Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу АР-м и ЛIышъхьэрэ АР-м иминистрэхэм я Кабинетрэ я Администрацие ипащэ игуадзэу Хъоткъо Саниет хэбзэнчъэу хэкI­хэр зыщыратэкъурэ чIыпIэхэм якъыхэгъэщынрэ ягъэкъэбзэжьынрэ афэгъэ­хьыгъэ зэIукIэр зэрищагъ.

Iофтхьабзэм хэлэжьагъэх Росприроднадзорым АР-мкIэ ыкIи Краснодар краимкIэ и ГъэIорышIапIэ иотделэу псыр, жьыр, чIыгухэр зэрагъэфедэхэрэм ыкIи къызэраухъумэхэрэм гъунэ алъызыфырэм ипащэу Анатолий Николаевыр, АР-м тыкъэзыуцухьэрэ дунаим икъэухъумэнкIэ ыкIи чIыопс къэкIуапIэхэмкIэ и ГъэIорышIапIэ ипащэу Сергей Колесниковыр, АР-м хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ и Къэралыгъо автоинспекцие иотдел ипащэ игуадзэу Алексей Ковтуновыр, республикэм икъалэхэмрэ ирайонхэмрэ яадминистрациехэм ялIыкIохэр.
Росприроднадзорым къызэритыгъэмкIэ, хэкIхэр хэбзэнчъэу зэрэратэкъу­хэрэмкIэ зиIоф нахь дэйхэр Тэхъутэмыкъое, Теуцожь районхэр ыкIи Адыгэ­къал. Мы муниципалитетхэм хэкIэу ащаратэкъурэм ызыныкъо нахьыбэр республикэм къыхимыубытэрэ чIыпIэхэм къаращы. Мыщ фэдэ хэбзэукъоныгъэ зышIыхэрэм ягъогупэ пыбзыкIыгъэным ГИБДД-м ыкIуачIэ нахь лъэшэу зэрэрихьылIэн фаер зэIукIэм къыщаIуагъ.
Хэбзэнчъэу хэкIхэр зэрэратэкъухэ­рэмкIэ чIыпIэхэм яIофхэм язытет нэужым тегущыIагъэх. ХэкIитэкъупIэхэр укъэбзыжьыгъэнхэм пае муниципалитетхэм пыдзэфэ пытэхэр Iузыщырэ шъолъыр операторым зэзэгъыныгъэхэр дашIых. Ау хэкIхэр унэе чIыпIэхэм защаратэкъухэкIэ, а чIыгу Iахьхэр зыехэм хэкIхэм яIущынкIэ лицензие зимыIэ организациехэр бэрэ къызфагъэфедэх. Зы чIыпIэ щылъыгъэ хэкIыр ахэм нэмыкI чIыпIэ агъэкощы нахь, хабзэкIэ агъэнэфэгъэ хэкIитэкъупIэм ащэрэп. ХэкIитэкъупIэхэм ягъэкъэбзэжьын епхыгъэ унашъохэр агъэцакIэхэ зыхъукIэ, унэе, юридическэ лицэхэм хабзэр амыукъоным гъунэ лъафынэу зэIукIэм хэлэжьагъэхэм игъо алъэгъугъ.
Джащ фэдэу къулыкъу зэфэшъхьафхэм ялIыкIохэр зыхэхьащт куп зэхащэнэу зэIукIэм унашъо щаштагъ. Ащ фэдэ купым ипшъэрылъхэм ахэхьэ хабзэм димыштэрэ хэкIитэкъупIэхэм ядэгъэзыжьынкIэ нахьыбэу шIуагъэ къэзытыщт амалхэу зэрахьащтхэр гъэнэфэгъэнхэр.
ЗэIукIэм икIэуххэр зэфихьысыжьхэзэ, Хъоткъо Саниет зэрэхигъэунэфыкIы­гъэмкIэ, республикэм ичIыопс къэбзэным епхыгъэ Iофыгъохэм республикэм и ЛIышъхьэ ренэу ынаIэ атырегъэты.
«Хэбзэнчъэ хэкIитэкъупIэхэм якъыхэгъэщынкIэ ыкIи ядэгъэзыжьынкIэ Iофыгъоу къэуцу­хэрэр зэкIэ тызэгъусэу зэхэтфынхэ, мы лъэныкъомкIэ къулыкъу зэфэшъхьафхэм зэдырагъаштэу Iоф зэрашIэщт шIыкIэр къыхэтхын фае», — къы­Iуагъ Хъоткъо Саниет.