Урысыем ичемпионат и Суперлигэ хэлэжьэрэ «АГУ-Адыифым» зичэзыу ешIэгъоу иIагъэр Мыекъуапэ щыкIуагъ, командэу «Динамо-Синара» зыфиIорэр тикъалэ къеблэгъагъ. ЗэIукIэгъум хьакIэхэм текIоныгъэр къыщыдахыгъ.

«АГУ-Адыиф» (Мыекъуапэ) — «Динамо-Синара» (Волгоград) — 23:34.
Командэхэм ахэт ешIакIохэм якъэгъэлъэгъонхэм шъуащытэ­гъэгъуазэ:
«АГУ-Адыиф»: Кобл — 5, Миловар — 4, Терлецкаяр — 3, Болоба — 3, Томилинар — 3, Кавера — 2, Бондаренкэр — 2.
«Динамо-Синара»: Турусинар — 6, Шкитинар — 5, Семинар — 4, Безбабных — 4, Судаковар — 3, Белолипецкаяр — 3, Васильевар — 3, Дудкинар — 2, Долматовар — 2, Зэгородневар — 1.
ЕшIэгъум пчъагъэр къыщызэIузыхыгъэр тикомандэ хэт Ирина Бондаренкэр ары. Апэрэ таймым ипэублэ типшъашъэхэр дэгъоу ешIагъэх, я 11-рэ такъикъыр ары хьакIэхэр тапэ зишъыгъэхэр. Я 25-рэ такъикъым нэс командэхэм зы очко ныIэп азыфагу илъыгъэр. Ау нэужым Мыекъуапэ илIыкIохэм яешIакIэ нахь къеIыхыгъ, хэукъоныгъабэ ашIэу рагъэжьагъ. ЗэIукIэгъум икIэухым хьакIэхэр нахь зэрэлъэшхэр къыгъэлъэ­гъуагъ, пчъагъэр — 23:34.

Купэу «Б-м» хэт командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Динамо-Синара» — 34.
2. «Звезда» — 33.
3. «Ставрополье» — 17.
4. «АГУ-Адыиф» — 16.
5. «Луч» — 8.
6. «Университет» — 4.
   Зэнэкъокъум ипэшIорыгъэшъ едзыгъо аухынымкIэ командэхэм ешIэгъу тIурытIу къафэнагъ. Зичэзыу зэIукIэгъур тикомандэ Ставрополь щыриIэщт.