СССР-м спортымкIэ имастерэу Владимир Назаровым ишIэжь фэгъэхьыгъэ зэнэкъокъухэр Ставрополь краим икъалэу Ессентуки испорт комплексэу «Спартак» зыфиIорэм щыкIуагъэх. Мыекъуапэ илIыкIохэм гъэхъэгъэшIухэр ашIыгъэх, медалипшI къахьыгъ.

Урысым икъыблэ хэхьэрэ къэлэ зэфэшъхьафхэм къарыкIыгъэхэ кIэлэ 60 ыкIи пшъэшъэ 80 ащ хэлэжьа­гъэх. Адыгеим илIыкIохэм ахэтыгъэ хъулъфыгъэ закъоу ХьакIмэфэ Заур апэрэ ныбжьыкIэ разрядым ипрограммэкIэ ятIонэрэ чIыпIэр къыдихыгъ. Адрэ медальхэр типшъа­шъэхэм къахьыгъэх. ТекIоныгъэр къафагъэшъошагъ республикэм икъэлэ шъхьаIэ щыпсэухэрэ Камилла Стребковамрэ Елизавета Деркачевамрэ. Джащ фэдэу тиспортсменкэхэм тыжьын медалищ къыдахыгъ, плIэгъогогъо ящэнэрэ хъугъэх.

НыбжьыкIэхэм къэлэ спорт еджапIэу В.С. Максимовым ыцIэ зыхьырэм зыщагъасэ. Ахэм ятренерых Вячеслав Косных, ХьакIмэфэ Светланэ ыкIи Анна Перепелица.