АР-м инахьыжъхэм я Совет зичэзыу зэхэсы­гъоу иIагъэр ныбжьыкIэхэм ящыIэныгъэ зэ­рапхыщт сэнэхьатыр тэрэзэу къыхахыным, ащ Iоф рашIэжьышъунымкIэ амалэу щыIэхэм афэгъэхьыгъагъ.

Iофтхьабзэм хэлэжьагъэх Адыгэ Республикэм гъэсэны­гъэмрэ шIэныгъэмрэкIэ иминистрэ игуадзэу Артем Журавель, лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ Комитетым итхьаматэу Шъхьэлэхъо Аскэр, Къэралыгъо Советым — Хасэм гъэсэныгъэмкIэ, шIэныгъэмкIэ, ныбжьыкIэ IофхэмкIэ, спортымкIэ, къэбар жъугъэм иамалхэм ыкIи общественнэ органи­зацие­хэм зэпхыныгъэ адыряIэнымкIэ икомитет ипащэу Шэу­джэн Тем­бот, къулыкъу зэфэшъхьафхэм ялIыкIохэр.
Нахьыжъхэм я Совет итхьаматэу ГъукIэлI Нурбый къаIэтыгъэ Iофыгъом фэгъэхьыгъэу къэгущыIагъ. Ащ къызэрэхигъэ­щыгъэмкIэ, сэнэхьат зиIэ специалистхэм яухьазырын ыкIи Iоф­шIэн ягъэгъотыгъэным исистемэ гъэкIэжьыгъэным иIофыгъо непэ къэуцугъ. Президентэу Владимир Путиным мы илъэсым Федеральнэ ЗэIукIэм фигъэхьыгъэ Джэпсалъэм ар къыщиIэ­тыгъ. Гъэсэныгъэмрэ предприя­тиехэмрэ, гурыт еджапIэмрэ апшъэрэ еджапIэмрэ язэфыщытыкIэ, язэдэлэжьэныгъэ гъэпы­тэгъэным мэхьанэ иIэу Президентым ылъытагъ. Федеральнэ гупчэр шъолъырхэм ягъусэу гурыт сэнэхьат гъэсэныгъэ язы­гъэгъотырэ учреждениехэр гъэ­цэкIэжьыгъэнхэм ыкIи техническэу зэтегъэпсыхьэгъэнхэм ипрограммэ пхыращыным къы­фэджагъ.
— Федеральнэ къэралыгъо шэпхъакIэхэм атехьанхэмкIэ рес­публикэм гъэсэныгъэмкIэ и Министерствэ IофшIэн гъэнэфагъэ зэрехьэ. Рабочэ сэнэхьатхэу анахь зыфэныкъохэм яспискэ зэхагъэуцуагъ, ащ дакIоу еджапIэхэм, колледжхэм, училищхэм якIэлэегъаджэхэм яшIэныгъэхэм ахагъахъо. Адыгеим и ЛIышъхьэу КъумпIыл Мурат илъэсэу икIыгъэм изэфэхьысыжьхэм къатегущыIэзэ, лъэпкъ проектэу «Гъэсэныгъэр» зэрэпхыращырэм, ащ къыдыхэлъытагъэу сэнэхьат ягъэгъотыгъэнымкIэ «Билет в будущее» зыфиIорэр зэрагъэцакIэрэм ягугъу къышIыгъ. Ащ ишIуагъэкIэ шэпхъэшIухэм адиштэрэ еджэпIакIэхэр зэрашIыхэрэр, ахэм ахэт мастерскойхэр зэрэзэтырагъэпсыхьэхэрэр къыхигъэ­щыгъ. Ау мы лъэныкъомкIэ джыри щыкIагъэу щыIэр макIэп, — хигъэунэфыкIыгъ ГъукIэлI Нурбый.
Нахьыжъхэм я Совет хэтхэм къызэрэхагъэщыгъэмкIэ, совет хабзэм илъэхъан щыIэгъэ сэнэхьат-техническэ гъэсэныгъэм шIогъабэ пылъыгъ. Ащ гъэсэныгъэ зэраригъэгъотырэм дакIоу материальнэ-техническэу зэрэзэтегъэпсыхьэгъагъэхэм ишIуагъэкIэ кIэлэцIыкIухэр социальнэу ыухъумэщтыгъэх. ГухэкI нахь мышIэми, бэдзэр зэфыщытыкIэхэм къэралыгъор затехьэм, материальнэ-техническэ ыкIи егъэджэн базэр зэхэтэкъуагъ.

— Республикэм итыгъэ техническэ училищхэу N 17-р, N 35-р, Ханскэм дэтыгъэр зэ­хэтэкъугъэх. Производственнэ техническэ базэ дэгъу мыхэм аIэкIэлъыгъ, псэолъэшI, электрикхэр ыкIи монтажникхэр, механизаторхэр гъэхьазыры­гъэнхэмкIэ мыхэр зэлъашIэщтыгъэх. Джы зэкIэ ахэр икIэрыкIэу зэтегъэуцожьыгъэнхэ фае хъугъэ. «Труд» урокэу щыIагъэр программэм хэгъэхьажьыгъэныр, ащ епхыгъэу станокхэр, технологическэ, лабораторнэ оборудованиер зэгъэуIужьы­гъэнхэ, еджапIэхэм яIэгъэ егъэ­джэн-ушэтыпIэ чIыгухэр, гъэ­фэбапIэхэр, чъыгхатэхэр къэIэтыжьыгъэнхэ фае, — къыIуагъ Советым итхьаматэ.
