Адыгэ Республикэм культурэмкIэ иIофышIэхэу лъытэныгъэ зыфэтшIыхэрэр!
Ныбджэгъу лъапIэхэр!
Шъуисэнэхьат епхыгъэ мэфэкIымкIэ тышъуфэгушIо!
Адыгеим ыкIи зэрэ Урысыеу якультурэ кIэн къэзыухъумэхэрэм, хэхъоныгъэ фэзышIыхэрэм, цIыф лъэпкъ зэфэшъхьафхэм ягушъхьэлэжь баиныгъэ нахь пытэным фэлэжьэрэ пстэуми тызэрафэразэр мы мафэм къыхэдгъэщынэу тыфай.
ЗиIоф хэшIыкIышхо фызиIэ, зипшъэрылъхэр дэгъоу зыгъэцэкIэрэ цIыф шIагъо­хэм яшIуагъэкIэ проектышхохэр республикэм щызэшIуахых, лъэпкъ шэн-хабзэхэм якъэухъумэнкIэ Iофтхьэбзэ гъэшIэгъонхэр щагъэцакIэх. Творческэ купхэми гъэхъэ­гъэшIухэр ашIых, якъэгъэлъэгъонхэмкIэ цIыфхэр агъэгушIох, агъэразэх. Музейхэм, тхылъеджапIэхэм Iофтхьэбзэ гъэшIэгъонхэр ащызэхащэх. Культурэм иIофышIэхэм яIэпэIэсэныгъэрэ яхъупхъагъэрэ яшIуагъэкIэ цIыфхэм амал дэгъу яIэ мэхъу лъэпкъ ыкIи дунэе культурэм ябаиныгъэхэм нэIуасэ зафашIынымкIэ.
Республикэм икъэралыгъо хабзэ икъулыкъухэм яIофшIэнкIэ анахь лъэшэу анаIэ зытырагъэтыхэрэм ащыщ культурэм хэхъоныгъэ егъэшIыгъэныр. Мы аужырэ илъэсхэм культурэм иунэхэр агъэцэкIэжьых ыкIи кIэхэр ашIых, уахътэм диштэрэ Iэмэ-псымэхэмкIэ ахэр зэтырагъэпсыхьэх, Адыгеим иархитектурнэ кIэн къэухъумэгъэнми лъэшэу анаIэ тырагъэты.
Республикэм ис цIыфхэм ягушъхьэлэжь баиныгъэ хэхъоныгъэ егъэшIыгъэным, ахэм гъэшIэгъонэу яуахътэ агъэкIоным апае тфэлъэкIыщтыр зэкIэ тапэкIи тшIэщт.
Культурэм иIофышIэ ыкIи иветеран пстэуми Iофышхо зэрагъэцакIэрэм пае тызэрафэразэр къэтэIо.
Ныбджэгъу лъапIэхэр, псауныгъэ пытэ, щыIэкIэшIу шъуиIэнэу, шъуиIэпэIэсэныгъэ ренэу хэжъугъэхъонэу, Адыгеимрэ Урысыемрэ яфедэ зыхэлъ гугъапIэу шъуиIэхэр зэкIэ къыжъудэхъунэу шъуфэтэIо!
АР-м и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
АР-м и Къэралыгъо Совет — Хасэм и Тхьаматэу
Владимир Нарожнэр