Наркотикхэм ащыухъумэгъэнхэм фэIорышIэ

Урысые Iофтхьабзэу «Хьадэгъур зыщащэрэр ошIэмэ, макъэ къэгъэIу!» зыфиIоу илъэс къэс зэхащэрэм иапэрэ уцугъо Адыгеим щырагъэжьагъ.

Ащ пшъэрылъэу иIэр наркотикхэр хэбзэнчъэу къы­зэрэрагъэкIокIыхэрэм пэуцужьыгъэным общественностыр къыхэгъэлэжьэгъэныр, наркотикым пыщэгъэ цIыфхэм ягъэхъужьынкIэ IэпыIэгъу афэхъугъэныр, ахэр щыIэныгъэм хэгъэгъозэжьыгъэнхэр ары.
Iофтхьабзэм хахьэу гъэтхапэм и 18-м къыщегъэ­жьагъэу и 29-м нэс Адыгеим иполицие икъулыкъу­шIэхэм цIыфхэм зафагъэзэщт, наркотикхэр хэбзэнчъэу къызэрэрагъэкIокIыхэрэм, зэрагъэфедэхэрэм ыкIи ар зыхэлъ пкъыгъохэр зэрэIуагъэкIыхэрэм афэгъэхьыгъэ къэбархэм ащагъэгъозэщтых.
Iофтхьабзэм пшъэрылъэу иIэр наркотикхэр хэбзэнчъэу къызэрэрагъэкIокIыхэрэм пэуцужьыгъэным общественностыр къыхэгъэлэжьэгъэныр, наркотикхэм апыщэгъэ цIыфхэм ягъэхъужьынкIэ IэпыIэгъу афэхъугъэныр, ахэр щыIэныгъэм хэгъэгъозэжьыгъэнхэр ары.
Наркотикхэр хэбзэнчъэу къызэрэрагъэкIокIыхэрэм, зэрагъэфедэхэрэм ыкIи ар зыхэлъ пкъыгъохэр зэрэIуагъэкIыхэрэм афэгъэхьыгъэ къэбархэм ащыгъуазэхэм хэгъэгу кIоцI къулыкъухэм макъэ арагъэIуным къыфэджэх.
АР-м хэгъэгу кIоцI IофхэмкIэ и Министерствэ «ицыхьэшIэгъу телефонэу» (8772) 59-64-00-м е полицием идежурнэ отдел иномерэу 02 (102-м) шъуатеон шъулъэкIыщт. Къэбарэу къытIэкIэжъугъахьэрэм цIыфым ипсауныгъэ ыкIи ищыIэныгъэ къызэтегъэнэжьыгъэнымкIэ бэ елъытыгъэщтыр.
Джащ фэдэу Адыгэ республикэ наркологическэ диспансерым ителефон номерэу (8772)543-543-м Iоф ешIэ.
Наркотикхэм апыщагъэ хъугъэхэр АР-м наркотикхэм апэшIуекIогъэнымкIэ комиссием ителефон номерэу (8772) 52-17-21-м теонхэ алъэкIыщт.

УплъэкIунхэр зэхещэх

ГъэпцIагъэ зыхэлъ бзэджэшIагъэ къызэрэдызэрахьагъэм фэгъэхьыгъэу Мыекъуапэ щыпсэурэ илъэс 63-рэ зыныбжь хъулъфыгъэм хэгъэгу кIоцI IофхэмкIэ Министерствэм иотделэу Мыекъуапэ щыIэм зыфигъэзагъ.

