Адыгэ Республикэм и Къэралыгъо Совет — Хасэм ия ХХХIV-рэ зэхэсыгъо республикэм исоциальнэ экономикэ хэхъоныгъэ илъэныкъо зэфэшъхьафхэм япхыгъэ Iофыгъо 50-м ехъумэ ща­тегущыIагъэх.

Ащ хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет —Хасэм идепутатхэр, министрэ­хэм я Кабинет хэтхэр, хабзэм ифедеральнэ ыкIи ишъолъыр къулыкъухэм япащэхэр. Къэ­ралыгъо Советым — Хасэм и Тхьаматэу Владимир Нарожнэм зэхэсыгъор зэрищагъ.
Зэхэсыгъор рагъэжьэным ыпэкIэ Iофтхьабзэм хэлажьэ­хэрэр зы такъикърэ афэшъы­гъуагъэх Московскэ хэкум къы­щыхъугъэ тхьамыкIагъом хэкIодагъэхэм.
Iофыгъоу зытегущыIэщтхэм атегъэпсыхьагъэу парламентариехэм республикэм и ЛIышъхьэ дырагъэштагъ АР-м финанс­хэмкIэ иминистрэу Виктор Ор­ловыр ыкIи АР-м цифрэ, къэбар ыкIи телекоммуникационнэ технологиехэмкIэ иминистрэу Шыу Заурбэч АР-м иминист­рэхэм я Кабинет и Тхьаматэ игодзэ IэнатIэхэм аIугъэхьэ­гъэн­хэмкIэ. Мыщ дэжьым къэ­Iогъэн фае министрэхэм я Ка­бинет и Тхьаматэ игодзэ пшъэ­рылъы­кIэхэр зэрагъэцакIэхэрэм дакIоу министрэхэм якъулыкъухэм пэ­щэныгъэ зэрадызэрахьащтыр.

Шъугу къэтэгъэкIыжьы: АР-м иминистрэхэм я Кабинет и Тхьа­матэ игодзэ IэнатIэ рес­публикэм щызыIыгъыр ЛIыхэсэ Махьмуд ары. АР-м и ЛIышъхьэ иунэшъо гъэнэфагъэхэу къыдэкIыгъэхэм атегъэпсыхьагъэу джы АР-м иминистрэхэм я Кабинет и Тхьаматэ годзищ иIэщт. Министрэхэм яполномочиехэм зызэраушъомбгъурэм къыхэкIэу социальнэ лъэны­къомкIэ ыкIи информатизацием къыхиубытэрэ лъэныкъохэмкIи Урысыем и Президент и Джэ­псалъэу Федеральнэ ЗэIукIэм фигъэхьыгъэм тегъэпсыхьагъэу яIофшIэн джыри нахь зыкъызэрэрагъэIэтыщтым республи­кэм и ЛIышъхьэ ицыхьэ зэрэтелъыр къыхигъэщыгъ.
КъумпIыл Мурат къызэриIуа­гъэмкIэ, министрэхэм я Кабинет и Тхьаматэ игодзакIэхэм Iофым хэшIыкIышхо фыряI ыкIи IэпэIэсэныгъэ ахэлъ. Ащ анаIэ тыраригъэдзагъ республикэ мылъкум епхыгъэ Iофыгъохэм язэшIохынкIи, бюджет мылъкур зыпэIухьэхэрэм хэшIыкI икъу фыряIэнымкIи, нахьыпэм фэдэу, Адыгеир шъолъыр пэрытхэм зэрахэтым. Ащ дакIоу анахь мэхьанэ зиIэ лъэныкъохэмкIэ, лъэпкъ проектыкIэу «Экономика данных» зыфиIорэм диштэу Урысыем и Президент къахилъхьэгъэ Iофыгъохэм ялъытыгъэу цифрэ технологиехэмкIэ пшъэ­рылъ инхэр республикэм зэ­шIуихынхэу ыпашъхьэ итых.
АР-м хэгъэгу кIоцI IофхэмкIэ и Министерствэ 2023-рэ илъэсым Iофэу ышIагъэм изэ­фэхьысыжь къышIыгъ къулы­къум ипащэу Олег Безсмельницыным. Ащ къызэрэхигъэщыгъэмкIэ, илъэсым икIэуххэм къызэра­гъэ­нэфагъэмкIэ, анахь макIэу бзэ­джэшIагъэхэр зыщызэрахьэгъэхэ шъолъырхэм тиреспубликэ ахалъытагъ. Хэгъэгум ишъолъыр анахь щынэгъончъи 5-мэ Адыгеир ахэхьагъ. Илъэсэу икIы­гъэм елъытыгъэмэ, респуб­ликэм бзэджэшIагъэу щызэрахьагъэр процент 13,5-кIэ нахь макIэ хъугъэ. ИлъэситIу фэдиз хъугъэ арэущтэу зыщытыр. Депутатхэм упчIэ гъэнэфагъэхэр министрэм къыратыгъэх, ахэр зыфэгъэхьыгъагъэхэр полицием ирайон отделхэм яIофшIакI, муниципалитетхэм зэдэлэжьэны­гъэу адыряIэр, кощын IофымкIэ уплъэкIун IофшIэнхэу зэхащэ­хэрэм нахь лъэшэу анаIэ атырагъэтыныр ыкIи нэмыкIхэр.
