ЗэзэгъыныгъэкIэ къулыкъур зыхьыщтхэм яугъоин фэгъэзэгъэ кощырэ мобильнэ комплексым мэфитIум Мыекъуапэ ипсэупIэу Черемушкэм Iоф щишIагъ. «Адыгэ макъэр» ащ щыIагъ ыкIи иIофшIэн зыщигъэгъозагъ.

ЗэзэгъыныгъэкIэ къулыкъу зы­хьыщтхэм яугъоинкIэ пунктым истаршэ инструкторэу, прапорщикэу Михаил Волчанскэм къы­зэриIуагъэмкIэ, республикэм имуниципальнэ образованиехэм якъоджэ псэупIэ зэфэшъхьафхэм къащыуцухэзэ зэзэгъыныгъэкIэ къулыкъум икъэбар къафаIуатэ.
— ХэушъхьафыкIыгъэ дзэ операциер зырагъэжьагъэм къы­щыублагъэу дзэкIолIхэу зэзэгъы­ныгъэкIэ къулыкъум кIатхэхэрэм зэтыгъо ахъщэ тынэу араты­хэрэм пчъагъэрэ къахэхъуагъ. Къалэу Мыекъуапэ тштэмэ, мыщ щыкIатхэрэм пстэумкIи зэты­гъоу сомэ мин 850-м фэдиз ратыщт. Нахь игъэкIотыгъэу къатIомэ, федеральнэр — сомэ мини 195-рэ, республикэр — сомэ мин 500 фэдиз (хэушъхьафыкIыгъэ дзэ операцием хэлажьэхэрэм сомэ мин 300, зэзэгъыныгъэ кIэтхагъэхэу резервнэ полкхэм къулыкъур ащызымыхьыщтхэм сомэ мин 200), къалэу Мыекъуа­пэ — сомэ мини 105-рэ ыкIи дзэ шъуашэхэр къыращэфынхэу сомэ мин 50. Ахъщэ тынхэм анэмыкIэу подразделениеу зыхэхьанхэ алъэкIыщтхэм якъэ­бари къафэтэIуатэ, — къыхигъэщыгъ Михаил Волчанскэм.
ТигущыIэгъу къызэриIуагъэмкIэ, десантнэ, артиллерие, флотилие, хы, мотощэрыон дзэхэм яподразделениехэм ахэхьащтхэр агъэпсых. Ахэр апэ мэзитIу-щэ рагъаджэх, ухьазырыныгъэ гъэ­нэфагъэхэр арагъэкIухэшъ, дзэ операцием ащэх.
Шъугу къэдгъэкIыжьын, мобильнэ комплексым иIофшIэн икIыгъэ илъэсым Iоныгъом зэрэ­ригъэжьагъэр. Автомобилэу «Газель» зыфиIоу мобильнэу зэтегъэпсыхьагъэр Къыблэ дзэ шъолъырым икомандование Адыгеим къыритыгъэр республи­кэм ирайонхэр къыкIухьэхэзэ зэзэгъыныгъэкIэ къулыкъу зы­хьыщтхэр еугъоих.
Мы илъэсыр къызихьагъэм къыщегъэжьагъэу ар Тэхъутэмы­къое районым, Мыекъопэ районым ипсэупIэхэу Каменномостскэм, Тульскэм, нэмыкIхэми къащыуцугъ. НахьыбэрэмкIэ къалэу Мыекъуапэ Iоф щашIэ, цIыфыбэ зыщызэхахьэрэ чIыпIэ­хэм макIох: паркым, вокзалым, бэдзэршIыпIэхэм апэблагъэу.
— Черемушкэм тызытетыгъэ зы мафэм нэбгырэ 40 фэдиз къытэолIагъ, упчIэ зэфэшъхьаф­хэр къытахьылIагъэх, игъэкIотыгъэу тадэгущыIагъ. Ащ щыщэу зэзэгъыныгъэм кIэтхэнэу къезэгъыгъэр нэбгыри 8, 6-р хъулъфы­гъэх, 2-р бзылъфыгъэх. Зэзэгъы­ныгъэкIэ къулыкъу зыхьыщтхэм аныбжь гъэнэфагъэу щыт — хъулъ­фыгъэхэр — илъэс 65-м, бзылъфыгъэхэр илъэс 40-м ашIокIыхэ хъущтэп. Зы дэкIыгъо агитацием гурытымкIэ нэбгыри 10 фэдиз къеты, — хигъэунэфыкIыгъ старшэ прапорщикэу Михаил Волчанскэм.
Iэшъынэ Сусан.
Сурэтыр: кощырэ мобильнэ пунктыр.