IофшIапIэм Iут цIыфыр къэсымэджагъэмэ, медицинэм иучреждение зыфегъазэшъ ипсауныгъэ зэрэзэщыкъуагъэр къэзыушыхьатырэ тхылъыр, «больничный лист» зэрэтшIэрэр, егъэпсы. А уахътэм ар IофшIэ кIорэп, илэжьапкIэ чIенэ, ау «больничнэм» пае ахъщэ къыраты. IофшIэнымкIэ Кодексым ары непэ къызэриIорэр. Джы мыщ зэхъокIыныгъэхэр фэхъунхэ ылъэкIыщт.

УФ-м и Къэралыгъо Думэ идепутатхэр ащ зэхъокIыныгъэхэр фэшIыгъэнхэм кIэщакIо фэхъугъэх. IофшIэнымкIэ, социальнэ политикэмкIэ ыкIи ветеранхэм яIофхэмкIэ Комитетым къызэритыгъэмкIэ, цIыфэу къэсымэджагъэм «больничнэр» къызэIуимыхэу пэIудзыгъэ шIыкIэм тетэу ипшъэрылъхэр ыгъэцэкIэнхэм фэхьазырмэ, ащ фэдэ амал етыгъэн фаеу алъытэ. Ащ фэгъэхьыгъэ гъэтэрэзыжьынхэр мы уахътэм агъэхьазырых, «гъэтхэ сессием» щытегущыIэнхэу къы­халъхьан гухэлъ яI. Ащ имызакъоу, Iоф­шIэнымкIэ Кодексым ар щыгъэнэфэгъэн фаеу къаIо.
«Больничнэм» къыдэлъытагъэу къыратырэ ахъщэр зэрэнахь макIэм къы­хэкIэу, цIыфым гъотэу мазэм иIэм къы­щэкIэ. Арышъ, депутатхэр кIэщакIо зыфэхъугъэр пхыращымэ лэжьапкIэр, ащ имызакъоу, Социальнэ фондым имылъкуи къызэтенэщтых, IофшIэпIэ чIыпIэ къэзытырэм иIофшIэни къэуцущтэп ыкIи къыщыкIэщтэп.
Хэбзэихъухьэхэм къызэраIуагъэмкIэ, ащ фэдэ гъэтэрэзыжьынхэм кIэщакIо афэхъунхэм къафэзыщагъэхэр «пандемиеу» щыIагъэр ары. Коронавирусым нэмыкIэу зэпахырэ уз зэфэшъхьафхэр щыIэх, гущыIэм пае, пэтхъу-Iутхъур. Ащ фэдэхэм зызщаушъомбгъурэ лъэхъаным къызэолIагъэхэр е ипсауныгъэ изытет ыпкъ къикIэу защызыухъумэн фаехэр унэм исынхэ ыкIи «больничнэ» агъэпсын фаеу мэхъу. Бэрэ ар къызэIузыхыхэрэр зимыкIасэхэр IофшIэпIэ чIыпIэ къэзытыхэрэм зэрахэтхэр хэткIи шъэфэп. Анахьэу унэе бизнес зиIэхэр ары. Гъэ­тэрызыжьынхэр хэбзэгъэуцугъэм фа­шIыхэу, IофшIэнымкIэ Кодексым хагъа­хьэхэмэ, лъэныкъуитIумкIи федэ хъущт.
ХЪУТ Нэфсэт.