АР-м и УплъэкIокIо-ЛъытэкIо палатэ и Тхьаматэу Павел Ста­ценкэм 2023-рэ илъэсымкIэ Iофэу ашIагъэм икIэуххэр сессием къыщызэфихьысыжьыгъэх. Ащ къызэриIуагъэмкIэ, Палатэм уплъэкIун Iофтхьэбзи 9 зэхищагъ, АР-м и ЛIышъхьэ игъо зэрилъэгъугъэм тетэу уплъэкIуни 2, АР-м и Къэралыгъо Совет — Хасэм пшъэрылъ къызэрафишIыгъэм тетэу 1 уплъэкIун рагъэкIокIыгъ. УплъэкIун Iофтхьабзэхэм лъэныкъо 18 къызэлъаубытыгъ. Сомэ миллиардрэ миллионрэм ехъу ыкIи сомэ миллиарди 3,7-м ехъу зыосэ мылъкур гъэфедагъэ зэрэ­хъугъэр ауплъэкIугъ. Ащ нэмыкIэу Палатэм иIофышIэхэм эксперт-зэхэфын Iофтхьэбзэ 11 агъэцэкIагъ, АР-м ишэпхъэ ыкIи иправовой актхэм япроектхэмкIэ зэфэхьысыжь 32-рэ къагъэ­хьазырыгъ. Депутатхэм отчетыр аштагъ.
Зэхэсыгъом 2024-рэ илъэсымкIэ республикэ бюджетым зэхъокIыныгъэхэр парламентариехэм къыхалъхьагъ. Бюджетым ихахъохэр сомэ миллиарди 2,5-кIэ нахьыбэ ашIыгъэх. А мылъкур анахьэу зыпэIухьащтыр хэушъхьафыкIыгъэ дзэ операцием хэлажьэхэрэм IэпыIэгъу ятыгъэныр, коммунальнэ инфраструктурэр гъэкIэжьыгъэныр, зэхэтэкъоным нэсыгъэ унэжъхэм цIыфхэр къачIэщы­жьыгъэнхэр, къэралыгъо учреждениехэр мылъку-техникэ лъэныкъомкIэ зэтегъэпсыхьэ­гъэнхэр ары.
Ащ нэмыкIэу АР-м изаконкIэ зэхъокIыныгъэхэр депутатхэм къахалъхьагъэх. Ахэр япхыгъэх унагъом, ным, тым ыкIи кIэлэцIыкIухэм якъэухъумэн иIофыгъохэм. Сабыибэ зэрыс уна­гъохэм ащ амал къаритыщт ящэнэрэ ыкIи къыкIэлъыкIощт кIэлэцIыкIухэр къызыхъугъэхэм ыуж мэзищ тешIэфэ емыжэхэу сомэ мин 50 хъурэ зэтыгъо ахъщэр аIэкIэхьанэу. КъызэрэхагъэщыгъэмкIэ, илъэсэу икIыгъэм шэкIогъум и 1-м ехъулIэу республикэм иунэгъо 657-мэ ащ фэдэ зэтыгъо ахъщэр аIэ­кIагъэхьагъ.
Физическэ культурэм ыкIи спортым, ны-тыхэм анаIэ зытемытыжь кIэлэцIыкIухэм яIы­гъынкIэ IофшIэным изэшIохын епхыгъэ республикэ хэбзэгъэуцугъэхэм сессием зэхъокIыныгъэхэр щафашIыгъэх. Ахэр АР-м и Конституционнэ совет, ад­министративнэ хэбзэукъоны­гъэхэм, цIыфхэр чIыопс ыкIи техногеннэ нэшанэ зиIэ тхьамыкIагъохэм ащыухъумэгъэнхэм, фэтэрыбэу зэхэт унэхэм ягъэцэкIэжьын япхыгъэ законопроектых. Ахэм зэхъокIыныгъэу афашIыщтхэм ахэплъагъэх.
Зэхэсыгъом икIэухым Урысыем и Президент ихэдзынхэм анахь чанэу ахэлэжьэгъэ депутатхэм зэрафэразэр Адыгеим и ЛIышъхьэ къыIуагъ. КъумпIыл Мурат къызэрэхигъэщыгъэмкIэ, хэдзакIохэр чан дэдэу а Iофтхьабзэм къекIолIагъэх —процент 84,76-у.
«Хэдзынхэм джыри зэ къау­шыхьатыгъ республикэм ис цIыф­хэм Урысыем и Президентэу Владимир Путиным зэрищэхэрэ гъогум цыхьэ зэрэфашIырэр — хэдзакIохэм япро­цент 90-мэ амакъэ ащ фатыгъ. Президентым Федеральнэ Зэ­IукIэм фигъэхьыгъэ Джэпсалъэм къыдыхэлъытагъэу IофшIэнышхо зэшIотхын фаеу къытпыщылъ ыкIи цIыфхэм ящыIакIэ нахь зыкъыIэтынымкIэ къэралыгъом ипащэ къыгъэуцурэ пшъэрылъхэр зэшIотхынхэм тыфэхьазыр», — къыIуагъ КъумпIыл Мурат.
АР-м и Къэралыгъо Совет — Хасэм и Тхьаматэу Владимир Нарожнэм зэхэсыгъом къе­кIо­лIагъэхэр ыгъэгугъагъэх пар­ламентым идепутатхэр респуб­ликэм игъэцэкIэкIо хабзэ икъу­лыкъухэм тапэкIи Iоф адашIэным зэрэфэхьазырхэр.
АР-м и ЛIышъхьэ ипресс-къулыкъу