Мыекъуапэ дэт гъогу-псэолъэшI гъэIорышIапIэу N 3-м иIофышIэу БжьашIо Мурат «Адыгэ Республикэм изаслуженнэ псэолъэшI» зыфиIорэ цIэ лъа­пIэр бэмышIэу къыфагъэшъошагъ, ар къэзыушыхьатырэ тхылъымрэ бгъэхалъхьэмрэ мэфэкI шIыкIэм тетэу Къэралыгъо филармонием Адыгэ Республикэм и ЛIышъхьэу КъумпIыл Мурат щыритыжьыгъ.

БжьашIо Мурат зы­шIэ­хэрэр зэкIэ мы цIэ лъапIэр къызэрэфагъэшъо­шагъэм фэшI лъэшэу гу­шIуагъэх. Ар тефэ дэдэу, къылэжьыгъэу зэрэщытыр пстэуми хагъэунэ­фыкIыгъ. Сэри ахэм сащыщ, сыда пIомэ Мурат зышъхьамысыжьэу зэ­рэлажьэрэм, чэщи мафи имыIэу IофшIэным ыпсэ зэрэхэтIагъэм сыщыгъуаз. Илъэс щэкIым къехъу­гъэшъ ар зысшIэрэр, ицIыфы­гъэкIэ, игупцIэнагъэкIэ, шъыпкъэныгъэу хэлъымкIэ нэмыкIхэм къахэщэу, шIу щэхъу зыгу къимыкIырэ цIыфэу зэрэщытыр сыу­шэтыгъ. Сэ сизакъоп, зэ­ныбджэгъу-зэлэгъу купэу тызэхэтхэм ар сыдигъуи хагъэунэфыкIы.
БжьашIо Мурат Анисэ ыкъор 1972-рэ илъэсым мэкъуогъум и 29-м къалэу Псыфабэ къыщыхъугъ. Ятэу Анис Псыфабэ дэт мэз комбинатым Iэшъхьэтет шъхьаIэу щылажьэ­щтыгъ. Ау, гухэкI нахь мы­шIэми, Мурат илъэсиплI нахь ыныбжьыгъэп ятэ дунаир зехъожьым. Янэу Сарэ Псыфабэ дэт гидрологическэ станцием инженерэу, химик-гидро­геологэу илъэс пчъагъэ­хэм къакIоцI Iоф щишIагъ, «Псыфабэ ицIыф гъэшIуагъ» зыфиIорэ цIэ лъапIэр къыфагъэшъошагъ.
ГъогушIхэм ахэхьаным ыпэкIэ Мурат гъэсэныгъэ дэгъу зэригъэгъотыгъ, 1989-рэ илъэсым Краснодар дэт политехническэ институтым чIэхьагъ, ащ щеджэфэ апшъэрэ еджапIэр университет хъугъэ, автомобиль гъогухэмрэ аэродромхэмрэ шIыгъэнхэм фытегъэпсыхьэгъэ сэнэхьатыр зэригъэгъо­тыгъэу 1994-рэ илъэсым Пшызэ къэралыгъо технологическэ университетыр къыухыгъ.
А илъэс дэдэм Мурат IофшIэныр Псыфабэ щыригъажьи 2002-рэ илъэсым нэс къалэм игъогушI гъэIорышIапIэ Iоф щи­шIагъ. 2002-рэ илъэсым Мыекъуапэ дэт гъогушI-­псэолъэшI гъэIорышIапIэу N 3-м мастерэу Мурат IофшIэныр щиублагъ. 2007-рэ илъэсым къыщегъэжьагъэу геодезистэу, 2022-м къыщыублагъэу прорабэу ащ Iоф ешIэ.
А уахътэм къыкIоцI Мые­къуапэ ыкIи ар къэзыухьэрэ автомобиль ­гъогу пчъагъэ зышIыхэ-
рэм ащыщыгъ.
— Iофэу тшIэрэм пшъэ­дэкIыжьышхо зэрэпылъыр къызгурэIо, ащ елъытыгъэу сиIофшIэни сэгъэпсы. Сыгу рихьырэп зыгорэм теурыкIо-елъэкIонкIэ иIоф ыгъэцакIэ хъумэ. Ащ фэдэхэр тиIофшIапIи Iузагъэхэрэп. СиIофшIэ­гъухэр IэпэIасэх, яIоф амыухэу, кIэухым намыгъэсэу ядэжь кIожьхэрэп, а лъэныкъомкIэ дэгъоу зэкIэхэми тызэгурыIуагъ. Сэ синасып къыхьыгъ мыщ фэдэ гъэIорышIапIэм сыщылэжьэнэу, рес­публикэм хэхъоныгъэу ышIыхэрэм сиIоф ахэ­лъынэу зэрэхъу­гъэр, — къыддэгощагъ игупшы­сэхэмкIэ Мурат.
Муратрэ ишъхьэгъусэу Фатимэрэ сабыищ зэдапIу, унэгъо дахэу, зэгурыIохэу зэдэпсэух, щыIэныгъэм игъогу нафэ зэдытетых.
ГъогушIхэм яшIын иIа­хьышхо зэрэхилъхьэрэр къэзыушыхьатырэ федеральнэ ыкIи республикэ бгъэхалъхьэхэр, щытхъу тхылъхэр мымакIэу Бжьа­шIо Мурат къыратыгъ. Адыгеим къэралыгъо гъэ­псыкIэ зиIэр илъэси 100 зэрэхъугъэм фэгъэхьыгъэ медальри бэмышIэу къыфагъэшъошагъ. Ау джырэ щытхъуцIэр ахэм анахь лъапIэ хъугъэ, илъэс пчъа­гъэхэм къакIоцI ыгу етыгъэу, Iофэу зыфэгъэзагъэм щытхъу пылъэу зэригъэцэкIагъэм ар ишы­хьат. Джыри зэ Мурат тыфэгушIо, гъэхъэгъабэ тапэкIи ышIынэу, нахь лъэгэпIэ инхэм анэсынэу тыфэлъаIо!
Дэрбэ Тимур.