Урысыем ичемпионат и Апшъэрэ лигэ хэт командэхэм язэнэкъокъу иешIэгъу шъхьаIэхэр рагъэжьагъэх. Мыекъопэ «Динамо-МГТУ-р» Тобольскэ икомандэу «Нефтехимикым» IукIагъ.

«Нефтехимик» — «Динамо-МГТУ» — 73:60.
Зэнэкъокъум ипэшIорыгъэшъ едзыгъо Адыгеим икомандэ я 5-рэ чIыпIэр къыщыдихыгъ. Апэрэ ыкIи ятIонэрэ хъугъэх къалэу Магнитогорскэ къэзыгъэлъэгъорэ «Металлургымрэ» къалэу Грознэм икомандэу «Динамэмрэ». Ахэр занкIэу финалныкъом ихьагъэх ыкIи зыдешIэщтхэм яжэх.
«Нефтехимик» ыкIи «Динамо-МГТУ» зыфиIорэ командэхэм язэIукIэгъуитIу изэфэхьысыжьхэмкIэ текIоныгъэр къыдэзыхырэр «Металлургым» дешIэщт.

Адыгеим илIыкIохэр Тобольскэ щешIэнхэм пае километрэ мини 3-м ехъу къызэпачыгъ. «Динамо-МГТУ-р» финалныкъом Магнитогорскэ икомандэ щыIукIэным пае ешIэгъуитIум изэфэхьысыжьхэмкIэ «Нефтехимикым» текIон фае. Апэрэр Тобольскэ ибаскетболистхэм ахьыгъ. Джы ятIонэрэм тежэ.
«Динамо-МГТУ-м» хэтхэ Данила Донсковым ыкIи Николай Муха ешIэкIэ дахэ къагъэлъэгъуагъ.
Гъэтхапэм и 26-м мы командэхэр Мыекъуапэ щызэIукIэщтых, ыпэкIэ лъыкIотэщтыр къэнэфэщт.