Адыгабзэмрэ тхыбзэмрэ я Мафэ фэгъэхьыгъэ зэнэкъокъоу «Адыгабзэм нахь фэIазэхэр» зыфиIорэр мы мафэхэм щыIагъ. Респуб­ликэм мыр апэрэу щызэхащэ.

Адыгэ Республикэм гъэсэ­ныгъэмрэ шIэныгъэмрэкIэ и Министерствэрэ сэнэхьат Iэпэ­Iэсэныгъэм хэгъэхъогъэнымкIэ Адыгэ республикэ институтымрэ Iофтхьабзэм кIэщакIо фэ­хъугъэх. Адыгабзэм икъэухъу­мэн, ихэгъэхъон, бзэм идэхагъэ цIыф жъугъэхэм алъыгъэIэ­сыгъэныр, зэлъягъэшIэгъэныр, яIэпэIэсэныгъэ хэгъэхъогъэныр ары зэхэщакIохэм пшъэрылъ шъхьаIэу яIагъэр.
Я 9 — 11-рэ классхэм аще­джэрэ ныбжьыкIэхэр Iофтхьа­бзэм хэлэжьагъэх. Адыгэкъалэ, Кощхьэблэ, Красногвардейскэ, Тэхъутэмыкъое, Теуцожь районхэм ыкIи МыекъуапэкIэ лицееу N 35-м якIэлэеджакIохэм заушэтыгъ.
Зэнэкъокъум иапэрэ уцугъо щагум щыкIуагъ, ныбжьыкIэхэм адыгэ шъуашэхэр ащыгъхэу къэшъо дахэхэр къашIыгъэх, орэдхэр къаIуагъэх. ЯтIонэрэм адыгэ шхыныгъохэмкIэ зэнэ­къокъугъэх. Ижъырэм ашIыщтыгъэхэри ахэм ахэтых: бахъсы­мэр, къундысыур, къое хьалыжъор, пIастэр, щыпсыр ыкIи нэмыкIыхэр. Куп пэпчъ иIанэ Iуп­кIэу, зэгъэфагъэу къытегущыIагъ.

Адыгэ шэн-хэбзэ зэхэтыкIэ зэфэшъхьафхэм къэгъэлъэгъо­нэу къагъэхьазырыгъэхэмкIэ кIэлэеджакIохэр зэнэкъокъугъэх. Адыгэкъалэ къикIыгъэ купым хэтхэм чэщдэсыр къагъэлъэ­гъуагъ, IурIупчъэхэр, къашъохэр, адыгэ джэгукIэхэр хэтхэу гъэшIэгъонэу зыкъашIыгъ. Тэхъутэмыкъое районым къикIыгъэхэм кушъэхапхэм шапхъэу пылъхэр зэкIэ къыраIотыкIыгъэх, Мые­къопэ купым ижъырэ адыгэ шэ­нэу шъэощэжьыр къыгъэлъэ­гъуагъ. Красногвардейскэ районым къикIыгъэхэм ижъыкIэ хьакIэм зэрэпэгъокIыщтыгъэхэр, уасэу фашIыщтыгъэр къыраIотыкIыгъ, хьакIэщым хьакIэр рагъэблэгъагъ, агъэшIуагъ. Теуцожь районым илIыкIохэм нысэщэ джэгум къешIэкIыгъэ шапхъэхэр къагъэлъэгъуагъэх, хъохъухэр къаIуагъэх, хабзэм тетэу уджкIэ джэгур аухыжьыгъ. Шэуджэн районым къэзыгъэ­лъэгъуагъэхэм илъэс зыныбжь кIэлэцIыкIум лъэтегъэуцо фа­шIыгъ, Кощхьэблэ районым къикIыгъэхэм ныо ежьэжь къа­шIыгъ. Куп пэпчъ зэрифэшъуа­шэу зыкъыгъэлъэгъуагъ.
Нэужым гущыIэжъэу ашIэхэ­рэр кIэлэеджакIохэм къаIуагъэх, кIэухым гимныр къырагъэIуагъ.
Уцугъо пэпчъ шэпхъэ гъэнэфагъэхэр пылъыгъэх. Адыгабзэр зэрагъэлъапIэрэр, дэгъоу зэра­шIэрэр къыраIотыкIыгъ. ТекIоныгъэр къыдэзыхыгъэр Шэуджэн районым къикIыгъэ купыр ары. Ахэр Хьатыгъужъыкъое гурыт еджапIэм щеджэрэ кIэлэеджа­кIох. ЯтIонэрэ чIыпIэр къыхьыгъ Кощхьэблэ районым, Адыгэкъалэ къикIыгъэ купыр ящэнэрэ хъугъэ.
ОсэшIхэм ахэтыгъэу, къэра­лы­гъо телерадиокомпаниеу «Адыгеим» ирежиссерэу Гъазый Бирамхъан телерадиокомпа­нием ыцIэкIэ ежь къыхихыгъэ купищым щытхъу тхылъхэр аритыгъ.
— Ижъырэ хабзэхэр дахэу, дэгъоу къэжъугъэлъэгъуагъэх. Шъоры тинеущрэ мафэ лъызыгъэкIотэщтыр. Шъузэрэадыгэм шъурыгушху, шъуиныдэлъфыбзэ жъугъэлъапIэ, бзэм идэхагъэ, ибаигъэ зэхашъушI. Непэ зэкIэми IупкIэу, дахэу шъукъэгущы­Iагъ, шъуиныбджэгъухэри ащ фашъущэх, — закъыфигъэзагъ ныбжьыкIэхэм Адыгэ Хасэм итхьаматэу ЛIымыщэкъо Рэ­мэзан.
КIэлэегъаджэхэмкIэ мыщ фэдэ зэхахьэхэм мэхьанэшхо зэряIэр, ахэр джыри нахьыбэ хъумэ зэрягопэщтыр къыIуагъ текIоныгъэр къыдэзыхыгъэ купыр зыгъэхьазырыгъэу, адыга­бзэмкIэ кIэлэегъаджэу ХьакIэмыз Фатимэ.
— ТекIоныгъэр къызэрэдэтхыгъэр лъэшэу тигуапэ хъугъэ. Iофтхьабзэм зэрифэшъуашэу зыфэдгъэхьазырыгъ, тиныдэ­лъ­фыбзэ шIу тэлъэгъу, нахь игъэ­кIотыгъэу зэдгъэшIэнэу тыфай. Мыщ фэдэ зэнэкъокъу­хэм тшIо­гъэшIэгъонэу тахэла­жьэ, — къыIуагъ Цэй Камилэ.
ДЕЛЭКЪО Анет.
Сурэтхэр: Iэшъынэ Аслъан.