Уцым зыщешIэхэрэ хоккеимкIэ къалэу Шъачэ икIэлэцIыкIу командэ Краснодар краимкIэ анахь дэгъоу илъэс пчъагъэ хъугъэу алъытэ.

Апэрэ текIоныгъэр ошIэ-дэмышIэ Iофэу бэмэ къащыхъу­гъагъ, джы ар хабзэ хъугъэ, зэкIэри есэжьыгъ. Курорт къа­лэм емыпэсыгъэ спорт лъэпкъэу уцым зыщешIэхэрэ хок­кеимкIэ Шъачэ икIэлэцIыкIу командэ илъэсийкIэ узэкIэ­Iэбэжьмэ зэхащагъ. Ар зигу­къэкIыгъэр ПсышIопэ районым испорт еджапIэу N 6-м а лъэ­хъаным ипэщэгъэ Тыу Рэщыдэрэ тренерэу щызыгъасэхэ­рэмрэ.
Апэрэ илъэс дэдэм Краснодар краим ичемпион ахэр хъу­гъэх. КъыкIэлъыкIорэми спортымкIэ мастерэу Кобл Мэдин ыгъэсэрэ кIэлэцIыкIу купым чемпионыцIэр къыгъэшъыпкъэ­жьыгъ. Ащ къыщыублагъэу апэ­рэ чIыпIэр зэрамытIупщырэм имызакъоу, ащ хэт кIалэхэм янахьыбэр ихэшыпыкIыгъэ краим исборнэ командэу Урысые ыкIи дунэе зэнэкъокъухэм ахэ­лажьэрэм щешIэх.
БэмышIэу Краснодар краим мы хоккей лъэпкъымкIэ щызэхащэгъэгъэ зэнэкъокъум ЛIыфэ Назыр, Тимур Чикаидзе, Богдан Аскеровыр, Егор Ковалевыр, Руслан Аскеровыр, ЛIыфэ Элан, Бэстэ Мэдин, ЛIыфэ Батыр, Боус Джамболэт, Абумуслим Рамазановыр, Рустам Сырцевыр ыкIи ТIэшъу Дамир зыхэт командэр апэрэ щыхъугъ.
— ТекIоныгъэр къин хэмы­лъэу къыдэтхыгъэ фэдэу къэлъа­гъоми, Iофышхоу тшIэрэм, зыгъэхьазырын зэпымыухэм ар къакIэлъэкIо, — къыIуагъ чем­пионхэр зыгъасэхэрэ Кобл Мэ­дин. — Емызэщыжьэу къыд­деIэрэ цIыфхэр мыхъугъэмэ ­ащ фэдэ гъэхъагъэхэр зэрэтымышIышъущтгъагъэри къыхэз­гъэщымэ сшIоигъу. СыдигъокIи тигъус футболистэу, бизнесме­нэу, меценатэу, зыгуи, зыпси спортым хэзылъхьэрэ Аршак Абянли. Ар тэ тимызакъоу, футбол командэу «ШэхэкIэйми» деIэ. Джы къызнэсыгъэми футбол ешIэнэуи уахътэ къыхе­гъэкIы. Спорт еджапIэу N 6-м ипащэу Вячеслав Хазарджянрэ къуаджэу ШэхэкIэй дэт гурыт еджапIэм ипащэу Алый Мар­зетрэ лъэшэу тафэраз.
НЫБЭ Анзор.