Адыгэ къэралыгъо университетым правэмкIэ и Институт икIэлэегъаджэу Шъаукъо Ибрахьим литературнэ шIухьафтынэу «Илъэсым итхакIу» зыфиIорэм ифинал ихьагъ.

Повестэу «Клетка» зыфиIорэм чIыпIэ къин ифэгъэ пшъэшъэжъыем икъэбар къыщеIуатэ. 1990 — 2000-рэ илъэсхэм къатыбэу зэтет унэхэм ащыпсэущтыгъэ­хэм щыIакIэу яIагъэр къыщыреIотыкIы, нэхэм яIэзэрэ сэнэхьат зэзыгъэгъотыгъэ пшъэшъэжъыем къыкIугъэ гъогур, а лъэ­хъанхэм хабзэу щыIагъэхэр гъэшIэгъонэу къыгъэлъэгъуагъэх.
Лъэныкъохэу «Дебют» ыкIи «Реальные истории» зыфиIохэрэмкIэ Шъаукъо Ибрахьим зэнэкъокъум хэлажьэ.
Апэрэм творчествэм иапэрэ лъэбэкъу­хэр зышIыхэрэр ары хэлажьэхэрэр. Лъэныкъо, жанр зэфэшъхьафхэм афэгъэхьыгъэ ыкIи арылъ прозэхэр къыра­хьылIагъэх. ЯтIонэрэм тхакIохэм ящыIэныгъэ гъогу епхыгъэ къэбархэр зэрыт произведениехэр щызэхэугъоягъэх. Зэ­нэкъокъум мемуархэр, автобиографиехэр, атхыгъэ дневникхэр, ягукъэ­кIыжьхэр ыкIи ящыIэныгъэ епхыгъэ къэбархэр ыкIи нэмыкIхэр рахьылIагъэх.
Лъэпкъ литературэ шIухьафтынэу «Илъэ­сым итхакIу» зыфиIорэм тхакIохэм я Урысые союз кIэщакIо фэхъугъ. Урыс литературэм хэхъоныгъэ езыгъэшIын зылъэкIыщтхэр къыхэгъэщыгъэнхэр ары пшъэрылъ шъхьаIэу иIэр. Илъэсым къы­кIоцI зэнэкъокъур лъэныкъуихыкIэ зэтеутыгъэу макIо.
2023-рэ илъэсымкIэ текIоныгъэ къыдэзыхыгъэхэр гъэтхапэм и 21-м литераторхэм я Гупчэ унэ ащыфэгушIощтых. Поэзием и Дунэе мафэ ар тырагъэ­фэщт.
Адыгэ къэралыгъо
университетым
ипресс-къулыкъу.