Пшызэ шъолъыр икъэзэкъыдзэ иатаман игуадзэу Владислав Кири­ченкэмрэ мы шъолъырым ис къэзэкъ ныбжьыкIэхэм я Союз итхьа­матэу Даниил Дьяченкэмрэ Адыгеим ис къэзэкъ ныбжьыкIэхэм я Союз иIофшIэн зэрэзэхищэрэм нэIуасэ зыфашIыгъ.

Пшызэ шъолъыр къикIыгъэ хьакIэхэм къапэгъокIыгъэх ­Адыгеим ис къэзэкъ ныбжьыкIэхэм я Союз иправление хэтхэр, мы Союзым итхьаматэ, ныбжьыкIэхэм Iоф адэзышIэрэ къэзэкъхэу Александр Дани­ло­выр, Дмитрий Сурановыр, муниципальнэ отделениехэм япа­щэхэр ыкIи ахэм ягуадзэхэр. Къэзэкъ ныбжьыкIэхэр зэшIо­хыгъэн фэе Iофыгъохэм, тапэкIэ Iоф зэра­шIэщтым атегущы­Iагъэх,
Къалэу Мыекъуапэ икIэлэцIыкIу IыгъыпIэу N 55-у «Дельфиненок» зыфиIорэм чIэсхэр гуфэбэныгъэ хэлъэу къэзэкъхэм къапэгъокIыгъэх. Ахэм хьакIэхэм патриотическэ орэдхэр къафа­Iуагъэх, къафэшъуагъэх, усэхэм къафяджагъэх. Илъэситф зыныбжь Данил Якимцовым сэшхом игъэIорышIэнкIэ IэпэIэсэныгъэу хэлъыр къыгъэлъэ­гъуагъ. Интернетыр иIэпыIэгъоу сэшхор зэрэбгъэIорышIэщт шIыкIэм ащ зыфигъэсагъ.
КIэлэцIыкIу IыгъыпIэм чIэсхэр Адыгеим ис къэзэкъ ныбжьыкIэхэм я Союзрэ республикэм щыпсэухэрэмрэ непэ шIушIэ IэпыIэгъур къызэраугъоирэм ыкIи фронтым щыIэхэм ар зэраIэкIагъахьэрэм афэгъэхьыгъэ клипым ягуапэу еплъыгъэх. КIэлэцIыкIухэм хэушъхьафыкIыгъэ дзэ операцием хэлэжьэрэ дзэкIолIхэм апае ТекIоныгъэм ибыракъ икопие сурэтхэр тыра­шIыхьагъэх.
Станицэу Кужорскэм иеджапIэ икIэлэегъаджэхэмрэ ия 3 «А» класс ис къэзэкъ кIэлэ­еджакIохэмрэ хьэкIэ лъапIэхэм щыгъу-пIастэр апагъохыгъ. Мы классым ипащэу Светлана ­Хомяковам икIэлэеджакIохэм ягъэ­хъагъэхэм фэгъэхьыгъэ лъэтегъэуцор къыгъэхьазырыгъ, къэзэкъ кIэлэеджакIохэр станицэм, районым, Адыгеим ащызэ­хащэрэ Iофтхьабзэхэм, Адыгеим ис къэзэкъ ныбжьыкIэхэм я Союзрэ Мыекъопэ къэзэкъ отделымрэ яIофшIэн зэрахэла­жьэхэрэр къыIотагъ.
Къырым Урысыем зыхэ­хьа­жьыгъэр илъэси 10 зэрэхъугъэ­ми зэIукIэм щытегущыIагъэх. Адыгеим ис къэзэкъ ныбжьыкIэхэм я Союз хэт къэзэкъэу, ныбжьыкIэхэм Iоф адэзышIэу, «Къырым игъатхэ» зыфиIорэм хэлэжьэгъэ Александр Дани­ловым 2014-рэ илъэсым Украинэм къыщыхъугъэхэм афэ­гъэхьыгъэу зэIукIэм хэлажьэхэрэм къа­фи­Iотагъ.
Къэзэкъ кIалэр дзэм гъэкIо­тэгъэ­нымкIэ хабзэу ахэлъхэр къэ­зэкъ кIэлэеджакIохэм къагъэлъэгъуагъэх. КIэ­лэцIыкIухэм къэ­зэкъ культурэмрэ шэн-ха­бзэхэмрэ хэшIыкI зэрафыря­Iэр нэрылъэгъу къа­фашIыгъ.
Владислав Кириченкэм Кужорскэ гурыт еджапIэм иадминистрацие, мы станицэм икъэзэкъ обществэ лъэшэу зэрафэразэр къыхигъэщыгъ, ныбжьыкIэхэм япIун яIахь зэрэхашIы­хьэрэм фэшI «тхьа­шъуегъэпсэу» къариIуагъ.
Станицэу Кужорскэм игурыт еджапIэ чIэс къэзэкъ кIэлэцIыкIухэм хэушъхьафыкIыгъэ дзэ операцием хэлэжьэрэ дзэкIолI­хэм посылкэхэр ренэу афау­гъоих, письмэхэр афатхых. Адыгеим ис къэзэкъ ныбжьыкIэ­хэм я Союз итхьаматэ къыгъэ­хьазырыгъэ видеороликэу шIу­шIэ IэпыIэгъур фронтым щыIэхэм зэраIэкIагъахьэрэм фэгъэхьыгъэр мыхэми къафагъэлъэ­гъуагъ.
ХэушъхьафыкIыгъэ дзэ опера­цием хэлэжьэрэ Даниил Дьяченкэр кIэлэеджакIохэм къя­джагъ Iофэу зыпылъхэр лъагъэ­кIотэнэу, дзэкIолIхэм письмэ-
хэр афатхынэу, шIушIэ IэпыIэгъур афаугъоинэу. «Гуфэбэныгъэу къытпэжъугъохырэм ткIуа­чIэ нахь къыхегъахъо. КIэлэцIыкIу письмэм итхэр тыгу къы­зыкIыжьхэкIэ, тэрэзэу тызэрэзекIорэр къыдгурэIо. Шъуи­тхыгъэхэм нахь тагъэгушхо, ты­къызэкIэмыкIоу ыпэкIэ етэгъэхъу».
Станицэу Кужорскэм игурыт еджапIэ икIэлэеджакIохэми хэушъхьафыкIыгъэ дзэ операцием хэлажьэхэрэм апае ТекIоныгъэм ибыракъ икопие гущыIэ фабэхэр тыратхагъэх. ТекIоныгъэр тидзэкIолIхэм къыдахынышъ, псынкIэу ядэжь къагъэзэжьынэу ахэр афэлъэIуагъэх.
Джащ фэдэу Владислав Кириченкэмрэ Даниил Дьячен­кэмрэ къалэу Мыекъуапэ ирайон къэзэкъ обществэ идзэ-патриотическэ клубэу «Застава» зыфиIорэми щыIагъэх.
Екатерина Загорулько.
Адыгеим ис къэзэкъ ныбжьыкIэхэм я Союз ­итхьамат.