Лъэпкъ хорэу «Урыс орэдыр»
Илъэс 30-кIэ узэкIэIэбэжьмэ, гъэтхапэм, 1994-рэ илъэсым хьафизэхэм я Урысые обществэ икъутамэ Адыгеим щызэхащэгъагъ. Мы хъугъэ-шIагъэм епхыгъэ Iофтхьабзэ щыкIуагъ хьафизэхэм ятхылъеджапIэу Мыекъуапэ дэтым. Мы мэфэкIымкIэ хьафизэхэм я Урысые обществэ и Президентэу В. В. Сипкиныр къафэгушIуагъ Адыгэ республикэ организацием хэтхэм.
Мы организацием итхьаматэ игуадзэу А. Б. Хлоповым Адыгеим ичIыпIэхэм зымылъэгъухэрэр зэращызекIохэрэр, ахэм ящыIэкIэ-псэукIэ къыIотагъ. 1930-рэ илъэсым лъэпкъ хорэу (орэдыIо купэу) «Русская песня» ыцIэу зэхащэгъагъэм ар къытегущыIагъ. Хорым орэд къыщыпIоныр зыгъэпсэфыгъо гуапэ хъурэ культурэ Iофтхьабз; сэкъатныгъэ зиIэхэм, зымылъэгъурэ цIыфхэм заужьыжьынымкIэ, эстетикэ ыкIи творческэ нэшанэу ахэлъхэр къызэIухыгъэнхэмкIэ ыкIи япсауныгъэкIэ мэхьанэ зиI. Ащ къыхэкIэу, организациер зызэхащагъэр илъэс 30 зэрэхъурэм епхыгъэ Iофтхьэбзэ заулэ ВОС-м щызэхащэгъагъ. Зэрэзэдаштагъэу, зэлъашIэрэ хорэу «Русская песня» къыхэгъэщыгъэныр, ащ хэтхэу зымылъэгъухэрэм, ВОС-м хэтхэм ыкIи цIыф къызэрыкIохэм ацIэ къыраIоныр ямурадыгъ.
А. Б. Хлоповым къызэриIуагъэмкIэ, шъхьэкIафэрэ лъытэныгъэрэ творческэ коллективым хэтхэмкIэ зэрахыхэрэр художественнэ самодеятельностым иветеранхэр ары. МэфэкI зэIукIэгъум къекIолIагъэхэм апашъхьэ къиуцуагъэх, афэлъэкIырэр къагъэлъэгъуагъ Т. В. Капраловам, М. М. Машинам, Г. Ф. Федорченкэм ыкIи нэмыкIхэми. Ахэр ящыIэныгъэ гукъэкIыжьхэмкIэ, анахьэу хорыр зэхэщагъэ зэрэхъугъэмкIэ цIыфхэм къадэгощагъэх.
Адыгеим зымылъэгъоу исхэм ящыIэныгъэ ехьылIэгъэ тхыгъэ хэутыгъэхэу чIыпIэ гъэзетхэм къарыхьагъэхэр ашIоIофэу зэрагъэгъотыхэзэ хъарзынэщым зэрэщаухъумэхэрэр, хорым ежь игъогу илъэс зэфэшъхьафхэм апхырищызэ, ыпэкIэ зэрэлъыкIуатэрэр сурэттехыгъэ зэфэшъхьафэу стендым тетхэм къаIуатэ.
МэфэкI зэIукIэгъум щыIугъэх хорым къыIорэ орэдхэм ащыщхэр ыкIи къагъэлъэгъуагъ документальнэ фильмхэу лъэпкъ коллективым фэгъэхьыгъэхэр.
Адыгэ республикэ организациер зызэхащагъэр илъэс 30 зэрэхъугъэмкIэ щытхъур къэзылэжьыгъэ хорым хэтхэм къафэгушIуагъ, гъатхэр къызэрэсыгъэмкIэ, творческэ гъэхъагъэхэмкIэ, псауныгъэкIэ, шIукIэ къафэлъэIуагъ хьафизэхэм я Урысые обществэ и Правление.
Дзэукъожь Нуриет.