ЩынэгъончъагъэмкIэ Фе­де­ральнэ къулыкъум Адыгэ Рес­публикэмкIэ и ГъэIорышIапIэ Мыекъуапэ щыщ бзылъфыгъэу Урысые Федерацием и Уголовнэ кодекс ия 275.1-рэ статья зигугъу къышIырэ бзэ­джэшIа­гъэр зэрихьагъэкIэ зэ­гуцафэ­хэрэм уголовнэ Iоф къыфызэ­Iуихыгъ.
ЩынэгъончъагъэмкIэ къулыкъухэм яIофышIэхэм зэрагъэу­нэфыгъэмкIэ, мы бзылъфыгъэм Украинэм щынэгъончъагъэмкIэ икъулыкъу илIыкIохэм зафигъэ­загъ, Урысые Федерацием ищынэгъончъагъэ изэщыгъэ­къонкIэ Украинэм деIэ зэрэшIоигъор, пшъэрылъ къызыфашIыкIэ, ящыкIэгъэ къэбархэр къызэриугъоищтхэр ыкIи зэраIэкIигъэхьащтхэр ариIуагъ.
Пщыныжь зыщарагъэхьырэ учреждением чIэсэу, хэушъхьафыкIыгъэ дзэ операциер зы­щы­кIорэ чIыпIэм къулыкъу щихьы­нэу Урысыем зыкъэухъумэжьынымкIэ и Министерствэ зэзэгъы­ныгъэ дэзышIынэу изыхъухьэрэ иIахьыл благъэ Украинэм и УIэ­шыгъэ КIуачIэхэм агохьаным­кIэ амалэу щыIэхэм бзылъфыгъэр акIэупчIагъ ыкIи Урысые Федерацием ищынэгъончъагъэ зэщыгъэкъогъэнымкIэ Украи­нэм илIыкIохэм IэпыIэгъу афэхъу­ным зэрэфэхьазырыр ариIуагъ.
Украинэм илIыкIохэр бзылъфыгъэм дэлэжьэнхэу къезэгъы­гъэх, ащ амалэу иIэхэр зэрагъэшIагъ, шъэфэу ыужкIэ зэрэзэдэгущыIэщтхэ шIыкIэр къыфаIотагъ, Урысыем идзэ псэуа­лъэхэмрэ идзэкъулыкъушIэхэмрэ зыдэщыIэ чIыпIэхэм яхьылIэгъэ къэбархэр къыугъоинхэу ыкIи аIэкIигъэхьанэу пшъэрылъ къыфашIыгъ.
ЩынэгъончъагъэмкIэ къулыкъухэм яIофышIэхэм бзылъфыгъэр къаубытыгъ. Къэрэгъулхэм ар къагъэгъунэнэу Адыгэ Рес­публикэм и Мыекъопэ къэлэ хьыкум ыухэсыгъ. Оперативнэ-­лъыхъун, следственнэ Iоф­тхьа­бзэхэр джыри макIох.
Урысые Федерацием и Уголовнэ кодекс ия 275.1-рэ статья диштэу илъэси 8-м нэсэу бзылъфыгъэм хьапс тыралъхьан ыкIи сомэ миллион фэдиз хъурэ тазыр рагъэтын алъэкIыщт.