ЗекIонымкIэ чIыпIакIэу агъэнэфагъэм игъэпсын ДжэгокIо гъэхъунэм щылъагъэкIуатэ. Республикэ хэбзэ Iэшъхьэтетхэм ащ иинфраструктурэ ишIын зэрэкIорэм гъунэ лъафы. АР-м и ЛIышъхьэу КъумпIыл Мурат Iофхэр мыщ зэрэщызэпыфэхэрэм зыщигъэгъозагъ.

«Дахъо — ДжэгокIо гъэхъун» зыфиIорэ автомобиль гъогур джыдэдэм мыщ щагъэпсы. Ащ къыдыхэлъытагъэу псыхъохэу Шъхьэгуащэрэ ДжэгуакIорэ лъэмыджыкIэхэр атыралъхьагъэх. Мы гъогум зекIо-рекреационнэ паркым урищэлIэщт. Джащ фэдэу инженер коммуникациехэри агъэпсых. IофшIэнхэр мыгъэ аухынхэу рахъухьэ. Проектым игъэцэкIэнкIэ инфраструктурэ бюджет чIыфэрэ казначейскэ чIыфэрэ къызфагъэфедэх.

ПсэолъэшIын IофшIэнхэм зафежьэхэрэр Кавказ археологическэ экспедицием испециалистхэм археологическэ ушэтынхэр зашIыхэкIэ ары ныIэп. Ижъырэ саугъэтхэр бэу республикэм зэритхэр шIэныгъэлэжьхэм къагъэшъыпкъэжьы. Археологическэ культурэ зэфэшъхьафхэм ахэхьэрэ пкъыгъохэр мыщ къыщычIатIыкIыгъэх, исп унэхэр, Iуашъхьэхэр, агъэлъэпIэрэ чIыпIэр къыхагъэщыгъэх. Сыд фэдэрэ лъэхъани мы чIыпIэр цIыф кIуа­пIэу зэрэщытыгъэр специалистхэм къаушыхьаты.

Адыгеим иижъырэ тарихъ бай икъызэтегъэныжьынкIэ археологическэ Iоф­шIэн­хэм мэхьанэшхо зэряIэр АР-м и ЛIышъхьэ къыхигъэщыгъ. Джащ фэдэу зекIоным зезыгъэушъомбгъущтхэми ар зэу ащыщ. Музей шъхьэихыгъэ мыщ щыгъэпсыгъэнымкIэ амалэу щыIэхэр зэрагъашIэх. Исп унэхэу, Iуашъхьэхэу къыхагъэщыгъэхэр ащ къызэтыригъэ­нэжьыщтых, зекIуаби къызылъащэн алъэкIыщт.
ДжэгокIо гъэхъунэм иэтнопарк Адыгеим икъушъхьалъэ илъэгъупхъэ чIыпIэхэм ащыщ хъущт. Этнокультурнэ мэхьанэ зиIэ Iофтхьабзэу цIыфхэр жъугъэу зыхэлэжьэщтхэр, адыгэ къуаем ифестиваль ДжэгокIо гъэхъунэм тапэкIэ щызэхащэнхэу рахъухьэ. ЛъэсрыкIохэм атегъэпсыхьэгъэ лъагъохэри, кушъхьэфачъэкIэ къызыщачъыхьащт гъогухэри, шхапIэхэри мыщ щагъэпсыщтых.
«Мы рекреационнэ чIыпIэм ишIуагъэкIэ хэпшIыкIэу зекIо­хэм къахэхъощт, инвестициехэр нахьыбэ хъущтых, IофшIэпIэ чIыпIакIэхэр зэхащэщтых. Къагъотыгъэ пкъы­гъохэр зэкIэ Адыгеим къинэжьыщтых, ахэр музейхэм яттыщтых. БлэкIыгъэр тынэгу къыкIэдгъэуцо­жьы­шъуным пае къызыщагъотыгъэ чIыпIэхэм мегалитхэр къащы­гъэнэжьыгъэнхэм зэрэтфэлъэ­кIэу тыпылъыщт. Тиреспуб­ликэ исхэми, зекIохэми мы чIыпIэр ашIогъэшIэ­гъонынэу, Адыгеим иижъырэ тарихъ бай, пкъыгъоу къычIатIыкIыгъэхэм нэIуасэ защыфашIынэу, илъэс мин пчъагъэкIэ узэкIэ­Iэбэжьмэ тятэжъ пIашъэхэм псэукIэу яIагъэр анэгу къыщыкIагъэуцожьын алъэкIынэу сэгугъэ», — къы­Iуагъ КъумпIыл Мурат.

Адыгеим и ЛIышъхьэ чIыпIэм ипланировкэ икъоу дегупшысэнхэу, тарихъ, этнокультурнэ мэхьанэу ащ иIэр, зекIохэм яфэIо-фашIэхэм ягъэцэкIэнкIэ ищыкIэгъэ пстэури къыдалъытэнэу пшъэрылъ афи­шIыгъ.