Гъэтхапэм и 21-р нысхъапэ зышIырэм и Дунэе маф. Непэ мы сэнэхьатым рылажьэрэр мэкIэ дэд. НэIуасэ шъузфэтшIыщт бзылъфыгъэм нысхъапэхэр ышIырэп, ау ефапэх.

Лъэпкъ IэпэIасэхэм яхудожественнэ IофшIагъэ цIыфхэм нахьышIоу алъыгъэIэсыгъэным пыщэгъэ Исае Анжелэ иIэшIагъэхэмкIэ кIэлэцIыкIухэр дэ­хагъэм фепIух. Пшысэм къы­хэхыгъэ нысхъапэхэр щыIэныгъэм щалъэгъун амал яIэным дэлажьэ. Адыгэ шъуашэхэр зыщыгъ нысхъапэхэр ащ
ешIы, нысхъапэ пэпчъ псэ иIэу елъытэ.
Анжелэ ицIыкIугъом къыщегъэжьагъэу иIэпэIэсэныгъэкIэ къахэщэу, пшъэшъэ чанэу, гу­бзыгъэу щытыгъ. Дэныр зикIэсэгъэ ныжъым ар кIырыплъыщтыгъ, ышIэрэр шIогъэшIэгъоныгъ. ЫгукIэ зыфэщэгъэ сэнэхьатыр непэ ищыIэныгъэ гъогу щегъэфедэ.
Анжелэ иIэпэIэсэныгъэ Адыге­им щызэлъашIэ. Ащ ыдыгъэ лъэпкъ шъуашэхэр зыщыгъ ныс­хъапэхэм ядэхагъэ нэр пIэпахы.
— Адыгэ шъуашэр сыдигъуи сыгу рихьыщтыгъ. СицIыкIугъом нысхъапэхэм сафэдэныр сикIэ­сагъ. Илъэси 6 сыныбжьыгъ сэе дэхэдэдэ сшыпхъу нахьыжъ къызысетым. Ащ дэжьым сызэрэгушIощтыгъэр къэсэшIэжьы. Сянэ адыгэ пщынэм къыригъаIо хъумэ сэри сшыпхъуи тыкъыдашъощтыгъ. Сэ ны сызэхъум, сипшъашъэхэу Данэрэ Мадинэрэ зэрыджэгухэрэ нысхъапэхэм адыгэ шъуашэхэр афэсыди ащыслъагъ. Непэ кIэлэцIыкIу­хэр згъэгушIонхэ амал зэрэсиIэм сегъэгушхо, ащ гухахъо хэсэ­гъуатэ. Илъэс 17 хъугъэ сыгукIэ сызфэщэгъэ IофшIэныр зызгъэ­цакIэрэр, — къытфеIуатэ Анжелэ. IэпэIасэм иIэшIагъэхэм якъэгъэлъэгъон Мыекъуапэ щэкIо. Илъэс зэкIэлъыкIохэм иIофшIэн хигъэхъуагъ, зэнэ­къокъу, фестиваль зэфэшъхьафхэм ахэлажьэ.
— АР-м лъэпкъ культурэмкIэ и Гупчэрэ Адыгеим культурэмкIэ и Министерствэрэ зэхащэгъэ Iофтхьабзэу «Адыгэхэм ядышъэи­д» зыфиIорэм сыра­гъэблэгъагъ, сиIэшIагъэхэр хагъэунэфыкIыгъэх. Ащ нэмыкIэу къалэу Москва ВДНХ-м щыкIорэ къэгъэлъэгъон-форумым сыхэлэжьагъ. Ащ «Iэпэ­Iасэм идышъэ хэдыкIын» зыфиIорэ десэхэр къыщыстыгъ. Шъолъыр пэпчъ ихэбзэ шIыкIэхэр къызщагъэлъэгъорэ фес­тивалым къыдыхэлъытэгъэ Iоф­тхьабзэхэм узахэлажьэкIэ, уишIэныгъэхэм ахэогъахъо, нэ­мыкIхэм Iоф зэрашIэрэр олъэ­гъу, щысэ зытепхынхэр мы­макIэу къахэкIых, — къыт­фе­Iуатэ Анжелэ.
Адыгэ шъуашэр нысхъапэм щыплъэным, ащ идын упылъыным пае щэIэгъэшхо пхэлъын фае. УиIофшIэн угу римыхьэу, гухахъо хэмыгъуатэмэ пфэгъэцэкIэщтэп. Сае е цые шIыгъахэр зыплъэгъукIэ, ащ фэдиз Iоф къыпыкIыми къыбгурыIорэп, зы хэдыкIын тэрэз зымышIыкIэ, итеплъэ къызэIэхьэ. IэпэIасэм иIофшIэн зэрифэшъуашэу зэригъэцэкIэщтым мэхьанэшхо реты, охътабэ тырегъэкIуадэ. Анжелэ дышъэ хэдыкIыным ишъэфхэр къыткIэхъухьэрэ лIэужхэм аригъэшIэным пылъ.
Анжелэ ипшъашъэхэу Данэрэ Мадинэрэ купэу «Ошъадэм» къыщышъощтыгъэх, хэдыкIыными ахэр пылъых, адыгэ шэн-хабзэхэр зэрахьэ.
Бзылъфыгъэ IэпэIасэм ицIыкIугъом зыкIэхъопсыщтыгъэ IофшIэныр непэ иI, ащ къы­щымыуцоу игъэхъагъэхэм ахигъэхъонэу, ыпэкIэ лъыкIотэнэу, игухэлъхэр къыдэхъунхэу тэ-
ри фэтэIо.
Лъэпшъыкъо Фатим.