психо­логическэу уфэхьазырэу, пшIэрэм уасэ ептыжьэу ущытын фае. Джащ фэдэу щынэ угу къихьанэу щытэп, къин чIыпIэ ифэгъэ цIыфым IэпыIэгъу псынкIэр ебгъэгъотышъун фае. Ахэм зэкIэми Росгвардием икъу­лыкъушIэхэр афагъасэх.
Хэтрэ ани икIалэ мэ­шIошхом пигъэхьанэу фэещтэп, Заур янэу Людмилэ ахэм ащыщ. ИкIалэ иIоф­шIэн зыфэдэр къыгурэIоми, къулыкъум къэтыфэ мэгу­мэкIы. Заур мэшэлахьэу сабыищ иI, Айтэч илъэси 10, Аслъан — 7 ыкIи Зарэ — 2 аныбжь.
— Iофэу згъэцакIэрэр сисабыйхэм къагурыIо зэ­хъум къызырыгушхохэу аублагъ. Ащ кIуачIэ ыкIи къарыу къысеты. КъыткIэ­хъухьэрэ лIэужхэр мамырэу псэунхэм тапэкIи ты­фэбэнэщт, — еIо Заур.
ХэушъхьафыкIыгъэ дзэ операцием хэлажьэхэрэм хабзэм лъэшэу ынаIэ
къа­тет. Ар къызежьагъэм щыу­благъэу кIалэхэм щытхъу хэлъэу къулыкъур ахьы. Мамырныгъэр ягъогогъоу тидзэкIолI пстэу­ми шIэхэу къагъэзэжьынэу афэтэIо!
КIАРЭ Фатим.