Журналистикэм ылъэныкъокIэ Адыгэ Республикэм и ЛIышъхьэ ишIухьафтын афэгъэшъошэгъэнымкIэ Комиссием изэхэсыгъо щыIагъ. Адыгэ Респуб­ликэм и Президент 2008-рэ илъэсым мэлылъфэгъум и 30-м ышIыгъэ Указэу N 41-р зытетэу «Журналистикэм ылъэ­ныкъокIэ Адыгэ Республикэм и ЛIышъхьэ ишIухьафтын ехьылIагъ» зыфиIорэм диштэу 2024-рэ илъэсым журналистикэм ылъэныкъокIэ Адыгэ Респуб­ликэм и ЛIышъхьэ ишIухьафтын афэгъэшъошэгъэным фэгъэхьыгъэ шъхьэ­ихыгъэ зэнэкъокъу зэрэзэхащэрэмкIэ унашъо мыщ щаштагъ.
ЛъэныкъуитIукIэ: гъэзетхэмрэ журналхэмрэ къыхаутыгъэхэмкIэ ыкIи теле-, радиокъэтынхэмкIэ шIухьафтыныр афагъэшъошэщт. Журналистикэм ылъэныкъокIэ Адыгэ Республикэм и ЛIышъхьэ ишIухьафтын афэгъэшъошэгъэнымкIэ Комиссием 2024-рэ илъэсым чъэпыогъум и 1-м къыщегъэжьагъэу шэкIогъум и 1-м нэс журналист Iоф­шIагъэхэмрэ документхэмрэ ыштэщтых, 2024-рэ илъэсым шэкIогъум и 1-м къыщегъэжьагъэу шэкIогъум и 30-м нэс ахэм ахэплъэщт.
ШIухьафтын зыфэгъэшъошагъэмэ хъунэу къагъэлъэ­гъорэ IофшIагъэхэр зэраштэрэмкIэ шапхъэхэр Адыгэ Рес­публикэм икъэралыгъо хабзэ игъэцэкIэкIо къулыкъухэм яофициальнэ сайтэу «http://adygheya.ru» зыфиIорэм — Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет ираздел — ижъугъотэн шъулъэкIыщт.
Документхэр Комиссием итхьаматэ игуадзэу, Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу А. А. Шъхьэлахъом рахьылIэнхэ фае: къ. Мыекъуапэ, ур. Крестьянскэр, 236, я 49-рэ каб., тел.: (8772) 52-36-01, факсыр: (8772) 52-10-16, электрон адресыр: komnac01@yandex.ru.