Следственнэ-оперативнэ купым икъулыкъушIэхэм зэрагъэунэфыгъэмкIэ, ымышIэрэ цIыфым зыдэгущыIэ нэуж пенсионерым иахъщэ шIокIодыгъ.
2024-рэ илъэсым гъэтхапэм иапэрэ мафэхэм адэжь зэкъодзакIохэр мессенджерымкIэ хъулъфыгъэм фэтхагъэх. ЫпэкIэ ащ пащэу иIагъэм иаккаунт къызфагъэфеди, хэбзэухъумэкIо къулыкъухэм закъыфигъэзэн зэрилъэкIыщтыр ащ фатхыгъ.
Нэужым хэбзэ рэхьатныгъэм иухъумакIохэу аIозэ хъулъфыгъэм фытеуагъэх. Ахэм пенсионерым раIуагъ финанс операциехэр хэбзэнчъэу зэрэригъэкIокIыгъэхэмкIэ зэрегуцафэхэрэр ыкIи уголовнэ пшъэдэкIыжь рагъэхьын зэралъэкIыщтыр.
Гузэжъогъу ифэгъэ хъулъфыгъэр зэрыт чIыпIэм къикIыным фэшI гъэпцIакIохэм цыхьэ афишIыгъ. «Щынэгъончъэ» счетым ахъщэшхо афыригъэхьан фаеу къызыраIом, банки 5-мэ зафигъэзагъ ыкIи ахэм чIыфэ къаIихыгъ.
Ащ нэмыкIэу Мыекъуапэ ыкIи Тэхъутэмыкъое районым ащыIэ банкоматхэмкIэ ежь ыугъоигъэ ахъщэм щыщ афыригъэхьагъ. ЗэкIэмкIи ащ шIокIодыгъэр сомэ миллионрэ мин 670-рэ мэхъу.
Мы уахътэм ехъулIэу следствием уголовнэ Iоф къызэIуихыгъ, зэхэфынхэр макIох.

Хэбзэ рэхьатны­гъэр ыкIи щынэгъончъагъэр къаухъумагъ

2024-рэ илъэсым гъэтхапэм и 15-м къыщегъэжьагъэу и 17-м нэс Урысые Федерацием и Президент ихэдзынхэр Адыгеим щыкIуагъэх.

Общественнэ рэхьатныгъэр къэухъумэгъэным, гъо­гухэр щынэгъончъэнхэм афэшI хэдзыпIэ участкэхэм мафэ къэс хэбзэухъумэкIо миным ехъумэ къулыкъур ащахьыгъ.
Къэралыгъо автоинспекцием икъулыкъушIэхэм хэдзынхэр зыщыкIорэ чIыпIэхэм апэгъунэгъоу къулыкъур ащахьыгъ, гъогурыкIоныр щынэгъончъэу щытыным лъыплъагъэх.

Гъогогъу 16-рэ ятыгъуагъэх

Урысыем хэгъэгу кIоцI IофхэмкIэ и Министерствэ имежмуниципальнэ отделэу «Кощхьабль» зыфиIорэм идежурнэ часть Мыекъуапэ щыпсэурэ илъэс 35-рэ зыныбжь бзылъфыгъэм зыфигъэзагъ.

