Шъобжхэр зытещагъэ хъухэрэм апэрэ медицинэ IэпыIэгъур ягъэгъотыгъэным зыщафагъасэхэрэ Iофтхьабзэ къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ щызэхащагъ.

Апэрэ IэпыIэгъур зэрябгъэгъотыщт шIыкIэр нэрылъэгъу къафэзышIыгъэхэр общественнэ организациеу Урысые Къащ Плъыжьым и Адыгэ республикэ къутамэ иинструкторхэр ары. Мыхэм къаIотагъ ыкIи къагъэлъэгъуагъ ныбжь зиIэм, сабыим ыкIи къэхъугъакIэм гу-тхьабыл реанимациер зэрафэпшIыщтыр.
Фондым ишъолъыр къутамэ иIофышIэхэм шIэныгъэу зэрагъэгъотыгъэ­хэр хьэшъо нысхъапэхэм ащаушэтыгъэх.

ЦIыфыр ошIэ-дэмышIэ тхьамыкIа­гъом зыхафэкIэ ищыIэныгъэ къызэтегъэнэгъэнымкIэ апэрэ IэпыIэгъур тэрэ­зэу зэребгъэгъотырэм мэхьанэшхо иI, арышъ, нэбгырэ пэпчъ ащ фэкъулаин фае. Ащ дакIоу, сымаджэхэм ыкIи сэкъатныгъэ зиIэхэм уалъыплъэнымкIэ агъотыгъэ шIэныгъэхэм яшIуагъэ къякIыщт.
Хэутыным фэзыгъэхьазырыгъэр
Iэшъынэ Сусан.