ЖъоныгъуакIэм и 9-м ипэгъокIэу творческэ зэнэкъокъум хэлэжьэнхэу Адыгэ Республикэм щыпсэухэрэр рагъэблагъэх.

СурэтшIыгъэхэм я Дунэе зэнэкъокъоу «Открытка Победы» зыфиIорэм хэлэжьэнхэу ТекIоныгъэм и Музей Адыгеим щыпсэухэрэм къяджэ. Мы илъэсым зэнэкъокъум зэреджагъэхэр — «ЦIыфхэм ялIыхъу­жъныгъ».
— ТекIоныгъэшхом икъыдэхын зиIахьышIу хэзылъхьэгъэ цIыфхэм ясурэтхэр открыткэхэм атешъушIыхьан шъулъэкIыщт. Ахэр фронтым хэтыгъэхэм ыкIи тылым Iутыгъэхэм ямызакъоу, заом хэлэжьэгъэ корреспондентхэр ыкIи тхакIохэр, агитбрига­дэхэм яактерхэр ыкIи ямузыкантхэр, врачхэр, медсестрахэр, колхозым хэ­тыгъэ­хэр, рабочхэр, кIэлэегъаджэхэр, музейнэ Iофы­шIэхэр, нэмыкIхэри. Мыщ хэлажьэхэ­рэм ежь яунагъо къикIыгъэ лIы­хъужъхэр, ягупсэ еджапIэхэм аIутыгъэхэм е зыщы­псэухэрэм адэсыгъэхэм ащыщ сурэт ашIы­мэ хъущт, — къытыгъ ТекIоныгъэм и Музей.
Зэнэкъокъум зэрэхэлэжьэщтхэмкIэ лъэIу тхылъыр мэлылъфэгъум и 15-м нэс жъугъэхьын шъулъэкIыщт. Ащ пае шъузыфэе художественнэ шъуашэм илъэу сурэтыр шъогъэхьазыры (масло, акварель, тушь, карандаш, коллаж, компьютернэ графикэр). Творческэ купкIэу ыкIи гупшысэу халъхьагъэм, мэхьанэу иIэм, зыфэдэ щымыIэмэ IэпэIэсэныгъэу рахьылIагъэм жюрим уасэ фишIыщт.
ЗэкIэ IофшIагъэхэр «виртуальнэ» къэгъэлъэгъоным хагъэхьащтых ыкIи ТекIоныгъэм и Музей иофициальнэ сайт къырагъэхьащтых. Интернетыр зыгъэфедэхэрэм агу рихьыгъэ открыткэр къыхахынышъ, электроннэ почтэкIэ ягупсэхэм, яныбджэгъухэм ыкIи яIофшIэгъу­хэм афагъэхьын алъэкIыщт. Джащ фэдэу зэIухыгъэ мэкъэтыным шъухэлэжьэн амал щыI, цIыфхэм къыхахыгъэ сурэтшIыгъэм «Приз зрительских симпатий» зыфиIорэ шIухьафтыныр фагъэшъошэщт. ОсэшIхэм IофшIэгъэ анахь дэгъоу къыхахыщтхэр зипчъагъэкIэ гъэнэфагъэу къыдагъэкIыщт мэфэкI открыткэхэм лъап­сэ афэхъущтых.
Зэнэкъокъум икIэуххэр жъоныгъуакIэм и 2-м зэфахьысыжьыщтых. Ащ хэлэжьэгъэ пстэуми сертификатхэр аратыщтых, анахь дэгъухэр ТекIоны­— гъэм и Музей рагъэблэгъэнхэшъ, мэфэкI шIыкIэм тетэу щафэгушIощтых, шIухьафтын лъапIэхэр къаратыщтых.
Зэнэкъокъур ТекIоныгъэм и Музей игъусэу зэхэзыщэхэрэр УФ-м зыкъэухъумэжьынымкIэ и Министерств, Юнармиер, дзэ-спорт гупчэу «ДзэкIолI», «Аргументы недели», тхылътедзапIэу «ЭксмоДетство» зыфиIохэрэр, «ТекIоныгъэм иволонтерхэр».
Къэбарыр нахь игъэкIотыгъэу зэнэкъокъум инэкIубгъо ижъугъотэщт: https://victorymuseum.ru/form/otkrytka-pobedy-2024/.