Бжьэ зэмыцэкъагъэм шъоум ыуасэ ышIэрэп.
(Адыгэ гущыIэжъ)

Пэсэрэ адыгэхэм щыIэныгъэм илъэныкъо зэфэшъхьафхэмкIэ IэпэIэсэныгъэ хьалэмэт зыхэлъхэр къахэкIыщтыгъ. Ахэм ащыщыбэ мэкъумэщ IофшIэным фэIазэ­хэу, ячъыгхатэхэм къащагъэ­кIы­щтыгъэ­хэмкIэ зэлъашIэхэу, гъукIэ Iазэ­хэу, бжьахъохэу тарихъым къыхэнагъэх.
Непэрэ мафэм макIэ бжьэхъо ныбжьыкIэу узыIукIэщтыр. Ахэм ащыщ непэ нэIуасэ шъуфэтшIы тшIоигъу. Ар къуа­джэу Хьакурынэхьаблэ щыщ Бгъуашэ Рустам.
Бжьэхъуным иамалхэр къызIэкIигъэ­хьанхэ ыкIи бжьэхъупIэ ящагу щигъэпсын гухэлъ иIэу предпринимательхэм IэпыIэгъу афэхъугъэнымкIэ программэм ар хэлэжьагъ. Сомэ миллионрэ мин 243-рэ хъурэ грантэу ащ къыратыгъэмкIэ бжьэматэхэр къызэрэрищэкIыщтхэр, нэмыкIэу ящыкIэгъэ­щтхэр къызIэкIигъэхьагъэх, ежь иахъщэ хигъахъуи, бжьэхэр, бжьэматэхэр къыщэфыгъэх.
Шэуджэн районым щыпсэухэрэм къэралыгъо IэпыIэгъур чанэу агъэфедэ. Рустам зыхэлэжьэгъэ программэр УФ-м и Президентэу Владимир Путиныр кIэщакIо зыфэхъугъэ лъэпкъ проектэу «Бизнес цIыкIур ыкIи гурытыр, предпринимательхэр кIэщакIо зыфэхъугъэхэм япхырыщынкIэ адеIэгъэныр» зыфиIорэм къыдыхэлъытагъэхэм ащыщ.
Мыгъэ Бгъуашэ Рустам апэрэу бжьэматэхэр къызэтырихыгъэх.
— Бжьэхъуныр Iоф псынкIэп, — еIо Рустам, — бэ Iофыгъоу пылъыр: бжьэхэм узэрадэлэжьэщт амалхэр зэбгъэгъотыныр, шъоур къэзыхьырэ бжьэмэ щэнаут зэфэшъхьаф­хэм зэрар къарамыхыным, бжьэхъуныр щынэгъон­чъэу щытыным уапылъыныр, бжьэматэхэр маркировкэ шIыгъэнхэр, узхэм ащыуухъумэнхэр, бжьэматэхэр мэзхэм ыкIи нэмыкI чIыпIэхэм ащыгъэуцу­гъэнхэр, нэмыкIхэри.
Бжьэмэти 100 фэдиз Рустам зэригъэгъотыгъ. Пчэдыжьым жьэу регъа­жьэшъ, пчыхьэ нэс ащ хъызмэтшIапIэм Iоф щешIэ, бжьэхэр сымаджэ мыхъунхэм фэшI пэшIорыгъэшъ Iофтхьабзэхэр адызэрехьэ, шъоур кIещы, бжьэматэхэр еукъэбзых.
Шъоу къэзыхьырэ бжьэхэр къэмысымэджэнхэм лъыплъэгъэныр, Iэзэгъу уцхэр гъэфедэгъэнхэр Iофыгъо шъхьаI. Шъоу къэзыхьырэ бжьэ лъэпкъышIухэр къэухъумэгъэнхэм, бжьэхъунымкIэ техно­логиякIэу щыIэхэр гъэфедэгъэнхэм иамалхэр Рустам къызIэкIигъэхьагъэх.
Рустам къызэрэтфиIотагъэмкIэ, яунагъокIэ бжьэхъуным зыпылъхэр илъэс пчъагъэ хъугъэ. Зэрифэшъуашэу хъыз­мэтшIапIэр ыIыгъыным ар фэзыгъэсагъэр ятэжърэ ятэшымрэ. Рустамрэ ишъхьэгъусэу Русетэрэ сабый дэхитIу, Аишэрэ Ануррэ, зэдапIу. Бжьэхэм анэмыкIэу, былымхэр ыкIи щагубзыухэр ахъу, бжьэхэм къякIущт чъыгхатэ агъэ­тIысхьагъ.
Бжьэхэм нахь дэгъоу шъоу къатыным фэшI бжьэматэхэр Адыгеим ыкIи Краснодар краим ичIыпIэ зэфэшъхьафхэм Рустам ещэх. Мэлылъфэгъум бжьэхэр шъофым ыщэнэу ащ ыгъэхьазырыгъэх.
Имурадхэр къыдэхъунхэу, Iофэу ри­хьыжьагъэм гухахъо хигъуатэу псэунэу бжьэхъо ныбжьыкIэм тыфэлъаIо.
Лъэпшъыкъо Фатим.
Сурэтыр: Iэшъынэ Аслъан.