ФедэхэкIыпIэу щымыт организациехэр непэ тищыIэныгъэ пытэу
къы­хэуцуагъэх. Гъэ къэс ахэм япчъагъэ хэхъо.

Адыгеир пштэмэ, ащ фэдэ организацие 600-м ехъу щэлажьэ. Ащ ипчъэгъэшIу, 500-м нахьыбэр, социальнэ IофшIэным фэгъэзагъэх. БлэкIыгъэ илъэсым итыгъэгъэзэ мазэ къыщегъэжьагъэу ахэм адэлэжьэрэ Оператор шъхьаф Адыгеим иIэ хъугъэ. АР-м IофшIэнымрэ социальнэ хэхъоныгъэмрэкIэ и Министерствэ ар епхыгъэу мэлажьэ ыкIи ащ ыгъэцакIэщтыгъэ Iофхэр гражданскэ обществэм ихэхъоныгъэ тегъэпсыхьэгъэ грантхэр зыгощырэ Операторым джы зэшIуехых.
— ТапэкIэ АР-м IофшIэнымрэ социальнэ хэхъоныгъэмрэкIэ и Министерствэ грантхэм ятынкIэ ригъэкIокIыщтыгъэ зэнэкъо­къухэр тэ зэхэтщэщтых, федэ­хэкIыпIэу щымыт организациехэм тхылъ гъэпсынхэмкIэ Iэ­пы­Iэгъу тафэхъу, нэужым япроект­хэр гъэцэкIагъэ зэрэхъухэрэм тылъыплъэщт, зэфэхьысыжьхэр тыуплъэкIущтых, — еIо Федэ­хэкIыпIэу щымыт организациеу «Гражданскэ обществэм ихэ­хъоныгъэ тегъэпсыхьэгъэ грантхэр зыгощырэ Оператор» зыфи­Iорэм ипащэу Бэгъырэт Азэ­мат. — Мыщ фэдэ шIыкIэкIэ нэмыкI шъолъырхэри мэлажьэх, тэщ фэдэу джы те­хьажь къодыехэри ахэтых.
АМ: Сыда ащ шIуа­гъэу къыхьырэр?
— АпэрэмкIэ, гъэцэкIэкIо ха­бзэм иIофшIэн Iахь шъхьащэтэхы, ятIонэрэмкIэ, — грантхэм ятынкIэ зэнэкъокъум ирегъэ­кIокIын къегъэпсынкIэ. Хэбзэгъэуцугъэм елъытыгъэу гъэцэ­кIэкIо хабзэм ышIэн зыфимытыр тэ, Операторым, тфызэшIокIы. ГущыIэм пае, зэнэкъо­къухэм къядгъэблэгъэрэ экспертхэм лэжьапкIэ яттын тыфит, — еIо Бэгъырэт Азэмат.
Ягухэлъхэр агъэцэкIэнхэмкIэ къэралыгъо грантхэм акIэлъэIун фитхэр федэхэкIыпIэу щымыт организациехэу социальнэ Iоф­шIэнхэр зыгъэцакIэхэрэр ары. Ахэр ыпкIэ хэмылъэу цIыфхэм япсауныгъэ икъэухъумэн дэлажьэхэрэр, чIыпIэ къин ифагъэхэм IэпыIэгъу языгъэкIы­хэ­рэр, шIушIэным фэгъэзагъэхэр ары. Мыхэм гупыкI зиIэ цIыфхэм къаратырэ ахъщэ IэпыIэ­гъум фэшъхьафэу, къэралыгъо грантхэм ягъэфедэнкIэ зэнэ­къокъухэм ахэлажьэх, зыпхыры­кIыхэкIэ къафатIупщырэ ахъщэр япроектхэм ягъэцэкIэн пэ­Iуагъахьэ. Мыщ фэдэ зичэзыу зэнэкъокъур мэлылъфэгъум и 1-м къыщегъэжьагъэу и 30-м нэс кIощт ыкIи мыгъэрэ грантэу къатIупщыщтыр фэдитIукIэ на­хьыбэ хъугъэ.
— Ары, мы илъэсым респуб­ликэ бюджетым грантэу сомэ миллион 30 къытIупщыщт. Ыпэрэ илъэсхэм ар сомэ миллион 15 зэрэхъущтыгъэр. Ащ фэшъхьа­фэу, Президентскэ грантхэм яфонди тыхэлажьэ. ПэшIоры­гъэшъэу къызэрэтаIуагъэмкIэ, ащ къикIэу сомэ миллион 14-м ехъу мыгъэ Адыгеим къыфа­гъэкIощт. Арышъ, тIури зэхэтэу мыгъэрэ IэпыIэгъоу мысатыушI организациеу социальнэ Iофхэр зыгъэцакIэхэрэм агъотыщтыр сомэ миллион 40-м къехъу. Ащ елъытыгъэу зы организацием сомэ миллион 1,5-рэ ратыщт. Ыпэрэ илъэсхэм ар сомэ мин 300-кIэ нахь мэкIагъ, — къыддэгощагъ Бэгъырэт Азэмат.
ФедэхэкIыпIэу щымыт организациехэм адэлэжьэрэ Операторым шIоигъоныгъэхэр мэлылъфэгъум ыугъоихымэ, ащ къыкIэлъыкIорэ мэзэ зытIум зэфэхьысыжьхэр къэнэфэщтых, грантхэр зэратыщтхэм ацIэхэр къыраIощтых. Ахэр зытефэу алъытэщт проектхэм ягъэцэ­кIэнкIэ илъэситIу пIалъэр араты. ЗыгорэкIэ ащ хэлажьэ зышIоигъоу, ау ишIыкIэ зымы­шIэхэрэм, упчIэ зиIэхэм шъо­лъыр Операторыр IэпыIэгъу афэхъущт.
Анцокъо Ирин.