Федеральнэ проектэу «Iэрыфэгъу къэлэ щыIакIэ гъэпсыгъэныр» зы­фиIорэм къыдыхэлъытагъэу зэтырагъэпсыхьащт чIыпIэхэм якъыхэ­хынкIэ мэкъэтынхэр гъэтхапэм и 15-м рагъэжьагъэх.

Урысыем ишъолъырхэм зэ­кIэми онлайн шIыкIэм тетэу ар ащэкIо. АдыгеимкIэ къалэу Мые­къуапэ, поселкэхэу Инэм, Яблоновскэр ары чIыпIэу гъэ­кIэжьыгъэн зищыкIагъэхэр къыз­щыхахыгъэхэр.
Адыгеим икъэлэ шъхьаIэ исаугъэт зэхэтэу «Памяти павших» зыфиIорэр, Лениным ыцIэ зыхьырэ гупчэр ыкIи Свято-­Успенскэ чылысым къыпэIулъ чIыпIэр зэнэкъокъум хагъэлэ­жьэнэу къырагъэуцуагъэр.
Поселкэу Яблоновскэм иура­мэу Кочубей ыцIэ зыхьырэм тет спортплощадкэр, урамэу Космическэм общественнэ чIыпIэу иIэр, мы урам дэдэм тет кIэлэцIыкIу спортплощадкэр ары къыхахыгъэхэр.
Къэлэ гъэпсыкIэ зиIэ Инэм псэупIэ коимкIэ поселкэу Дружнэм иурамэу Крестьянскэм тет гупчэр, къуаджэу БжыхьэкъоякIэм культурэм и Унэу дэтым къыпэIулъ чIыпIэр ары цIыфхэм амакъэхэр зыфатыхэрэр.
ЦIыфхэр мэкъэтынхэм ахэлэжьэнхэмкIэ гуфакIохэр Iэпы­Iэгъу афэхъух. Ащ пае АР-м ныбжьыкIэ IофхэмкIэ и Комитет илъэс 14 — 35-рэ зыныбжь нэ­бгырэ 334-рэ пстэумкIи ыгъэ­хьазырыгъ. Ахэр урамхэм атет­хэу смартфонхэр агъэфедэзэ цIыфхэм адеIэх.
Мэкъэтынхэм яапэрэ мэфищ, гъэтхапэм и 15-р, и 16-р ыкIи и 17-р УФ-м и Президент ихэ­дзынхэр зыщыкIощтхэм тефагъ. Ащ фэшI хэдзыпIэ участкэу мы муниципальнэ образованиищым къащызэIуахыгъэхэм ячIэхьа­гъухэм ахэр аIутыгъэх. АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, псэупIэу къыхахыхэрэм адэсхэу нэбгырэ мини 8-м
ехъу мэкъэтынхэм ахэлэжьэ­гъах. Мэлылъфэгъум и 30-м нэс ахэр кIощтых. Арышъ, а пчъагъэм джыри зэхъокIыныгъэхэр зэ­рэфэхъущтхэр нафэ. ГуфакIохэм яIофшIэни зэпагъэугъэп. Ахэм джы агъэкIэжьыщт чIыпIэу къыхахыгъэхэм Iоф ащашIэ.
Джащ фэдэу къэралыгъо фэIо-фашIэхэм япортал бгъэфедэзэ умакъэ птын плъэкIынэу щыт. Ащ ищыкIэгъэ ссылкэри гуфакIохэм къыуатыщт.
Илъэс 14-м зыныбжь шIокIыгъэу шIоигъоныгъэ зиIэхэр зэкIэ мэкъэтынхэм ахэлэжьэнхэ алъэкIыщт. Нахьыбэу цIыфхэм амакъэхэр зыфатыхэрэр 2025-рэ илъэсым агъэкIэжьыщтых.
УФ-м и Президентэу Вла­димир Путиныр кIэщакIо зы­фэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм ипхырыщын пае аштэгъэ федеральнэ проектэу щыт «Iэры­фэгъу къэлэ щыIакIэ гъэпсы­гъэныр» зыцIэр. Ащ ишIуагъэкIэ 2017-рэ илъэсым къыщыублагъэу 2023-м нэс Адыгеим чIыпIэ 322-рэ зэтыра­гъэ­псыхьа­жьыгъ. Ахэм ащыщэу 216-р фэтэрыбэу зэхэт унэхэм ящагух, 106-р общественнэ чIыпIэх.
ХЪУТ Нэфсэт.