Илъэс къэс шIушIэ Фондэу «ЛIэшIэгъухэм яшIэжь» зыфиIорэм Урысые Iофтхьабзэу «Красная гвоздика» зыфиIорэр зэхещэ. Ар окIофэ зэо зэфэшъхьафхэм яветеранхэм IэпыIэгъу афэхъугъэным къэралыгъом щыпсэурэ нэбгырэ пэпчъ иIахьышIу хилъхьан ылъэкIыщт.

Мэлылъфэгъум и 10-м къыщегъэжьагъэу мэкъуогъум и 22-м нэс ветеранхэм IэпыIэгъу афэхъу­гъэным фытегъэпсыхьэгъэ Iофтхьабзэр кIощт. Ащ Адыгейри хэлэжьэщт. Респуб­ликэм икъэлэ шъхьаIэ ыкIи ирайонхэм языгъэпсэфыпIэ чIыпIэхэм, урамхэм шIэжь мафэхэм афэгъэхьыгъэ патриотическэ Iофтхьабзэу ащырекIокIыщтхэм гуфакIохэм Iоф ащашIэщт, тамыгъэу «Красная гвоздика» зыфиIорэр ахэм къащышъущэфын шъулъэкIыщт. Джащ фэдэу олайн-тучанхэм, Урысыем и Почтэ икъутамэхэм ар ащыжъугъотыщт.
Ащэгъэ тамыгъэ пэпчъ ветеранхэм IэпыIэгъу афэхъугъэным изы Iахь мэхъу, Iэзэгъу уцхэр афащэфынхэм, медицинэ IэпыIэгъу арагъэгъотыным фэIорышIэ. Мыр тамыгъэ къодыеу щытэп, ащ къэралыгъор ветеранхэм зэрафэразэр къеушыхьаты.
Мы Iофтхьабзэр зызэхащэрэм щегъэ­жьагъэу гуфакIохэм сомэ миллион 44-м ехъу къаугъоигъ, а ахъщэмкIэ ветеран 565-мэ IэпыIэгъу арагъэгъотыгъ. Адыгэ Республикэм щыпсэурэ ветеран 19-мэ Фондыр къадеIагъ (сомэ 1 506 187-рэ).
Къаугъоирэ мылъкум ишIуагъэкIэ ветеранхэм ящыкIэгъэ джырэ лъэхъаным диштэрэ протезхэр, курэжъыехэр, зэрэзэхахыщт пкъыгъохэр арагъэгъотых, хэушъхьафыкIыгъэ медицинэ учреждениехэм реабилитациер ащарагъэкIу.
Урысые Iофтхьабзэр тишъолъыр щыпхырыщыгъэным икIэщакIор общественнэ движениеу «ТекIоныгъэм иволонтерхэр» зыфиIорэр ары.