Урысыем ифондэу «Хэгъэгум иухъумакIохэр» зыфиIорэм итхьаматэ шъолъырхэм Iоф адэшIэгъэнымкIэ игуадзэу Сергей Усмановым зэхэсыгъо зэхищагъ. ХэушъхьафыкIыгъэ дзэ операцием иветеранхэм ыкIи ахэм яунагъохэм IофшIэнэу адызэрахьэрэм Iофтхьабзэм хэлажьэхэрэр щигъэгъозагъэх АдыгеимкIэ фондым итхьаматэу ПIатIыкъо Аслъан.

Шъолъыр фондым уцогъу 1600-м ехъурэ зыкъыфагъэзагъ. Мыщ исоциальнэ координаторхэм муниципальнэ образованиехэм зэкIэми Iоф ащашIэ. Къутамэр къэралыгъо ыкIи сатыум еп­хыгъэ организациехэм чанэу адэлажьэ, джащ фэдэу быслъымэнхэм я ДиндэлэжьапIэ, Мыекъопэ епархием зэпхыныгъэ пытэ адыриI.
«Хэгъэгум иухъумакIохэр» зыфиIорэ фондым ишъолъыр къутамэ хэушъхьафыкIыгъэ дзэ операцием хэлажьэхэрэм апае игъэкIотыгъэ диспансеризациемкIэ программэр республикэм щыпхырещы. «ХэушъхьафыкIыгъэ коридор» зыфиIорэ шIыкIэм тетэу псынкIэу, зэрифэшъуашэу ахэм уплъэкIунхэр афашIых. Ветеранхэм япсауныгъэ зыпкъ зыщырагъэуцожьырэр республикэ поликлиникэр, зыгъэпсэфыпIэу «Лэгъо-Накъ».

Мы уахътэм ехъулIэу дзэ операцием иветеран — сэкъатныгъэ зиIэ нэбгырэ 47-мэ медицинэ фэIофашIэхэр афэгъэ­цэкIэгъэным фондыр лъэплъэ. Ахэм зэкIэми реабилитациер акIунымкIэ техническэ амалхэр аIэкIэлъых, ащ хэхьэх протезхэу федеральнэ Переченым къы­химыубытэхэрэри. «Бэщ Iушыр», спорт протезыр ыкIи спорт курэжъыер шъо­лъыр фондым имылъкукIэ арагъэгъотыгъэх.
Патриотическэ IофшIэным ветеранхэр чанэу фондым къыхегъэлажьэх. Шъо­лъыр проектэу «ЛIыхъужъэу къэхъухэрэп» зыфиIорэм къыдыхэлъытагъэу кIэлэеджа­кIохэм ыкIи студентхэм зэIукIэгъухэр афызэхащэх. Ащ фэдэ зэIукIэгъухэр Iофтхьабзэу «Солдатский треугольник» зыфиIорэмкIэ аухых.
Сурэтхэр: шъолъыр фондыр.