«Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къыдыхэлъытагъэу псауныгъэм икъэухъумэн епхыгъэ учреждениехэм якIолIэрэ гъогу километритIу фэдиз 2024-рэ илъэсым Адыгеим щагъэцэкIэжьыщт.

Лъэпкъ проектым хэлэжьэрэ шъолъыр 84-мэ яIэзапIэхэм, ясымэджэщхэм, амбулаториехэм, медицинэм инэмыкI псэуалъэу яIэхэм якIолIэрэ гъогу Iахь 500 мы илъэсым агъэцэкIэжьынэу агъэнэфагъ.
Адыгеир пштэмэ, ащ фэдэу агъэкIэжьыщтхэм ащыщ Мыекъопэ район сымэджэщэу поселкэу Тульскэм дэтым уезы­щэлIэрэ гъогур. Ар отделение зэфэшъхьафыбэ зиIэ IэзэпIэ гупчэшху, чэщи, мафи нэбгырэ 200-мэ япсауныгъэ щызэтырагъэуцожьыным телъытагъ. Арышъ, медицинэ IэпыIэгъу зищыкIагъэу е иIахьыл чIэлъэу екIуалIэхэрэмкIи, Iоф щызышIэхэрэмкIи гъогум игъэкIэжьын мэхьанэшхо иI.
БлэкIыгъэ илъэсым «Къоджэ псэупIэхэм хэхъоныгъэхэр ягъэшIыгъэнхэр» зыфиIорэ программэм къыдыхэлъытагъэу мы сымэджэщым бгъу пстэумкIи къызэлъиубытырэ иурамхэм ягъогухэр агъэцэкIэжьыгъэх. Мыгъэ лъэпкъ проектым ишIуагъэкIэ шэпхъэшIухэм адиштэрэ гъогоу екIуалIэрэр километри 7,2-кIэ нахьыбэ хъущт.
Джащ фэдэу Красногвардейскэ районым игупчэ икIэу къуаджэу Адэмые кIорэ гъогум щыщ Iахь, километрэ хъоу, 2024-рэ илъэсым агъэкIэжьыщт. Ар шъолъыр мэхьанэ зиIэхэм ащыщ, Адэмые дэт амбулаторием урещалIэ.
Терапевтыр ыкIи кIэлэцIыкIухэм яIэзэрэ врачыр зычIэсхэу мафэрэ цIыфхэр чIэлъынхэм фытегъэпсыхьэгъэ учреждениер къоджэдэсхэм лъэшэу къашъхьапэ. Арышъ, гъогу дэгъу екIолIэным мэхьанэшхо иI. Ар мы илъэсым афашIыщт.