Литрэ 50 зэрыфэрэ гъэстыныпхъэ зэрыт баллоныр ымышIэрэ цIыфым зэрэшIуитыгъугъэр ащ къариIуагъ. Мы хъугъэ-шIагъэмкIэ уголовнэ лъыхъуным иотдел икъулыкъушIэхэм илъэс 68-рэ зыныбжь хъулъфыгъэу мы районым щыщыр къаубытыгъ. НэмыкI бзэджэшIагъэхэр ащ зэрихьагъэхэмэ джырэ уахътэм агъэунэфы.
Ащ нэмыкIэу, мы районым щыпсэурэ илъэс 49-рэ зыныбжь бзылъфыгъэм полицием иIофышIэхэм зафигъэзагъ. Чэщыр хэкIотагъэу ымышIэрэ цIыфыр хъызмэтшIэпIэ псэуалъэу иIэгу дэтыгъэм чIахьи электричествэ Iэмэ-псымэхэр зэрэчIитыгъукIыгъэр ащ къариIуагъ.
Джыри мыщ фэдэ хъугъэ-шIагъэ Тэхъутэмыкъое районым щагъэунэфыгъ. Илъэс 29-рэ зыныбжь хъулъ­фыгъэм имобильнэ телефон, банк картэр ыкIи нэ­мыкI хьап-щыпхэр иунэ ратыгъукIыгъэх.
Мы хъугъэ-шIагъэр зыщыхъугъэр Мыекъопэ районыр ары. Мыщ щыпсэурэ илъэс 31-рэ зыныбжь бзылъфыгъэм идышъэ пкъыгъохэр ыкIи сомэ мини 8 шIуатыгъугъэх.
Джащ фэдэу Джэджэ районым илъэс 24-рэ зы­ныбжь бзылъфыгъэм иунэ пщэрыхьапIэм щагъэфедэрэ техникэр ыкIи нэмыкI пкъыгъохэр рахыгъэх. Полицием иIофышIэхэм зэрагъэунэфыгъэмкIэ, бзэджашIэхэм пчъэм иIункIыбзэ Iуатхъи, унэм ихьагъэх.
Мы уахътэм ехъулIэу полицием икъулыкъушIэхэм бзэджэшIагъэ зезыхьагъэхэр агъэунэфы, уголовнэ Iоф къызэIуахыщт.
Илъэс 38-рэ зыныбжь бзылъфыгъэу Мыекъуапэ щыпсэурэм иунэ ихьэхи ащ итыгъэ телевизорыр, электрическэ хьакур, нэмыкI хьап-щыпхэри ратыгъу­кIыгъэх.
Шъуиунэ зыгорэ ихьагъэу уж къыгъэнагъэу е псэупIэм пкъыгъо горэхэр икIодыкIыгъэу шъуегуцафэмэ полицием ителефон номерэу 02-м (мобильнэ номерэу 102-м) шъутеон шъулъэкIыщт.

Полицием иIофы­шIэхэм зызэрафэ­жъугъэзэн шъулъэкIыщтыр

ЦIыфхэм хэбзэнчъэу къадызекIуагъэхэмэ хэбзэухъумэкIо къулыкъухэм зафагъэзэн зэралъэкIыщтымкIэ АР-м хэгъэгу кIоцI IофхэмкIэ и Министерствэ макъэ арегъэIу.

Ахэм ащыщ письмэ шIыкIэм тетыр. Мыщ фэдэу ар тхыгъэн фае:

1. Письмэр зыфэптхырэ хэгъэгу кIоцI къулыкъум ыцIэ е зызфэбгъазэ пшIоигъо къулыкъушIэм ылъэкъуа­цIэ, ыцIэ, ятацIэ е иIэнатIэ. 2. Ежь цIыфым ылъэкъуа­цIэ, ыцIэ, ятацIэ. 3. Джэуапыр къыздагъэхьыжьыщт почтовэ адресыр. 4. УиIэпэкIадзэ ыкIи зыщыптхыгъэ мафэр. 5. ИщыкIагъэ хъумэ, письмэм техыгъэр ибгъэгъусэн плъэкIыщт.
   Даоу къаIэкIахьэхэрэр зэкIэ атхых. Нэужым ахэм захаплъэхэкIэ, уахътэу къафагъэуцугъэм къыриубытэу даор къэзытхыгъэм джэуапыр фагъэхьыжьы.
   АР-м и МВД джыри зэ цIыфхэм закъыфегъазэ бзэджэшIагъэ зэрахьагъэу е хабзэр аукъуагъэу щыгъуазэхэмэ, полицием икъулыкъушIэхэм макъэ арагъэIунэу. Шъугу къэтэгъэкIыжьы, ОВД-м телефонымкIэ ыкIи Интернетым исайткIэ хэбзэухъумакIохэм зафэжъугъэзэн шъулъэкIыщт. Джащ фэдэу министерствэм иофициальнэ сайтэу «Для граждан» зыфиIорэм игъэкIотыгъэ къэбарыр ижъугъотэщт.
   НэкIубгъор зыгъэхьазырыгъэр КIарэ Фатим.
   Сурэтхэр: АР-м и МВД