Гъэсэныгъэмрэ шIэныгъэм­рэкIэ министрэм игуадзэу Артем Журавель ныбжьыкIэхэм сэнэхьат къыхахынымкIэ рес­публикэм щызэрахьэрэ Iоф­тхьабзэхэм къатегущыIагъ. Ащ къы­зэриIуагъэмкIэ, я 6-рэ клас­схэм къащегъэжьагъэу я 11-рэ классхэм анэсэу «Россия — мои горизонты» зыфиIорэ сы­хьа­тыр яI. Ащ ишIуагъэкIэ сэнэхьатэу щыIэхэм якъэбар къа­зэрафаIуатэрэм дакIоу Iоф­шIапIэхэм ащэхэзэ, нэрылъэгъу афашIы, зыщаушэтын амал ара­ты. Ау, нахьыбэрэмкIэ, ныбжьыкIэхэм сэнэхьатэу къыхахыщтыр яамалхэм атегъэпсыхьагъэу унагъом щырахъухьэ.
— Сэнэхьат языгъэгъотырэ колледжэу ыкIи техникумэу Адыгеим 9 ит, 7-р гъэсэны­гъэмкIэ Министерствэм епхыгъэх, 2-р — апшъэрэ еджэпIи­тIумэ яех. Ахэм пстэумкIи сту­дент нэбгырэ мини 10-м ехъу ащеджэ, кIэлэегъэджэ 580-мэ Iоф ащашIэ. Гурыт специалистхэр программэ 29-кIэ ыкIи квалифицированнэ рабочхэр программэ 13-кIэ къагъэхьазырых, — хигъэунэфыкIыгъ министрэм игуадзэ.
Джащ фэдэу ащ къыхигъэщыгъэхэм ащыщ егъэджэнымкIэ ыкIи IофшIэн ягъэгъотыгъэнымкIэ зэпхыныгъэу щыIагъэр зыпкъ игъэуцожьыгъэнымкIэ егъэджэн-производстеннэ кластерхэм ягъэпсын ишIуагъэ къэкIощтэу. Ащ фэдэу Адыгэ къэралыгъо университетым зы щызэхащагъ ыкIи мыщ иIофшIэн зекIоным фэгъэзагъэу предпринимательствэ цIыкIум ыкIи гурытым исубъектхэр къыхагъэлажьэх.
Мы илъэсым Мыекъопэ къэралыгъо технологическэ университетым кластер «ПрофиМед» зыфиIорэр къыщызэIуа­хыщт. Ащ Адыгеим ит медицинэ организациехэр ыкIи мы сэнэхьатыр языгъэгъотырэ еджапIэхэр зэрипхыщтых. Мыекъопэ индустриальнэ техникумым-
рэ ПАО-у «Зарем» зыфиIорэм-
рэ зэгъусэхэу машинэшIыным ылъэ­ныкъокIэ егъэджэн-производственнэ кластер къызэIуа­хынэу рахъухьэ.
Зэхэсыгъом къыщыгущыIагъэх нахьыжъхэм я Совет хэтхэу Александр Девтеровыр, Хъы­мыщ Казбек, ХъутIыжъ
Ас­лъанбый, Оник Нигоевыр, Сергей Захаровыр.
Ахэм зэкIэми къызэрэхагъэщыгъэмкIэ, ныбжьыкIэхэр Iоф­шIэн зэфыщытыкIэхэм ахэщагъэ хъунхэм фэшI хэбзэгъэуцугъэу щыIэхэм икIэрыкIэу ахэплъэ­жьыгъэн фае. ПIуныгъэр Iоф­шIэнымкIэ гъэпытэгъэнэу ыкIи ар унагъом къыщежьэнышъ, еджапIэхэм ащалъагъэкIотэнэу щыт. Предприятиеу республикэм ит­хэм IофшIэнымкIэ амалэу къаратыхэрэм уасэ афэзы­шIыщт организациехэр щыIэхэмэ ишIуа­гъэ къэкIощт. Гъэсэныгъэм иучреждениехэмрэ IофшIэн язы­гъэгъотыхэрэмрэ язэдэлэ­жьэ­ныгъэ гъэпытэгъэныр игъоу алъытагъ.
КъэгущыIагъэхэм хагъэунэфыкIыгъ мы уахътэм къэралыгъом иэкономикэ квалифици­рованнэ рабочэ миллионитIу фэдизмэ зэращыкIэрэр. Ахэм язы Iахь инахьыбэр IэкIыб къэ­ралыгъохэм къарыкIыхэрэм къырагъэхъу, ау мыр зыпкъ ит Iофыгъоу щытэп. Арышъ, Iоф зышIэн зылъэкIыщтхэр тэ ткIуа­чIэкIэ къэгъэхьазырыгъэнхэм ыкIи ахэр республикэм къинэнхэм фэIорышIэщт амалхэм афэгъэзэгъэ лъэныкъо пстэури къыхагъэлажьэзэ ащ дэлэжьэнхэу зэдаштагъ.
Iэшъынэ Сусан.