Урысые физкультурэ-спорт комплексэу «IофшIэным ыкIи зыкъэухъумэжьыгъэным сафэхьазыр» зыфиIорэм иапэрэ тхьамафэ аухыгъ. 2024-рэ илъэсымкIэ ар апэрэу щытыгъ.

Iофтхьабзэм хэлэжьагъэхэр аныбжьыкIэ зэтекIых, ащ елъытыгъэу ушэтынхэри акIугъэх, дышъэ, тыжьын ыкIи джэрз медальхэм афэбэнагъэх.
ЗэхэщакIохэм къызэраIуагъэмкIэ, Урысые физкультурэ-спорт комплексэу «IофшIэным ыкIи зыкъэухъумэжьыгъэным сафэхьазыр» зыфиIорэм итхьамафэ Мыекъуапэ щыпсэурэ нэбгырэ 45-рэ хэлэжьагъ. Республикэ стадионэу «Зэкъошныгъэм» ахэр щызэIукIагъэх, зыщаушэтыгъ. Шапхъэхэм къызэрагъэнафэу дышъэ бгъэхалъхьэр къэблэжьыным фэшI лъэныкъуи 6 дэгъу дэдэу птын фэягъ. А пшъэрылъыр нэбгыри 9-мэ агъэцэкIагъ. Ды­шъэ бгъэхалъхьэ­хэр къафагъэшъошагъэх: Егор Волковым, Константин Логиновым, Дмитрий Логиновым, Михаил Проценкэм, Михаил Ершовым, Мария Ершовам, Марет Керселян, Аксиния Лебедевам, Милана Логиновам. Нэбгыри 4-мэ тыжьын, 2-мэ джэрз медальхэр къалэжьыгъэх.

Iофтхьабзэм анахь ныбжьыкIэу хэлэжьагъэр илъэсих зыныбжь Милана Логиновар ары, анахьы­жъыр илъэс 63-рэ зыныбжь Марет Керселян.
ЗэрагъэнэфагъэмкIэ, Урысые физкультурэ-спорт комплексэу «IофшIэным ыкIи зыкъэухъумэжьыгъэным сафэхьазыр» зыфи­Iорэм изичэзыу тхьамафэ мэкъу­огъум рагъэкIокIыщт.