Хабзэ зэрэхъугъэу, илъэс къэс Iофтхьабзэу «Белая ромашка» зыфиIорэр жъэгъэ­узым пэуцужьыгъэнымкIэ Адыгэ республикэ клиническэ диспансерым зэхещэ.

Мыекъуапэ щыпсэухэрэм ыкIи къеблэгъагъэхэм ыпкIэ хэмылъэу флюорографие зыщашIын алъэкIыщт мобильнэ автомобилыр Лениным ыцIэ зыхьырэ гупчэм гъэтхапэм и 21-м къыщыуцугъ.
Жъэгъэузым пэшIуекIогъэным мы Iофтхьабзэр фэIорышIэ. Узыр хэмыужъыныхьэзэ къыхэбгъэщмэ нахь гъэхъужьыгъошIу зэрэхъурэр, япсауныгъэ лъыплъэнхэ, нахь зыфэсакъы­жьынхэ фаеу зэрэщытыр мыщ­кIэ къыраIотыкIыгъ.
1882-рэ илъэсым гъэтхапэм и 24-м зэкIэми зэлъашIэрэ микробиологэу Роберт Кох жъэгъэузым «ипалочкэ» къы­гъотыгъ, ащ ыпкъ къикIыкIэ цIыфхэм уз хьылъэхэр яIэ зэ­рэхъурэр ыгъэунэфыгъ. А уахътэм къыщегъэжьагъэу мы мафэр мэфэпчъым щыхагъэунэфыкIэу аублагъ ыкIи Iофтхьабзэм «Белая ромашка» зыфиIорэ тамыгъэ фагъэшъошагъ.
— Мы мафэм шIоигъоныгъэ зиIэ пстэуми, блэкIэу къэзылъэ­гъугъэхэми, къэбарыр зышIэу изыхъухьагъэхэми чэзыум хэмытхэу, псынкIэу, ыпкIэ хэмы­лъэу флюорографиер ашIын амал яI. Непэрэ Iофтхьабзэм пшъэрылъ шъхьаIэу иIэр жъэгъэ­узым икъыхэгъэщынкIэ флюорографие уплъэкIуныр амалышIоу зэрэщытыр ягъэшIэгъэныр ары. Джащ фэдэу мы узым гумэкIыгъоу къыздихьын ылъэ­кIыщтхэр цIыфхэм алъыдгъэIэсыным, япсауныгъэ изытет нахь лъыплъэнхэм тынаIэ тет. Ащ дакIоу, мыщ фэдэ уплъэкIуным жъэгъэузым имызакъоу, нэмыкI узхэри къыхигъэщынхэ елъэкIы, — къыIуагъ жъэгъэузым пэуцужьыгъэнымкIэ Адыгэ республикэ клиническэ диспансерым иврачэу Валерий Терещенкэм.

Джащ фэдэу тигущыIэгъу къызэрэхигъэщыгъэмкIэ, маши­нэр къызыщыуцугъэ зы сыхьатым къыкIоцI нэбгырэ 20-мэ уплъэкIуныр афашIыгъ. Пчэды­жьым сыхьатыр 10-м къыщегъэ­жьагъэу мафэм сыхьатыр 2-м нэс нэбгырэ 75-м ехъумэ ятхьа­былхэр ауплъэкIугъ. Iофтхьабзэу «Белая ромашка» зыфиIорэм къекIуалIэхи зыщязгъэуплъэкIугъэхэм япсауныгъэ изытет зэ­рытхэгъэщт тхьапэхэр зы мафэ зытешIэкIэ жъэгъэузым пэуцу­жьыгъэнымкIэ республикэ диспансерым къащаратыжьыщт.
Мы Iофтхьабзэм лъэныкъо зэ­фэшъхьафхэмкIэ диспансерым иврачхэр хэлэжьагъэх. КъекIо­лIэгъэхэ цIыфхэм флюорографие зэрашIыгъэм имызакъоу, зыгъэгумэкIырэ упчIэхэмкIэ ахэм зафагъэзэн амал яIагъ.
Зипсауныгъэ языгъэуплъэ­кIу­мэ шIоигъоу къыIухьэгъэ нэбгырэ заулэмэ гущыIэгъу тафэ­хъугъ.
Александр Полянскэр, пенсионер, илъэс 67-рэ ыныбжь:
— Сыныбжь елъытыгъэу си­псауныгъэ сылъыплъэжьыным ыуж сит. Ащ хэхьэ ситхьабылхэр илъэсым зэ язгъэуплъэкIунхэр. Апэрэп мыщ сыкъызэрыкIорэри, мы амалыр Iэрыфэгъу дэдэу сэлъытэ. УплъэкIуным изэфэхьысыжьхэр зэрыт тхьапэр къызысатыжькIэ, сызхэтхэгъэ поликлиникэм къыщысэIэзэрэ вра­чым есхьылIэжьыщт.
Кравченко
Елена Николай ыпхъу, илъэс 52-рэ ыныбжь:
— Илъэсищ хъугъэу мыщ сыкъекIуалIэ. Гъэнэфагъэу непэ мы Iофтхьабзэр зэрэзэхащэщтыр социальнэ хъытыухэм къарысыджыкIыгъ. Чэзыуми тыхэмытэу, псынкIэу флюорографиер ткIунымкIэ мыр амалышIу дэдэу сэлъытэ.
НэкIубгъор
зыгъэхьазы­рыгъэр
Iэшъынэ Сусан.